ທ່ານ ຈຽງ ຊາງຈີ ປະທານບໍລິສັດເຖິງເຟີຍ ການຄ້າ ແລະ ສົ່ງເສີມກະສິກຳຈຳກັດຜູ້ດຽວ ໄດ້ເປີດເຜີຍຕໍ່ສື່ມວນຊົນທ້ອງຖິ່ນ ເມື່ອວັນທີ 24 ເມສາຜ່ານມາວ່າ: ບໍລິສັດ ເຖິງເຟີຍ ການຄ້າ ແລະ ສົ່ງເສີມກະສິກຳ ຈຳກັດຜູ້ດຽວ ເລີ່ມປູກໝາກຖົ່ວ ຢູ່ ເມືອງຫຼວງນໍ້າທາມາແຕ່ ປີ 2020 ຊຶ່ງໃນປີທຳອິດ ແມ່ນບໍ່ໄດ້ຮັບຜົນຕາມລະດັບຄາດໝາຍທີ່ວາງໄວ້, ສາເຫດເນື່ອງຈາກສະພາບການລະບາດພະຍາດໂຄວິດ-19, ປີ 2022 ຖືກນໍ້າຖ້ວມ, ການເກັບກູ້ຈິ່ງບໍ່ໄດ້ຮັບຜົນ, ສຳລັບປີ 2023 ໄດ້ປູກໝາກຖົ່ວ 65 ເຮັກຕາ, ຜົນຜະລິດໄດ້ 500 ໂຕນ, ປີ 2024 ນີ້ທາງບໍລິສັດ ໄດ້ເຊົ່າ-ສໍາປະທານເນື້ອທີ່ນາຂອງປະຊາຊົນປູກໝາກຖົ່ວເຫຼືອງທັງໝົດ 327 ເຮັກຕາ, ມີ 10 ບ້ານ, ຄາດວ່າຜົນຜະລິດຈະໃຫ້ໄດ້ 3.300 ໂຕນ, ສະເລ່ຍ 10 ໂຕນ/ເຮັກຕາ, ການປູກແມ່ນເລີ່ມແຕ່ເດືອນມັງກອນ ຊຶ່ງມາຮອດປັດຈຸບັນເກັບກູ້ໝາກຖົ່ວເຫຼືອງໄດ້ແລ້ວປະມານ 30% ຄາດວ່າຈະໃຫ້ສຳເລັດໃນທ້າຍເດືອນ ພຶດສະພາ 2024.

ສໍາລັບແຜນການປີ 2025 ທາງບໍລິສັດຈະສືບຕໍ່ລົງທືນ ເຊົ່າເນື້ອທີ່ດິນປູກໝາກຖົ່ວເຫຼືອງໃຫ້ໄດ້ 400 ເຮັກຕາ, ນອກຈາກນີ້ ຍັງຈະສົ່ງເສີມໃຫ້ປະຊາຊົນມີສ່ວນຮ່ວມປູກ 100 ເຮັກຕາ.

ທ່ານ ຈຽງ ຊາງຈີ ຍັງໃຫ້ຮູ້ຕື່ວ່າ : ການສຳປະທານ ແລະ ການຂົນສົ່ງໝາກຖົ່ວເຫຼືອງໄລຍະຜ່ານມາມີຄວາມຫຍຸ້ງຍາກເປັນຕົ້ນແມ່ນ ທາງບໍລິສັດຂົນສົ່ງຕອບສະໜອງລົດບໍ່ພຽງພໍ, ບັນຫາລົດຕິດຢູ່ດ່ານເປັນເວລາຫຼາຍວັນ, ປະຊາຊົນບໍ່ເຂົ້າໃຈເລື່ອງຄ່າເຊົ່າເນື້ອທີ່ນາ, ທ່ານຍັງໄດ້ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງໃຫ້ຄວາມຮ່ວມມື, ໃຫ້ປະຊາຊົນຫັນມາຮຽນປູກ ແລະ ທາງບໍລິສັດເປັນຜູ້ໃຫ້ທຶນ ພ້ອມທັງເກັບຊື້ຜົນຜະລິດທັງໝົດ.

ຂ່າວ: ມຸນຕີ