ໃນວັນທີ 7 ພືດສະພາ 2024 ນີ້, ຢູ່ທີ່ຫ້ອງການແຮງງານ ແລະ ສະຫວັດດີການ-ສັງຄົມແຂວງຫຼວງນໍ້າທາ ໄດ້ຈັດພິທີມອບ-ຮັບ ເຄື່ອງອຸປະກອນເພື່ອເປັນທຶນປະກອບອາຊິບ ໃຫ້ໄວໜຸ່ມຜູ້ຫ້າວຫັນທີ່ສໍາເລັດການຝຶກອົບຮົມວິຊາຊິບໄລຍະສັ້ນພາຍໃຕ້ການຮ່ວມມື ລະຫວ່າງ ກະຊວງແຮງງານ ແລະ ສະຫວັດດີການສັງຄົມ ແລະ ໂຄງການຫຼຸດຜ່ອນຄວາມສ່ຽງຈາກການຄ້າມະນຸດ, ອົງການວິນຣ໋ອກ ສາກົນ ໂດຍຜ່ານ ພະແນກແຮງງານ ແລະ ສະຫວັດດີການສັງຄົມ ແຂວງຫຼວງນໍ້າທາ ໂດຍມີທ່ານ ຄໍາເຈື້ອ ທອງວັນໄຊ ກໍາມະການພັກເມືອງ ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ພ້ອມດ້ວຍຄະນະຮັບຜິດຊອບຂັ້ນເມືອງເຂົ້າຮ່ວມ.

ໃນພິທີທ່ານ ນາງ ນີລາ ດວນສຸວັນ ຕາງໜ້າອົງການວິນຣ໋ອກສາກົນປະຈໍາ ສປປ ລາວ ໄດ້ລາຍງານຄວາມຄືບໜ້າການຈັດຕັ້ງປະຕິບັດ ກິດຈະກໍາ ຈຸດປະສົງສະເພາະທີ່ສອງໂຄງການຫຼຸດຜ່ອນຄວາມສ່ຽງຈາກການຄ້າມະນຸດຮ່ວມກັບພະແນກ ແລະ ຫ້ອງການແຮງງານ ແລະ ສະຫວັດດີການສັງຄົມເມືອງ,ຜ່ານກົດລະບຽບການມອບ-ຮັບອຸປະກອນທືນຜູ້ທີ່ຮັບອຸປະກອນທືນຕ້ອງປະຕິບັດຕາມກົດລະບຽບຄື: ນໍາໃຊ້ອຸປະກອນທຶນໃຫ້ຖືກຕ້ອງກັບຈຸດປະສົງ, ປົກປັກຮັກສາອຸປະກອນເຄື່ອງໃຫ້ຢູ່ໃນສະພາບທີ່ໃຊ້ງານໄດ້ ຫຼື ໃຫ້ພ້ອມບໍລິການ, ຖ້າເຄື່ອງເປ່ເພຕ້ອງຮັບຜິດຊອບສ້ອມແປງ ຫຼື ຊື້ມາໃສ່ໃໝ່ເພື່ອໃຫ້ຕົນເອງມີເຄື່ອງມືຮັບໃຊ້, ໃຫ້ຄວາມຮ່ວມມືກັບຫ້ອງການແຮງງານ ແລະ ສະຫວັດດີການສັງຄົມເມືອງ ແລະ ໂຄງການເພື່ອຕິດຕາມການນຳໃຊ້ ແລະ ລາຍງານຄວາມຄືບໜ້າຂອງການນໍາໃຊ້ອຸປະກອນປະກອບອາຊີບ, ຫ້າມບໍ່ໃຫ້ຂາຍ, ແລກປ່ຽນ ຫຼື ເອົາອຸປະກອນທີ່ລະບຸໄວ້ຕາມລາຍການໃຫ້ຄົນອື່ນບໍ່ວ່າໃນກໍລະນີໃດກໍ່ຕາມ, ໄວໜຸ່ມທີ່ສໍາເລັດການຝຶກວິຊາຊິບປະກອບມີ 5 ຄົນ, ຍິງ 2 ຄົນ, ມາຈາກ 3 ບ້ານຄື: ບ້ານຫຼັງຜາ, ບ້ານຈະເລີນໄຊ ແລະ ບ້ານປຸ່ງຊ່າຍ, ໃນນີ້ມີໄວໜຸ່ມຕັດຫຍິບ 2 ຄົນ, ສ້ອມແປງລົດຈັກ 2 ຄົນ ແລະ ລົດໃຫຍ່ 1 ຄົນ, ລວມມູນຄ່າທີ່ໄດ້ຮັບການຊ່ວຍເຫຼືອທັງໝົດ 49 ລ້ານກ່ວາກີບ, ຫຼັງຈາກນັ້ນກໍ່ໄດ້ມີການເຊັນມອບ-ຮັບອຸປະກອດັ່ງກ່າວ.

ໂອກາດດັ່ງກ່າວນີ້ ທ່ານ ຄໍາເຈື້ອ ທອງວັນໄຊ ກໍໄດ້ມີຄຳເຫັນໃຫ້ໄວໜຸ່ມຜູ້ທີ່ໄດ້ຮັບອຸປະກອບຊ່ວຍເຫຼືອໃນຄັ້ງນີ້ຈົ່ງນໍາໃຊ້ອຸປະກອນເຂົ້າໃນການປະກອບອາຊີບເພື່ອສ້າງລາຍຮັບໃຫ້ຕົນເອງ ແລະ ຄອບຄົວ, ຈົ່ງນໍາໃຊ້ວິຊາຊີບທີ່ໄດ້ຮຽນມາໃຫ້ສອດຄ່ອງ ແລະ ປົກປັກຮັກສາອຸປະກອນຮັບໃຊ້ໄວ້ໃຫ້ຍາວນານ.(ຂ່າວ: ຈັນສຸກ ຜົນປະເສີດ)