ໃນວັນທີ 24 ເມສາຜ່ານມາ ທ່ານນາງ ສີພະຈັນ ນັນທະວົງສາ ຮອງປະທານສູນກາງແນວລາວສ້າງຊາດ (ສນຊ) ໄດ້ເຄື່ອນໄຫວຊຸກຍູ້ວຽກງານຢູ່ແຂວງອຸດົມໄຊ ຊຶ່ງໄດ້ເຮັດວຽກຮ່ວມກັບຄະນະນຳແນວລາວສ້າງຊາດແຂວງອຸດົມໄຊ ໂດຍມີທ່ານ ວັນນາ ແກ້ວສັນຕິ ປະທານແນວລາວສ້າງຊາດແຂວງ ມີບັນດາຄະນະກຳມະ ການແນວລາວສ້າງຊາດແຂວງເຂົ້າຮ່ວມ.

ການເຄື່ອນໄຫວຄັ້ງນີ້ ເພື່ອຕິດຕາມກວດກາຊຸກຍູ້ ການຈັດຕັ້ງປະຕິບັດແນວທາງ, ລັດຖະທຳມະນູນ, ກົດໝາຍ, ແຜນພັດທະນາເສດຖະກິດສັງຄົມແຫ່ງຊາດ ແລະ ເສີມຂະຫຍາຍສິດເປັນເຈົ້າຂອງປະຊາຊົນທີ່ຢູ່ແຂວງອຸດົມໄຊ ໃນໄລຍະຜ່ານມາວ່າມີການຈັດຕັ້ງປະຕິບັດຄືແນວໃດ, ດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີການແກ້ໄຂຄືແນວໃດ?.

ໂອກາດນີ້, ທ່ານ ວັນນາ ແກ້ວສັນຕິ ໄດ້ລາຍງານການຈັດຕັ້ງປະຕິບັດວຽກງານໃນໄລຍະຜ່ານມາ ເປັນຕົ້ນ ວຽກງານຕິດຕາມກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ, ວຽກງານຄົ້ນຄ້ວາຄຳຮ້ອງ ແລະ ຄຳສະເໜີຂອງພົນລະເມືອງ, ວຽກງານກວດກາອົງການອຳນາດລັດ ແລະ ເກັບກຳສະພາບຫາງສຽງສັງຄົມ, ວຽກງານເສີມຂະຫຍາຍສິດເປັນເຈົ້າຂອງປະຊາຊົນ ແລະ ອື່ນໆ, ນອກຈາກພົບປະໂອ້ລົມກັບຄະນະກຳມະການແນວລາວສ້າງຊາດແຂວງແລ້ວ ຍັງໄດ້ເຄື່ອນໄຫວເຮັດວຽກຮ່ວມກັບຄະນະນຳອົງການປົກຄອງເມືອງໄຊ ແຂວງອຸດົມໄຊຕື່ມອີກ. ຂ່າວ: ແສງອາທິດ