ໃນຕອນເຊົ້າຂອງວັນທີ 24 ພຶດສະພາ ນີ້ ກະຊວງການຕ່າງປະເທດ ໄດ້ຈັດພິທີປາຖະກະຖາວັນຜ່າວົງປິດລ້ອມ ຂອງກອງພັນທີ 2 ວິລະຊົນ ທີ່ ທົ່ງໄຫຫີນ ແຂວງຊຽງຂວາງ ຄົບຮອບ 65 ປີ ແລະ ວັນໄຊຊະນະບັ້ນຮົບດຽນບຽນຝູ້ ຄົບຮອບ 70 ປີ ທີ່ຫ້ອງປະຊຸມໃຫຍ່ ຂອງກະຊວງການຕ່າງປະເທດ ໂດຍໃຫ້ກຽດເປັນປະທານ ແລະ ບັນຍາຍເອກະສານ ຂອງ ສະຫາຍ ພົນໂທ ແສງນວນ ໄຊຍະລາດ ເລຂາຄະນະບໍລິຫານງານພັກ ປະທານສະຫະພັນນັກຮົບເກົ່າແຫ່ງຊາດລາວ ຊຶ່ງມີຄະນະພັກ, ຄະນະນຳ, ຄະນະໜ່ວຍພັກ, ຄະນະກົມ, ຄະນະພະແນກ ແລະ ພະນັກງານ-ລັດຖະກອນ ຂອງກະຊວງການຕ່າງປະເທດ ເຂົ້າຮ່ວມຮັບຟັງຢ່າງພ້ອມພຽງ.

ໃນພິທີດັ່ງກ່າວ, ສະຫາຍ ພົນໂທ ແສງນວນ ໄຊຍະລາດ ​ໄດ້ຫວນຄືນຂະບວນການຕໍ່ສູ້ປົດປ່ອຍຊາດຂອງປະຊາຊົນລາວ ແລະ ຂະບວນການຮ່ວມສໍາພັນຕໍ່ສູ້ຂອງ 3 ຊາດອິນດູຈີນ ໃນການຕໍ່ສູ້ຕ້ານກັບຈັກກະພັດລ່າຫົວເມືອງຂຶ້ນທັງແບບເກົ່າ ແລະ ແບບໃໝ່, ໂດຍສະເພາະເຫດການທີ່ເປັນຂີດໝາຍສໍາຄັນທາງປະຫວັດສາດຂອງໄຊຊະນະບັ້ນຮົບດຽນບຽນຝູ້ ໃນວັນທີ 7 ພຶດສະພາ 1954 ແລະ ເຫດການກອງພັນທີ 2 ຜ່າວົງປິດລ້ອມຂອງສັດຕູ ແລະ ວິລະກຳໂຕນຄຸກຢ່າງມະຫັດສະຈັນຂອງຜູ້ນໍາແນວລາວຮັກຊາດກັບຄືນສູ່ເຂດທີ່ໝັ້ນການປະຕິວັດຢ່າງປອດໄພ. ສະຫາຍໄດ້ຍົກໃຫ້ເຫັນຄວາມໝາຍຄວາມສໍາຄັນຂອງເຫດການດັ່ງກ່າວ ແລະ ບົດຮຽນທີ່ຄົນຮຸ່ນຫຼັງຄວນນໍາໄປສຶກສາຮ່ໍາຮຽນເອົາເປັນແບບຢ່າງ ແລະ ສືບຕໍ່ຈັດຕັ້ງປະຕິບັດ.

ໃນຕອນທ້າຍຂອງພິທີ, ສະຫາຍ ພົນໂທ ແສງນວນ ໄຊຍະລາດ ຍັງໄດ້ເນັ້ນຢໍ້າໃຫ້ສະມາຊິກພັກ, ພະນັກງານທັງໝົດດຂອງກະຊວງການຕ່າງປະເທດ ຈົ່ງພ້ອມກັນຕັ້ງໜ້າສຶກສາ ຄົ້ນຄວ້າຮໍ່າຮຽນເອົາແບບ​ຢ່າງ​ອັນ​ດີ​ງາມ​ຂອງ​ຜູ້​ນຳ, ຄວາມຈົງຮັກພັກດີ, ຄວາມບໍລິສຸດຜຸດຜ່ອງ, ຄວາມມານະອົດທົນ, ອຸ່ນອ່ຽນທຸ່ນທ່ຽງ, ມີໄຫວພິບ ໃນການຈັດຕັ້ງປະຕິບັດໜ້າທີ່ວຽກງານທີ່ຕົນຮັບຜິດຊອບ ເພື່ອອຸທິດຕົນໃຫ້ພາລະກິດປະຕິວັດ, ເພື່ອຊາດ ເພື່ອປະຊາຊົນ ຂອງທ່ານຜູ້ນໍາມາໝູນໃຊ້ເຂົ້າໃນການປະຕິບັດໜ້າທີ່ວຽກງານໃນປັດຈຸບັນ ແລະ ໄດ້ເນັ້ນຢໍ້າໃຫ້ພະນັກງານ ສະມາຊິກພັກ ຮັບຮູ້ເຂົ້າໃຈຄວາມໝາຍ ແລະ ຄວາມສໍາຄັນຂອງວັນຜ່າວົງປິດລ້ອມ ຂອງກອງພັນທີ 2 ວິລະຊົນ ທີ່ ທົ່ງໄຫຫີນ ແຂວງຊຽງຂວາງ ແລະ ວັນໄຊຊະນະບັ້ນຮົບດຽນບຽນຝູ້ ທີ່ສະແດງໃຫ້ເຫັນເຖິງທາດແທ້ມູນເຊື້ອປະຕິວັດ, ມູນເຊື້ອການຕໍ່ສູ້ພິລະອາດຫານ ແລະ ການເສຍສະຫຼະເພື່ອຊາດເພື່ອປະຊາຊົນ ກໍຄືຜົນງານອັນໃຫຍ່ຫຼວງທີ່ຍາດມາໄດ້ ຕະຫຼອດຫຼາຍປີຜ່ານມາ. (ຂ່າວ: ກຕທ)