ກອງປະຊຸມສຳມະນາກ່ຽວກັບການຍົກສູງຄວາມສາມາດວຽກງານການດຳເນີນຄະດີຕາມຂະບວນການຍຸຕິທຳ ແລະ ການແກ້ໄຂຄຳຮ້ອງທຸກ ໄດ້ເປີດຂຶ້ນໃນວັນທີ 6-7 ພຶດສະພາ ນີ້ທີ່ເມືອງວັງວຽງ ແຂວງວຽງຈັນ ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໂດຍມີທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ບັນດາທ່ານຮອງປະທານກຳມາທິການຂອງສະພາແຫ່ງຊາດ(ສພຊ),ຮອງຫົວໜ້າອົງການໄອຍະການປະຊາຊົນສູງສຸດ, ຮອງປະທານສານປະຊາຊົນສູງສຸດ, ຜູ້ຕາງໜ້າກະຊວງປ້ອງກັນຄວາມສະຫງົບ (ກົມສືບສວນ-ສອບສວນ),ຜູ້ຕາງໜ້າກະຊວງຍຸຕິທຳ (ກົມຄຸ້ມຄອງການປະຕິບັດຄຳຕັດສິນຂອງສານ),ບັນດາທ່ານປະທານ, ຮອງປະທານສະພາປະຊາຊົນຂັ້ນແຂວງ, ຜູ້ຊີ້ນຳວຽກງານຍຸຕິທຳ, ສະມາຊິກສະພາແຫ່ງຊາດ (ສສຊ) ສັງກັດກຳມາທິການຍຸຕິທຳ ແລະສະມາຊິກສະພາປະຊາຊົນຂັ້ນແຂວງ (ສສຂ) ສັງກັດຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ໃນຂອບເຂດທົ່ວປະເທດພ້ອມດ້ວຍພະນັກງານຈາກພາກສ່ວນກ່ຽວຂ້ອງເຂົ້າຮ່ວມຢ່າງຫຼວງຫຼາຍ.

ກອງປະຊຸມຄັ້ງນີ້ມີຄວາມສຳຄັນຫຼາຍ ເພາະເປັນໂອກາດໃຫ້ຜູ້ເຂົ້າຮ່ວມກອງປະຊຸມໄດ້ມີຄວາມຮັບຮູ້ ແລະ ຄວາມເຂົ້າໃຈຢ່າງເລິກເຊິ່ງ ກ່ຽວກັບຂະບວນການດຳເນີນຂະບວນຍຸຕິທຳ, ການແກ້ໄຂຄຳຮ້ອງທຸກຕາມຂັ້ນຕອນຕ່າງໆຢ່າງລະອຽດ ເພື່ອເຮັດໃຫ້ການຈັດຕັ້ງປະຕິບັດວຽກງານແກ້ໄຂຄຳຮ້ອງທຸກ ມີຄວາມເປັນເອກະພາບກັນ, ມີຄວາມຖືກຕ້ອງ ແລະ ສອດຄ່ອງກັບກົດໝາຍ ແລະ ຄວາມເປັນຈິງ ສາມາດນຳໄປຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ.

ທ່ານ ນາງ ສູນທອນ ໄຊຍະຈັກ ໄດ້ມີຄຳເຫັນກ່າວເປີດ ໂດຍໄດ້ເນັ້ນໜັກວ່າ: ກອງປະຊຸມຄັ້ງນີ້ມີຫຼາຍເນື້ອໃນທີ່ມີຄວາມໝາຍສຳຄັນ ເພາະແມ່ນການຈັດຕັ້ງປະຕິບັດຫຼັກການຂອງຂະບວນການດໍາເນີນຄະດີ ຊຶ່ງເປັນການຜັນຂະຫຍາຍມະຕິຂອງກົມການເມືອງສູນກາງພັກ ສະບັບເລກທີ 112/ກມສພ, ລົງວັນທີ 2 ມິຖຸນາ 2020 ວ່າດ້ວຍການຍົກສູງຄຸນນະພາບໃນການດໍາເນີນຄະດີຕາມຂະບວນການຍຸຕິທໍາ ຕາມກົດໝາຍກຳນົດໄວ້ ຊຶ່ງຄະນະປະຈຳສະພາແຫ່ງຊາດ ຈະໄດ້ລາຍງານຕໍ່ກອງປະຊຸມຄົບຄະນະຂອງຄະນະບໍລິຫານງານສູນກາງພັກໃນຕໍ່ໜ້ານີ້ແນໃສ່ເຮັດໃຫ້ການດໍາເນີນຄະດີດໍາເນີນໄປໃນທິດທາງດຽວກັນ ບົນພື້ນຖານທິດຊີ້ນໍາຂອງພັກ, ລະບຽບກົດໝາຍຂອງລັດ ຮັບປະກັນໃຫ້ການດໍາເນີນຄະດີມີຄວາມຖືກຕ້ອງ, ໂປ່ງໃສ, ວ່ອງໄວ ແລະ ນໍາເອົາຜົນປະໂຫຍດມາສູ່ປະຊາຊົນຢ່າງແທ້ຈິງ.

ໃນກອງປະຊຸມ ຜູ້ແທນເຂົ້າຮ່ວມໄດ້ຮັບຟັງການນຳສະເໜີບົດຮຽນກ່ຽວກັບສະພາບລວມການດຳເນີນຄະດີຂອງ ສປປລາວ; ບົດຮຽນໃນການປະຕິບັດຄຳຕັດສິນຂອງສານ, ການພິຈາລະນາ ແລະ ແກ້ໄຂຄຳສະເໜີ ແລະ ຄຳຮ້ອງຂໍຄວາມເປັນທຳ ທີ່ພົວພັນກັບການປະຕິບັດຄຳຕັດສິນຂອງສານ; ບົດຮຽນໃນການດຳເນີນຄະດີຂອງອົງການສືບສວນ-ສອບສວນ, ການດຳເນີນຄະດີແພ່ງຂອງສານປະຊາຊົນ ແລະ ການດຳເນີນຄະດີອາຍາຂອງອົງການໄອຍະການປະຊາຊົນ; ບົດຮຽນໃນການຈັດຕັ້ງປະຕິບັດວຽກການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ຂອງກຳມາທິການຍຸຕິທຳສະພາແຫ່ງຊາດ.

ບັນດາຜູ້ເຂົ້າຮ່ວມໃນກອງປະຊຸມ ກໍໄດ້ພ້ອມກັນເອົາໃຈໃສ່ຍົກສູງຄວາມຮັບຜິດຊອບການເມືອງຂອງຕົນ ໃນການຄົ້ນຄວ້າ ແລະ ແລກປ່ຽນຄວາມຄິດເຫັນຢ່າງກົງໄປກົງມາ, ດ້ວຍເຫດດ້ວຍຜົນ ໂດຍສະເພາະແມ່ນຈຸດທີ່ຍັງບໍ່ທັນເປັນເອກະພາບ ແລະ ຈະແຈ້ງ ຫຼື ສາເຫດທີ່ພາໃຫ້ການດຳເນີນຄະດີຕາມຂະບວນການຍຸຕິທຳມີຄວາມຊັກຊ້າ, ມີຄວາມຫຍຸ້ງຍາກ ແລະ ໄດ້ມີການສະເໜີບັນດາທິດທາງໃນການແກ້ໄຂບັນຫາທີ່ຍັງຄົງຄ້າງ, ສະເໜີໃຫ້ບັນດາພາກສ່ວນກ່ຽວຂ້ອງມີການປະສານສົມທົບກັນຢ່າງແໜ້ນແຟ້ນ, ຊອກຫາບັນດາມາດຕະການທີ່ສອດຄ່ອງ ເພື່ອຮັບປະກັນຄວາມຖືກຕ້ອງ, ຄົບຖ້ວນ, ຮອບດ້ານ ແລະ ພາວະວິໄສ ໃນຂະບວນການຍຸຕິທຳ ທັງໃຫ້ຖືກຕ້ອງຕາມກົດໝາຍ ແລະ ທັງສອດຄ່ອງກັບຄວາມເປັນຈິງ.

(ຂ່າວ-ພາບ: ນາງ ປາກາລັກ ພົມມີໄຊສພຊ)