ໂດຍ: ພູວັນ

ບັນຍາກາດທີ່ນະຄອນຫຼວງວຽງຈັນ ໄດ້ມີມວນຊົນທີ່ມາຈາກທຸກສາລະທິດ ໄດ້ພ້ອມພາກັນກະກຽມແຕ່ງນໍ້າອົບນໍ້າຫອມໄປຫົດສົງພະພຸດທະຮູບຕາມວັດວາອາຮາມຕ່າງໆ ທີ່ເຄີຍປະຕິບັດສືບທອດກັນມາແຕ່ບູຮານນະການ ຕາມຮີດຄອງປະເພນີດ້ວຍຄວາມເບີກບານມ່ວນຊື່ນ.

ເນື່ອງໃນໂອກາດບຸນປີໃໝ່ລາວ ພ.ສ 2567 (ຄ.ສ 2024) ປີນີ້ແມ່ນມີບັນຍາກາດຄຶກຄື້ນເບີກບານມວນຊື່ນຂອງມວນຊົນເປັນຢ່າງດີ, ໃນນັ້ນບັນຍາກາດຕາມສະຖານທີ່ວັດວາອາຮາມຫຼາຍແຫ່ງ ກໍເຕັມໄປດ້ວຍມວນຊົນມາຈາກທຸກສາລະທິດທີ່ໄດ້ພາກັນນຳເອົານໍ້າອົບນໍ້າຫອມ ນໍ້າທີ່ສະອາດໄປຫົດສົງຄູບາອາຈານ, ພໍ່ແມ່, ຜູ້ມີບຸນຄຸນ ແລະ ກະກຽມນໍ້າຫອມໄປຫົດສົງພະພຸດທະຮູບຕາມຮີດ 12 ຄອງ 14 ທີ່ເຄີຍປະຕິບັດກັນມາ ທັງເປັນການຂໍພອນ ໃນໂອກາດບຸນປີໃໝ່ລາວ ພ.ສ 2567 ໃຫ້ມີແຕ່ຄວາມສຸກໂຊກດີ, ມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວຕະຫຼອດໄປ.

ສຳລັບໃນວັນທີ 14 ເມສານີ້, ບັນຍາກາດທີ່ວັດປ່າສັນຕິສຸກ ບ້ານດອນໜູນ ເມືອງໄຊທານີ ນະຄອນ ຫຼວງວຽງຈັນ ເຕັມໄປດ້ວຍພໍ່ແມ່ປະຊາຊົນຊົນພາຍໃນບ້ານ ແລະ ຕ່າງບ້ານພາກັນເຂົ້າຫົດສົງພະພຸດທະຮູບຢ່າງຫຼວງຫຼາຍ ຊຶ່ງກໍມີບັນຍາກາດທີ່ເຕັມໄປດ້ວຍຄວາມຄຶກຄື້ນເບີກບານມ່ວນຊື່ນ, ນອກຈາກນັ້ນທາງເຈົ້າອະທິການວັດແຕ່ລະວັດຍັງໄດ້ຈັດໃຫ້ມີການຕັກບາດສະຫວັນຄົບອາຍຸ, ການສ່ຽງຊີ, ຜູກຂໍ້ຕໍ່ແຂນ ແລະ ອື່ນໆໃຫ້ມວນຊົນໄດ້ເຮັດບຸນເຮັດທານຕາມຮີດຄອງປະເພນີລາວ ເພື່ອອະນຸລັກຮັກສາວັດທະນະທຳອັນງົດງາມຂອງລາວໃຫ້ມີຄວາມຍືນຍົງຕະຫຼອດໄປ.