ນາງ ໄຕຣຸຍ ຫົວໜ້າຈຸພະນັກງານປະຈໍາ ຂະບວນລົດໄຟ ກ່າວວ່າ: ຂ້າພະເຈົ້າເປັນໜຶ່ງໃນພະນັກງານຂອງກຸ່ມບໍລິສັດທາງລົດໄຟແຫ່ງຊາດຈີນສາຂາຄຸນໝິງທີ່ປະຈໍາການຢູ່ຕາມທາງລົດໄຟລາວ-ຈີນ, ປັດຈຸບັນນີ້ ເປັນຫົວໜ້າຄວບຜູ້ຊີ້ນໍາການບໍລິຫານຂອງຂະບວນລົດໄຟໂດຍສານສາກົນຖ້ຽວ D88/87. ໃນໄລຍະບຸນກຸດຈີນປີນີ້, ຍັງມີພະນັກງານລົດໄຟຈີນເກືອບ 600 ຄົນໄດ້ປະຈຳການຢູ່ຕາມທາງລົດໄຟລາວ-ຈີນ ຄືກັນກັບຂ້າພະເຈົ້າ.
ປີນີ້ເປັນປີທີ 16 ທີ່ຂ້າພະເຈົ້າໄດ້ປະຈໍາການໃນການຂົນສົ່ງຜູ້ໂດຍສານໃນຍາມບຸນກຸດຈີນ, ແຕ່ວ່າປີນີ້ມີຄວາມໝາຍພິເສດຫຼາຍສໍາລັບຂ້າພະເຈົ້າ! ເພາະວ່າຂ້າພະເຈົ້າໄດ້ບັນລຸຄວາມຝັນຂອງຕົນ ທີ່ປະຈໍາການຢູ່ຕາມຂະບວນລົດໄຟ “ການຂົນສົ່ງຜູ້ໂດຍສານຂ້າມຊາດໃນຍາມບຸນກຸດຈີນ”.
ໃນເດືອນສິງຫາ 2021, ຂ້າພະເຈົ້າພ້ອມດ້ວຍເພື່ອນຮ່ວມງານ 300 ກວ່າຄົນ ໄດ້ຕັດສິນໃຈວ່າ ຈະເດີນທາງໄປປະເທດລາວ. ໃນເບື້ອງຕົ້ນ, ຂ້າພະເຈົ້າທີ່ຮັບຜິດຊອບການຝຶກອົບຮົມພະນັກງານຂົນສົ່ງຜູ້ໂດຍສານ ຕອນພາຍໃນປະເທດລາວນັ້ນ ບໍ່ພຽງແຕ່ຮ່ວມຊີວິດກັບນັກສໍາມະນາກອນລາວ ຫຼາຍຮ້ອຍຄົນເທົ່ານັ້ນ, ຍັງຕ້ອງການພົວພັນກັບຜູ້ໂດຍສານຈໍານວນຫຼວງຫຼາຍ.
ໃນວັນທີ 3 ທັນວາ 2021, ທາງລົດໄຟລາວ-ຈີນ ໄດ້ເປີດນໍາໃຊ້ຢ່າງເປັນທາງການ. ໃນມື້ນັ້ນ, ຂ້າພະເຈົ້າຮູ້ສຶກເປັນກຽດທີ່ສຸດໃນຊົ່ວຊີວິດຂອງຕົນພາຍໃຕ້ການເປັນສັກຂີພິຍານຂອງຜູ້ນໍາສອງປະເທດລາວ-ຈີນ, ໃນຖານະເປັນຫົວໜ້າຈຸພະນັກງານຂະບວນລົດໄຟ. ໃນວັນທີ 13 ເມສາ 2023, ຂະບວນລົດໄຟໂດຍສານສາກົນໄດ້ເປີດນໍາໃຊ້ຢ່າງເປັນທາງການ, ຂ້າພະເຈົ້າໄດ້ເດີນທາງໄປ-ກັບລະຫວ່າງສອງປະເທດລາວ-ຈີນ ໂດຍເປັນຫົວໜ້າຈຸພະນັກງານ “ຂະບວນລ້ານຊ້າງ” ທີ່ເປັນຂະບວນລົດໄຟໂດຍສານຖ້ຽວທໍາອິດຕາມທາງລົດໄຟລາວ-ຈີນ. ເພື່ອບໍລິການຜູ້ໂດຍສານສາກົນໄດ້ດີກວ່າເກົ່າ, ຂ້າພະເຈົ້າພ້ອມກັບເພື່ອນຮ່ວມງານໄດ້ປັບປຸງວຽກງານຕ່າງໆໃຫ້ດີຂຶ້ນ ເພື່ອສອດຄ່ອງກັບຮີດຄອງປະເພນີຂອງລາວ ແລະ ຄວາມຕ້ອງການຂອງຜູ້ໂດຍສານທີ່ມາຈາກຕ່າງປະເທດ, ເຊັ່ນ: ປັບປຸງທາງເຂົ້າ-ອອກ ສະຖານີຂອງຜູ້ໂດຍສານໃຫ້ດີຂຶ້ນ, ປັບປຸງປ້າຍນຳທາງຕ່າງໆໃນສະຖານີໃຫ້ສົມບູນຂຶ້ນຕື່ມ, ຕິດຕັ້ງປ້າຍນຳທາງທີ່ມີພາສາຈີນ, ພາສາລາວ ແລະ ພາສາອັງກິດຢູ່ຫ້ອງຂາຍປີ້, ທາງເຂົ້າບ່ອນກວດປີ້ ແລະ ຫ້ອງລໍຖ້າລົດ, ແຈ້ງການຂໍ້ກໍານົດ ສໍາລັບຜູ້ໂດຍສານສາກົນກ່ຽວກັບການຂີ່ລົດ ແລະ ການເດີນທາງດ້ວຍຄວາມປອດໄພ ແລະ ຊ່ວຍຜູ້ໂດຍສານສາກົນໃນດ້ານການເຂົ້າ-ອອກເມືອງເປັນຕົ້ນ.
ເຖິງແມ່ນວ່າປະເທດລາວບໍ່ໄດ້ກຳນົດໃຫ້ມີການຂົນສົ່ງຜູ້ໂດຍສານໃນຍາມບຸນກຸດຈີນ ກໍຕາມ, ແຕ່ຜູ້ໂດຍສານກໍໄດ້ເພີ່ມຂຶ້ນຢ່າງຫຼວງຫຼາຍ ພາຍຫຼັງຈີນເລີ່ມຕົ້ນຂົນສົ່ງຜູ້ໂດຍສານໃນຍາມບຸນກຸດຈີນ, ໂດຍສະເພາະແມ່ນໄດ້ເກີດມີປະກົດການຊື້ປີ້ຍາກໃນຍາມບຸນກຸດຈີນ. ຍ້ອນແນວນີ້, ນັບແຕ່ມື້ທໍາອິດຂອງການຂົນສົ່ງຜູ້ໂດຍສານໃນຍາມບຸນກຸດຈີນ ກໍຄືວັນທີ 26 ມັງກອນ 2024 ເປັນຕົ້ນມາ, ບ່ອນນັ່ງຂອງຂະບວນລົດໄຟໂດຍສານສາກົນຕາມທາງລົດໄຟລາວ-ຈີນ ໄດ້ເພີ່ມຈາກ 300 ບ່ອນມາເປັນ 350 ບ່ອນ. ພ້ອມດຽວກັນນັ້ນ, ຍັງໄດ້ເພີ່ມທະວີການປະສານສົມທົບກັບອົງການຈັດຕັ້ງທາງລົດໄຟທັງພາຍໃນ ແລະ ຕ່າງປະເທດ, ມີການວາງແຜນລ່ວງໜ້າ ແລະ ໄດ້ປະຕິບັດມາດຕະການຫຼາຍຢ່າງ, ປັບປຸງມາດຕະການດ້ານການບໍລິການໃຫ້ສົມບູນຢ່າງທັນການ, ວິໄຈກົດເກນການປ່ຽນແປງຂອງກະແສຜູ້ໂດຍສານຢ່າງຖືກຕ້ອງແມ໋ນຢຳ ແລະ ເພີ່ມຄວາມສາມາດ ໃນການຂົນສົ່ງໃຫ້ຫຼາຍກວ່າເກົ່າ. ສໍາລັບຜູ້ໂດຍສານພິເສດ, ເຊັ່ນ: ຜູ້ເຖົ້າ, ເດັກນ້ອຍ, ຜູ້ເປັນພະຍາດ, ຄົນພິການ, ຜູ້ຖືພາເປັນຕົ້ນ, ໄດ້ສະເໜີໃຫ້ມີການບໍລິການພິເສດ, ເພື່ອຮັບປະກັນການຂົນສົ່ງຜູ້ໂດຍສານໃນຍາມບຸນກຸດຈີນ 2024 ດໍາເນີນໄປຢ່າງເປັນລະບຽບຮຽບຮ້ອຍ, ໝັ້ນຄົງ ແລະ ປອດໄພ.
ຂ່າວ: Yang Yongquan
