ເມືອງຫ້ວຍຊາຍ ແຂວງບໍ່ແກ້ວ ຮ່ວມກັບ ບໍລິສັດດອນປຸ່ງພັດທະນາການຄ້າ ແລະ ການທ່ອງທ່ຽວຈໍາກັດ ຈັດງານສະເຫຼີມສະຫຼອງປີໃໝ່ລາວ ພສ 2567 ທີ່ດອນປຸ່ງກາງແມ່ນໍ້າຂອງ ໃນວັນທີ 13 ເມສາຜ່ານມາ, ພາຍໃນງານມີຫຼາຍກິດຈະກໍາເປັນຕົ້້ນ ການສະແດງສິລະປະວັນນະຄະດີ ຂອງບັນດາບ້ານເທສະບານເມືອງຫ້ວຍຊາຍ, ການແຂ່ງຂັນກິລາ (ບານເຕະຫາດຊາຍ, ກິດຈະກໍາດຶງເຊືອກ ແລະ ກິດຈະກໍາຂຶ້ນເສົານໍ້າມັນ), ກິດຈະກຳດັ່ງກ່າວແມ່ນໄດ້ເລີ່ມແຂ່ງຂັນມາແຕ່ວັນທີ 9 ເມສາ 2024. ພ້ອມນີ້ຍັງມີ ກິດຈະກຳ ການແຂ່ງຂັນຕົບພະທາດຊາຍຂອງບັນດາບ້ານ, ຊຶ່ງໄດ້ຈັດຕັ້ງປະຕິບັດກັນມາໃນທຸກໆປີທີ່ເຊື່ອກັນວ່າເປັນການສົມມາຄາລະວາ, ແມ່ນໍ້າຄົງຄາ ພະຍານາກ, ເຈົ້າທີ່ເຈົ້າທາງ ເພື່ອເປັນການຂໍພອນໃຫ້ຊາວເມືອງຢູ່ເຢັນເປັນສຸກ ທັງເປັນການຂໍພອນໃຫ້ຕົນເອງມີສຸຂະພາບແຂງແຮງ, ມີໂຊກ ມີໄຊຕະຫຼອດປີໃໝ່. ນອກຈາກນີ້, ຍັງມີການວາງສະແດງຂາຍສິນຄ້າ, ບໍລິການເຄື່ອງດື່ມ ແລະ ອາຫານເປັນຈໍານວນຫຼວງຫຼາຍທີ່ສ້າງຄວາມສະດວກສະບາຍ ໃຫ້ມວນຊົນ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ຮ່ວມມ່ວນຊື່ນ.

ເຂົ້າຮ່ວມງານຄັ້ງນີ້, ມີທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ພ້ອມດ້ວຍການນໍາຂອງແຂວງ, ເມືອງ, ແຂກຮັບເຊີນຈາກເມືອງຊຽງຂອງ, ເມືອງວຽງແກ່ນ ແຂວງຊຽງລາຍ, ມີນັກທ່ອງທ່ຽວທັງພາຍໃນ, ຕ່າງປະເທດ ແລະ ມວນຊົນຊາວແຂວງບໍ່ແກ້ວເຂົ້າຮ່ວມເປັນຈຳນວນຫຼວງຫຼາຍ.

(ຂ່າວ: ສາຍສະໝອນ)