ທ່ານ ພັນຕີ ອານົງ ມິ່ງຄໍາ ຮອງຫົວໜ້າຫ້ອງຕໍາຫຼວດ ຜູ້ຊີ້ນຳວຽກງານຈະລາຈອນ ນະຄອນ-ຫຼວງພະບາງ ແຂວງຫຼວງພະບາງໄດ້ໃຫ້ສຳພາດໃນວັນທີ 22 ເມສາຜ່ານມາວ່າ: ໃນໄລຍະບຸນປີໃໝ່ລາວມີອຸບັດເຫດເກີດຂຶ້ນທັງໝົດ 20 ລາຍ, ມີພາຫະນະເປ່ເພ 38 ຄັນ, ມີຜູ້ໄດ້ຮັບບາດເຈັບ 27 ຄົນ, ໃນນັ້ນບາດເຈັບເລັກນ້ອຍ 16 ຄົນ, ເຈັບສົມຄວນ 10 ຄົນ, ສາຫັດ 1 ຄົນ, ເສຍຊີວິດ 5 ຄົນ, ຍິງ 1 ຄົນ.
     ສາເຫດຂອງການເກີດອຸບັດເຫດສ່ວນໃຫຍ່ດຶ່ມສິ່ງມືນເມົາ, ແລ່ນລົດໄວ, ບໍ່ປ່ອຍສິດ, ແຊງບໍ່ຮັບປະກັນ, ແລ່ນບໍ່ແນບເສັ້ນ, ແລ່ນກິນທາງ ທຽບໃສ່ປີຜ່ານມາມີຕົວເລກເພີ່ມຂຶ້ນ. ຊຶ່ງໃນປີ 2023 ມີອຸບັດເຫດເກີດຂຶ້ນ 8 ລາຍ, ພາຫະນະເປ່ເພ 14 ຄັນ, ຄົນໄດ້ຮັບບາດເຈັບ 14 ຄົນ, ຄົນເສຍຊີວິດ 1 ຄົນ. 
    ໂອກາດນີ້, ທ່ານ ພັນຕີ ອານົງ ມິ່ງຄໍາ ໄດ້ຮຽກຮ້ອງໃຫ້ຜູ້ໃຊ້ລົດ-ໃຊ້ຖະໜົນ ສືບຕໍ່ປະຕິບັດກົດລະບຽບການສັນຈອນເພື່ອຫຼຸດຜ່ອນການເກີດອຸບັດເຫດອັນຈະນຳໄປສູ່ການສູນເສຍທາງດ້ານຊີວິດ ແລະ ຊັບສິນຂອງປະຊາຊົນບັນດາເຜົ່າ.   ຂ່າວ: ຫຼວງພະບາງ