ເມື່ອບໍ່ດົນມານີ້ ທາງວິຊາການພະແນກ ກຳສິກຳ ແລະ ປ່າໄມ້ ແຂວງສະຫວັນນະເຂດ   ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມກັບທິມງານພາກສ່ວນກ່ຽວຂ້ອງຂອງເມືອງນອງ ໄດ້ລົງສຳຫຼວດວັດແທກຕອນດິນ ພ້ອມທັງເກັບກຳຂໍ້ມູນເນື້ອທີ່ໃນ 3 ປະເພດປ່າ, ໂດຍໄດ້ຮັບການນຳພາ ຂອງທ່ານ ບົວລົມ ອິນທີທະວົງ ຮອງເຈົ້າເມືອງນອງ, ທ່ານ ສາຄຳ ກຽດຕະວົງສາ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ແລະທ່ານ ສີວິໄລ ສໍເຊລະນອງ ວ່າການຫົວໜ້າຫ້ອງການພາຍໃນເມືອງ.
ເພື່ອຈັດສັນການແບ່ງດິນແບ່ງປ່າໃຫ້ຖືກຕ້ອງສອດຄ່ອງຕາມຂັ້ນເທິງວາງອອກ, ພາຍຫຼັງທາງຄະນະວິຊາການທີ່ມາຈາກແຂວງ ສົມທົບກັບວິຊາການເມືອງ ໄດ້ຈັດຊຸດຝຶກອົບຮົມແລ້ວ ຈຶ່ງໄດ້ລົງຈັດຕັ້ງປະຕິບັດຕົວຈິງຢູ່ທີ່ບ້ານລະໄກ ເມືອງນອງ, ດັ່ງນັ້ນ ທາງການນຳຂອງເມືອງ ຈຶ່ງໄດ້ລົງໂອ້ລົມອຳນາດການປົກຄອງບ້ານໃຫ້ຮັບຮູ້ ແລະເຂົ້າໃຈ ຕໍ່ກັບການລົງວັດແທກຕອນດິນ ແລະຮຽກຮ້ອງມາຍັງພໍ່ແມ່ປະຊາຊົນ ຈົ່ງພ້ອມພາກັນຕັດສິນໃຈ, ມີຄວາມຈິງໃຈ ແລະຮ່ວມມືເປັນເຈົ້າການໃນການວັດແທກຕອນດິນກະສິກຳໃນຄັ້ງນີ້, ຮຽກຮ້ອງໃຫ້ປະຊາຊົນມີຄວາມເປັນເອກະພາບສາມັກຄີກັນ  ທັງນີ້ກໍ່ເພື່ອອຳນວຍຄວາມສະດວກໃຫ້ກັບປະຊາຊົນໃນຕໍ່ໜ້າ, ທັງຫຼີກລ້ຽງການຍາດແຍ່ງເນື້ອທີ່ທຳການຜະລິດ, ທຸກຄົນມີສິດນໍາໃຊ້ຕອນດິນທີ່ຖືກຕ້ອງ.
ໂອກາດນີ້, ທາງຄະນະວິຊາການ ກໍ່ໄດ້ລົງວັດແທກຕອນດິນກະສິກຳໃຫ້ປະຊາຊົນໃນຈຳນວນ 38 ຄອບຄົວ ຂອງບ້ານລະໄກ, ດ້ວຍການນໍາໃຊ້ອຸປະກອນທີ່ທັນສະໄໝ. ສໍາລັບເມືອງນອງ ແມ່ນໄດ້ກໍານົດເອົາ 55 ບ້ານໃນທົ່ວເມືອງໃນການລົງວັດແທກຕອນດິນກະສິກຳພາຍໃນປີ 2024 ເຊິ່ງຈະໃຫ້ສຳເລັດຕາມວັນເວລາທີ່ວາງໄວ້./.