ຕາມຮີດຄອງປະເພນີວັດທະນະທໍາທີ່ຄົນລາວ ຊາວພຸດຂອງຊາດລາວເຮົາ ທີ່ໄດ້ເຄີຍສືບທອດປະຕິບັດກັນມາ ຊຶ່ງຮັກສາໄດ້ຮີດຄອງປະເພນີອັນດີງາມທີ່ບັນພະບູລຸດໄດ້ສ້າງໄວ້ ໃຫ້ຢູ່ຄູ່ກັບຄົນລາວ ໃຫ້ຈະເລີນຮຸ່ງເຮືອງທາງດ້ານວັດທະນະທໍາ, ຮີດ 12 ຄອງ 14 ຂອງພະພຸດທະສາສະໜາ ສະນັ້ນ ບໍ່ວ່າພິທີກໍາໃດໆທາງສາສະໜາກໍຕ້ອງໄດ້ມີການກະກຽມພາບູຊາ ດອກໄມ້ ທູບທຽນ ແລະ ເຄື່ອງໄຫວ້ບູຊາອື່ນໆເຂົ້າໃນພິທີທີ່ສໍາຄັນນັ້ນໆ.

ທ່ານ ນາງ ຂາວພອນ ໂພທິຈັກ ເຈົ້າຂອງຮ້ານຂາຍເຄື່ອງບູຊາ ຢູ່ບ້ານພະໄຊ ເມືອງສີສັດຕະນາກ ນະຄອນຫຼວງວຽງຈັນ ໄດ້ໃຫ້ສໍາພາດຕໍ່ນັກຂ່າວ ໜັງສືພິມປະຊາຊົນໃນວັນທີ 14 ເມສາ ນີ້ວ່າ: ໃນໂອກາດປີໃໝ່ລາວ ພ.ສ 2567 ໃນທຸກໆປີ ຕົນໄດ້ຈະນໍາເອົາປະເພດເຄື່ອງບູຊາ ມາຈໍາໜ່າຍໃນບຸນປີໃໝ່ລາວ ໂດຍປົກກະຕິກໍຂາຍໃນທຸກວັນສິນວັນພະເປັນປະຈໍາ ຊຶ່ງຂາຍມາໄດ້ປະມານ 5 ຫາ 6 ປີແລ້ວ. ແຕ່ຖ້າຮອດບຸນປີໃໝ່ຕົນເອງໄດ້ນໍາເອົາເຄື່ອງບູຊາມາຂາຍໃນຈໍານວນທີ່ຫຼາຍຂຶ້ນ ປະກອບມີ ຂັນໝາກເບັງເກົ້າກາບ, ຫ້າກາບ ແລະ ສາມກາບ; ດອກດາວເຮືອງ, ທຽນເຜີ້ງແຕ່ງເປັນຂັນຫ້າ ຂັນແປດ, ຄໍາໝາກ-ກອກຢາ, ຮັບແຕ່ງນໍ້າສົງພະ ພ້ອມນີ້ ກໍມີໝາກໄມ້ທີ່ເປັນມົງຄຸນໃຊ້ສໍາລັັບບູຊາເປັນຕົ້ນແມ່ນໝາກຮຸ່ງສຸກ, ໝາກກ້ວຍ, ໝາກມັງກອນ ແລະ ໝາກໄມ້ຊະນິດອື່ນໆ ເພື່ອໃຫ້ລູກຄ້າສະດວກສະບາຍ ເຂົ້າຮ້ານແລ້ວຄົບທຸກຢ່າງໃນເລື່ອງເຄື່ອງບູຊາ ພ້ອມທັງບໍລິການສົ່ງໃຫ້ລູກຄ້າປະຈໍາຕື່ມອີກ.

ສໍາລັບເຄື່ອງບູຊາທີ່ໄດ້ຂາຍດີກ່ອນໝູ່ໃນໄລຍະປີໃໝ່ແມ່ນຂັນໝາກເບັງເກົ້າກາບ ລາຄາຂາຍ ໜຶ່ງຄູ່ 25.000 ກີບ ໄດ້ຂາຍຫຼາຍກວ່າ 10 ຄຸ່ຕໍ່ມື້; ຂັນໝາກເບັງ 5 ກາບ ໜຶ່ງຄູ່ 15.000 ກີບ ໄດ້ຂາຍປະມານ 25 ຄູ່ຕໍ່່ມື້ ແລະ ຄູ່ນ້ອຍສາມກາບ ໜຶ່ງຄູ່ 5.000 ກີບ ໄດ້ຂາຍຫຼາຍກວ່າ 30 ຄູ່ ຕໍ່ມື້. ລາຄາຂາຍກໍຂາຍຕາມລາຄາຂອງຕະຫຼາດ ລາຄາບໍ່ແພງ ສະນັ້ນ ຈຶ່ງເຮັດໃຫ້ມີລູກຄ້າທີ່ເຄີຍມາຊຶ້ແລ້ວ ກັບມາຊຶ້ນໍາຕື່ມອີກ.

ທ່ານໃຫ້ຮູ້ຕື່ມອີກວ່າ: ສໍາລັບການຈໍາໜ່າຍເຄື່ອງບູຊາໃນປີໃໝ່ລາວປີນີ້ ຮູ້ສຶກວ່າມີບັນຍາກາດຄຶກຄື້ນ ແລະ ໄດ້ຂາຍດີມີລູກຄ້າມາຊຶ້ນໍາຫຼາຍ. ຂ່າວ-ພາບ: ຍຸພິນທອງ