ໂດຍ: ວັນເພັງ

ທ່ານນາງ ນິດຕະຍາ ບຸດປະເສີດ ປະທານບ້ານທ່ອງທ່ຽວວັດທະນະທຳ ເມືອງນາຊາຍທອງ ນະຄອນຫຼວງວຽງຈັນ (ນວ) ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນ ໃນໂອກາດເຂົ້າຮ່ວມພິທີແຫ່ພະພຸດທະຮູບຄູ່ບ້ານຄູ່ເມືອງ ຢູ່ເຂດຄຸ້ມເມືອງເກົ່າວັດຈັນ ເມືອງຈັນທະບູລີ (ນວ) ໃນເທດສະການບຸນປີໃໝ່ລາວ ພ.ສ 2567 ໃນວັນທີ 13 ເມສາ ຜ່ານມາວ່າ: ຕົນເອງມີຄວາມຮູ້ສຶກພາກພູມໃຈ ແລະ ດີໃຈທີ່ສຸດ ທີ່ໄດ້ເຂົ້າຮ່ວມໃນຂະບວນແຫ່ພະພຸດທະຮູບທີ່ເປັນພະມິ່ງເມືອງຂອງຊາວ ນວ ໃນໂອກາດບຸນປີໃໝ່ລາວ ພ.ສ 2567.

ໃນນາມທີ່ເປັນເຈົ້າຂອງສະຖານທີ່ທ່ອງທ່ຽວທາງວັດທະນະທໍາຂອງເມືອງດັ່ງກ່າວ ຊຶ່ງໄດ້ບົ່ງບອກວ່າວັດທະນະທຳຂອງເມືອງ ສາມາດຮັກສາໄດ້ຮີດຄອງປະເພນີອັນດີງາມຂອງຊາດໄວ້ ຊຶ່ງເປັນເອກະລັກຄວາມເອກອ້າງທະນົງໃຈໃຫ້ແກ່ຊາວໂລກໄດ້ຮັບຮູ້ວ່າປີໃໝ່ລາວ ເປັນໜຶ່ງໃນງານບຸນເພື່ອເປັນການຮັກສາເອກະລັກວັດທະນະທຳຂອງຊາດລາວເຮົາ ຊຶ່ງໃນນັ້ນສະຖານທີ່ທ່ອງທ່ຽວທາງວັດທະນະທຳ ເມືອງນາຊາຍທອງ ກໍມີຮູບແບບການທ່ອງທ່ຽວຫຼາຍຮູບແບບເພື່ອຄວາມຍືນຍົງ ພ້ອມທັງຮັກສາສະພາບແວດລ້ອມ, ຮັກສາວັດທະນະທຳໄປຄຽງຄູ່ກັນ.

ໃນໂອກາດນີ້, ທ່ານນາງ ນິດຕະຍາ ບຸດປະເສີດ ຍັງໄດ້ຝາກເຖິງປວງຊົນລາວ ຕະຫຼອດຮອດນັກທ່ອງທ່ຽວທັງພາຍໃນ ແລະ ຕ່າງປະເທດໃນໄລຍະການທ່ຽວຫຼິ້ນປີໃໝ່ນີ້ ໃຫ້ພ້ອມກັນອະນຸລັກ ຮັກສາວັດທະນະທຳອັນດີງາມຂອງຊາດ ໂດຍໃຫ້ຄຳນຶງເຖິງຄວາມປອດໄພດ້ານຕ່າງໆ ສິ່ງສຳຄັນຂໍໃຫ້ທ່ຽວແບບຍືນຍົງ, ຮັກສາສິ່ງແວດລ້ອມ ໂດຍເປັນມິດຕໍ່ສະພາບແວດລ້ອມ, ເປັນມິດຕໍ່ທຳມະຊາດ ແລະ ວັດທະນະທຳອັນດີງາມຂອງຊາດລາວເຮົາໃຫ້ຄົງຢູ່ຕະຫຼອດໄປ.