ຫ້ອງວ່າການສໍານັກງານປະທານປະເທດ (ຫສປທ) ຈັດກອງປະຊຸມສະຫຼຸບວຽກງານກວດກາປະຈໍາປີ2023 ແລະ ທິດທາງແຜນການປະຈໍາປີ 2024ຂຶ້ນໃນວັນທີ 24 ພຶດສະພານີ້ທີ່ຫ້ອງປະຊຸມ ຫສປທ, ໂດຍການເປັນປະທານຂອງທ່ານ ນາງ ເຂັມມະນີ ພົນເສນາກໍາມະການສູນກາງພັກເລຂາຄະນະພັກ, ຫົວໜ້າ ຫສປທ, ມີບັນດາຄະນະພັກ, ຫົວໜ້າກົມ,ຮອງກົມ, ແຂກຖືກເຊີນ ພ້ອມດ້ວຍພະນັກງານເຂົ້າຮ່ວມ.

ໃນພິທີ, ທ່ານ ນາງ ເຂັມມະນີ ພົນເສນາໄດ້ກ່າວວ່າ: ວຽກງານກວດກາຖືເປັນວຽກງານທີ່ມີຄວາມສໍາຄັນທີ່ສຸດ,ໃນບົດບາດການນໍາພາຂອງພັກ, ທຸກການຈັດຕັ້ງຂອງພັກ-ລັດຕ້ອງດໍາເນີນວຽກງານການກວດກາ, ການຈັດຕັ້ງທຸກຂັ້ນແລະສະມາຊິກພັກທຸກສະຫາຍຕ້ອງຢູ່ພາຍໃຕ້ການກວດກາ, ຖ້າບໍ່ມີການກວດກາກໍເໝືອນກັບວ່າບໍ່ມີການນໍາພາ. ໃນເງື່ອນໄຂໃໝ່ນີ້ວຽກງານກວດກາຍິ່ງມີບົດບາດພົ້ນເດັ່ນເພາະມັນຊ່ວຍໃຫ້ສາມາດຊອກເຫັນດ້ານດີເພື່ອເສີມຂະຫຍາຍ ທັງຊ່ວຍສະກັດກັ້ນ ແລະ ແກ້ໄຂປະກົດການຫຍໍ້ທໍ້ທີ່ສົ່ງຜົນກະທົບເຖິງບົດບາດການນໍາພາ ຂອງພັກແລະ ການຄຸ້ມຄອງຂອງລັດ. ດັ່ງມະຕິກອງປະຊຸມໃຫຍ່ຄັ້ງທີXI ຂອງພັກທີ່ກຳນົດໄວ້ວ່າ: ເພີ່ມທະວີ ແລະ ຍົກສູງຄຸນນະພາບ ຂອງວຽກງານການກວດກາ, ຍົກລະດັບຄວາມສາມາດ ຂອງການກວດກາຂຶ້ນຕື່ມ. ນັ້ນແມ່ນໜຶ່ງໃນປັດໄຈອັນສຳຄັນ ຂອງພະນັກງານທີ່ເຮັດວຽກງານກວດກາຕ້ອງມີລະດັບຄວາມຮູ້, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍ ຂອງລັດເວົ້າລວມ, ເວົ້າສະເພາະ ຕ້ອງກໍາໃຫ້ໄດ້ພື້ນຖານ ຂອງວຽກງານກວດກາພັກ, ກວດກາລັດ, ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ, ບັນດາລະບຽບການດັ່ງກ່າວເພື່ອນໍາໄປໝູນໃຊ້ເຂົ້າໃນການເຄື່ອນໄຫວວຽກງານກວດກາຕົວຈິງໃຫ້ສອດຄ່ອງ ແລະ ມີປະສິດທິຜົນ.

ກອງປະຊຸມໄດ້ຮັບຟັງການລາຍງານຫຍໍ້ວຽກງານກວດກາປະຈຳປີ2023 ແລະ ແຜນການປີ2024 ຂອງຫສປທ ພ້ອມກັນນັ້ນ ສະເໜີບັນດາທ່ານທີ່ເຂົ້າຮ່ວມກອງປະຊຸມປະກອບຄໍາເຫັນໃສ່ບົດສະຫຼຸບດັ່ງກ່າວ, ຈາກນັ້ນຈະໄດ້ຮັບຝັງການເຜີຍແຜ່ຄໍາສັ່ງ, ຄໍາແນະນໍາ ກ່ຽວກັບວຽກງານກວດກາຕື່ມອີກ.

(ຂ່າວ-ພາບ: ແສງຈັນ)