ເນື່ອງໃນໂອກາດທີ່ ທ່ານ ຄຳຜອຍ ວັນນະສານ ກຳມະການສູນກາງພັກ ເລຂາພັກແຂວງເຈົ້າແຂວງຜົ້ງສາລີ ພ້ອມດ້ວຍຂະແໜງການທີ່ກ່ຽວຂ້ອງຂັ້ນແຂວງ ໄດ້ລົງຊຸກຍູ້ວຽກງານຮອບດ້ານຂອງເມືອງ ແລະ ແຜນການກະກຽມກອງປະຊຸມໃຫຍ່ຂອງພັກ 3 ຂັ້ນຢູ່ເມືອງຜົ້ງສາລີນັ້ນ. ຕອນເຊົ້າຂອງວັນທີ 22 ພຶດສະພາ ຜ່ານມາ ທີ່ສະໂມສອນໃຫຍ່ຂອງເມືອງຜົ້ງສາລີ ທ່ານເຈົ້າແຂວງຜົ້ງສາລີ ໄດ້ພົບປະໂອ້ລົມການນຳເມືອງ, ພະນັກງານຫຼັກແຫຼ່ງ ແລະ ອະດິດການນຳເມືອງ.

ໂອກາດດັ່ງກ່າວ, ທ່ານ ວັນໄຊ ແສນຍອດ ກຳມະການພັກແຂວງເລຂາພັກເມືອງເຈົ້າເມືອງຜົ້ງສາລີ ໄດ້ລາຍງານສະພາບ ການຈັດຕັ້ງປະຕິບັດຄາດໝາຍໃຫຍ່ໆຂອງມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກເມືອງ ແລະ ຄາດໝາຍຂອງແຜນພັດທະນາເສດຖະກິດ-ສັງຄົມຂອງເມືອງຮອດປີ 2023 ແລະ ທິດທາງແຜນການປີ 2024 ຂອງເມືອງ ຕະຫຼອດໄລຍະ 1 ປີແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງຄະນະບໍລິຫານງານພັກເມືອງ ແລະ ໄດ້ຮັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ III ແລະ ຈັດຕັ້ງປະຕິບັດແຜນຍຸດທະສາດ 5 ທາງອອກຂອງເມືອງ ເປີດກວ້າງການຮ່ວມມືເສດຖະກິດກັບຕ່າງປະເທດສົ່ງເສີມການປູກ-ການລ້ຽງເອົາໃຈໃສ່ປຸກລະດົມທຸກພາກສ່ວນໃນການພັດທະນາເສດຖະກິດ-ສັງຄົມຂອງເມືອງ. ປີຜ່ານມາ ອັດຕາການຂະຫຍາຍຕົວຂອງເສດຖະກິດແມ່ນຢູ່ໃນລະດັບ 6,45% ໃນນັ້ນ: ກະສິກຳ - ປ່າໄມ້ຂະຫຍາຍຕົວ 9,15%, ອຸດສາຫະກຳ - ຫັດຖະກໍາ ຂະຫຍາຍຕົວ 4,85%, ບໍລິການ 4,91%, ລວມຍອດມູນຄ່າຜົນຜະລິດຕະພັນພາຍໃນເມືອງ 296,18 ຕື້ກີບ. ລາຍຮັບສະເລັ່ຍຕໍ່ຫົວຄົນປະຕິບັດໄດ້ 615,31 ໂດລາ ຫຼື ເທົ່າກັບ 12,30 ລ້ານກີບ, ໄດ້ເອົາໃຈໃສ່ຊີ້ນຳການຂຸດຄົ້ນລາຍຮັບ ແລະ ຄຸ້ມຄອງລາຍຈ່າຍງົບປະມານ ສາມາດຈັດຕັ້ງປະຕິບັດແຜນງົບປະມານພາຍໃນ 3,07 ຕື້ກີບ, ເທົ່າກັບ 116,26% ຂອງແຜນການປີ, ຖ້າທຽບໃສ່ໄລຍະດຽວກັນຂອງປີຜ່ານມາແມ່ນເພີ່ມຂຶ້ນ 3,08% ຮັບດຸ່ນຈາກແຂວງ 1,21 ຕື້ກີບ, ລາຍຮັບທ້ອງຖິ່ນປະຕິບັດໄດ້ 1,85 ຕື້ກີບ, ເທົ່າກັບ 130,14% ຂອງແຜນການປີ; ດ້ານລາຍຈ່າຍປະຕິບັດໄດ້ທັງໝົດ 2,63 ຕື້ກີບ ເທົ່າກັບ 100%. ການລະດົມທຶນເຂົ້າໃສ່ການຈັດຕັ້ງປະຕິບັດແຜນການ, ໂຄງການມາຮອດປັດຈຸບັນມີນັກລົງທຶນຈາກພາຍໃນ ແລະ ຕ່າງປະເທດ ເຂົ້າມາລົງທຶນຢູ່ພາຍໃນເມືອງຜົ້ງສາລີ ມີຈຳນວນ 24 ໂຄງການ, ແຕ່ຈັດຕັ້ງປະຕິບັດຕົວຈິງມີ 11 ໂຄງການ ໃນນີ້ການລົງທຶນພາຍໃນ ມີ 7 ມູນຄ່າ 13,80 ຕື້ກີບ, ການລົງທຶນຕ່າງປະເທດມີ 4 ໂຄງການ ມີມູນຄ່າ 8,64 ຕື້ກີບ. ພ້ອມກັນນີ້ບັດຄາດໝາຍຕົວຊີ້ວັດຕ່າງໆຂອງຂົງເຂດສັງຄົມກໍໄດ້ເອົາໃຈໃສ່ປະຕິບັດຢ່າງຕໍ່ເນື່ອງ ແລະ ໄດ້ບັນລຸບາງຄາດໝາຍ, ການແກ້ໄຂຄວາມທຸກຍາກຂອງປະຊາຊົນຕິດພັນກັບການສ້າງຕົວເມືອງນ້ອຍໃນຊົນນະບົດກໍໄດ້ສຸມທຸກແຫຼ່ງທຶນໃນການຈັດຕັ້ງປະຕິບັດ, ພື້ນຖານໂຄງລ່າງກໍໄດ້ຮັບການປັບປຸງຍົກລະດັບ ແລະ ເຮັດໃຫ້ຊີວິດຂອງປະຊາຊົນດີຂຶ້ນເປັນກ້າວໆ.

ໂອກາດດັ່ງກ່າວນີ້, ທ່ານເຈົ້າແຂວງ ກໍໄດ້ມີຄຳເຫັນໂອ້ລົມ ຊຶ່ງໄດ້ເນັ້ນໜັກ ແລະ ຮຽກຮ້ອງຕື່ມຫຼາຍບັນຫາເປັນຕົ້ນແມ່ນ: ໃຫ້ຄະນະພັກແຕ່ລະຂັ້ນເອົາໃຈໃສ່ສຶກສາອົບຮົມນໍາພາການເມືອງແນວຄິດ ໃຫ້ທຸກພາກສ່ວນ ມີຄວາມເຊື່ອໝັ້ນຕໍ່ການນໍາພາຂອງຄະນະພັກ ແລະ ການຄຸ້ມຄອງຂອງແຕ່ລະຂັ້ນ, ເພີ່ມຄວາມເປັນເຈົ້າ ແລະ ສ້າງຄວາມເຂັ້ມແຂງດ້ວຍຕົນເອງ, ເພິ່ງຕົນເອງ, ເອົາໃຈໃສ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດ, ການແກ້ໄຂ 9 ໜໍ່ແໜງທີ່ກໍ່ໃຫ້ເກີດປະກົດການຫຍໍ້ທໍ້ໃນສັງຄົມ ໃຫ້ແທດເຖິງຕົວຈິງ ແລະ ເຂັ້ມງວດກ່ວາເກົ່າ, ສືບຕໍ່ກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ຖືກຕ້ອງຕາມກົດລະບຽບຂອງພັກ, ຕາມຄໍາສັ່ງ, ຄໍາແນະນໍາ ຂອງສູນກາງ, ຂອງແຂວງ ແລະ ຮັບປະກັນຄວາມຖືກຕ້ອງ, ມີຄວາມສະຫງົບ ແລະ ສໍາເລັດຕາມກໍານົດເວລາ, ສືບຕໍ່ສຸມໃສ່ພັດທະນາເສດຖະກິດ ຕິດພັນກັບການພັດທະນາຊົນນະບົດ ແລະ ແກ້ໄຂຄວາມທຸກຍາກຕາມແລວ 1.1, 4, 5, 6, 22 ແລະ 9 ແຜນງານ,ໃນນັ້ນ ສຸມໃສ່ກໍ່ສ້າງໂຄງລ່າງຮັບໃຊ້ແກ່ການພັດທະນາ, ການດໍາລົງຊີວິດ ແລະ ການແກ້ໄຂຄວາມທຸກຍາກຂອງປະຊາຊົນ,ສຸມໃສ່ການຈັດສັນຍົກຍ້າຍບ້ານ, ການໂຮມບ້ານ ແລະ ການສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດ, ສືບຕໍ່ສຸມໃສ່ການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດ ຖະກິດ-ການເງິນ ແລະ ແກ້ໄຂບັນຫາຢາເສບຕິດ ຕາມ 5 ວຽກຕົ້ນຕໍ ຢ່າງແຂງແຮງ ແລະ ແທດເຖິງ, ສືບຕໍ່ຊີ້ນໍາວາງແຜນການປ້ອງກັນ, ສະກັດກັ້ນ ແລະ ເຝົ້າລະວັງພະຍາດ, ໄພພິບັດຕ່າງໆ ອາດເກີດຂຶ້ນຕາມລະດູການ, ສຸມໃສ່ການປະຕິບັດຄາດໝາຍດ້ານສະຫັດສະວັດ ເພື່ອການພັດທະນາ ແລະ ການພັດທະນາແບບຍືນຍົງ (SDGs) ໃນຂົງເຂດສັງຄົມ ໃຫ້ບັນລຸເພີ່ມຂຶ້ນ, ສຸມໃສ່ການສົ່ງເສີມການຜະລິດສະບຽງອາຫານ-ທັນຍາຫານ ເພື່ອສະໜອງພາຍໃນ ແລະ ທົດແທນການນໍາເຂົ້າ, ສຸມໃສ່ຈັດຕັ້ງປະຕິບັດ ໂຄງການຜະລິດເປັນສິນຄ້າເພື່ອສົ່ງອອກ ທີ່ມີຕະຫຼາດຮອງຮັບ ມາແລ້ວເຊັ່ນ: ຊາ,ຢາງພາລາ,ໝາກແໜ່ງ ແລະ ພືດລະດູການ ຕິດພັນກັບການຈັດສັນອາຊີບ, ສ້າງລາຍຮັບ, ລາຍໄດ້ ໃຫ້ແກ່ປະຊາຊົນ ເພື່ອໃຫ້ຫຼຸດພົ້ນຈາກຄວາມທຸກຍາກເທື່ອລະກ້າວ.

(ຂ່າວ-ພາບ: ແສງຄຳ ສາລີວັນ )