ຂ່າວສານຊີອາໄອລາຍງານທ້າຍອາທິດຜ່ານມາວ່າ: ນັບແຕ່ເດືອນເມສາ ເປັນຕົ້ນມາ, ຍ້ອນໄດ້ຮັບຜົນກະທົບຈາກປະກົດການແອວນີໂຢ ເຮັດໃຫ້ມຽນມາປະສົບກັບສະພາບອາກາດຮ້ອນອົບເອົ້າອຸນຫະພູມເພີ່ມສູງຂຶ້ນຜິດປົກກະຕິ,ອຸນຫະພູມຢູ່ຫຼາຍພື້ນທີ່ຂອງມຽນມາໄດ້ເພີ່ມຂຶ້ນສູງເປັນສະຕິຖິສູງສຸດໃນປະຫວັດສາດ. ຈາກອາກາດຮ້ອນອົບເອົ້າ ແລະ ອຸນຫະພູມເພີ່ມສູງຂຶ້ນຄືແນວນີ້ໄດ້ສ້າງຄວາມເສຍຫາຍຢ່າງໜັກໜ່ວງຕໍ່ການຜະລິດກະສິກຳຂອງມຽນມາ.
ປີນີ້, ຍ້ອນອຸນຫະພູມເພີ່ມສູງຂຶ້ນ ບວກກັບ ຝົນຕົກບໍ່ຖືກຕ້ອງຕາມລະດູການ ເຮັດໃຫ້ແມ່ນ້ຳ ແລະ ນ້ຳສ້າງຈຳນວນຫຼາຍທີ່ຊາວບ້ານໃຊ້ໃນການດຳລົງຊີວິດນັ້ນລ້ວນແຕ່ເຫືອດແຫ້ງ ຈົນບໍ່ສາມາດປູກຝັງໄດ້.ອຸນຫະພູມເພີ່ມສູງຂຶ້ນຍັງເຮັດໃຫ້້ຄວາມຕ້ອງການໃຊ້ພະລັງໄຟຟ້າຢູ່ຫຼາຍແຫ່ງຂອງມຽນມາເພີ່ມຫຼາຍຂຶ້ນ ຈົນຂາດໄຟຟ້າໃຊ້ຢ່າງຫຼວງຫຼາຍ,ເວລາການສະໜອງໄຟຟ້າຢູ່ຫຼາຍແຫ່ງໄດ້ຫຼຸດລົງບໍ່ຮອດ6 ຊົ່ວໂມງຕໍ່ມື້.
 ວິຊາການເຕັກນິກກະສິກຳທ້ອງຖິ່ນຂອງມຽນມາກ່າວວ່າ:ສຳລັບການປູກເຂົ້າ, ຊາວກະສິກອນສ່ວນໃຫຍ່ແມ່ນປັກດຳໃນເດືອນມີນາ, ປັດຈຸບັນພວມຢູ່ໃນໄລຍະເຂົ້າຖອກຮວງ, ແຕ່ອຸນຫະພູມເພີ່ມສູງຂຶ້ນ ແລະ ເກີດໄພແຫ້ງແລ້ງເຮັດໃຫ້ອັດຕາການຖອກຮວງຂອງເຂົ້າຫຼຸດຕ່ຳລົງ, ສິ່ງນີ້ບໍ່ພຽງແຕ່ສ້າງຜົນກະທົບຕໍ່ຜົນຜະລິດເທົ່ານັ້ນ ຍັງເຮັດໃຫ້ພະຍາດ ແລະ ສັດຕູພືດເພີ່ມຫຼາຍຂຶ້ນ.
 ນອກຈາກເຮັດໃຫ້ການປູກເຂົ້າ ແລະ ເຂົ້າບາເລໄດ້ຮັບຜົນກະທົບແລ້ວ, ຍ້ອນອຸນຫະພູມເພີ່ມສູງຂຶ້ນຢ່າງຕໍ່ເນື່ອງຍັງເຮັດໃຫ້ໝາກໄມ້ເຂດຮ້ອນຕ່າງໆ ເຊັ່ນ:ໝາກມ່ວງ ແລະ ໝາກເງາະສຸກກ່ອນກຳນົດ, ບໍ່ພຽງແຕ່ລົດຊາດບໍ່ແຊບເທົ່ານັ້ນ, ຈຳນວນຜົນຜະລິດກໍຫຼຸດໜ້ອຍລົງ, ສິ່ງນີ້ຈະສ້າງຜົນກະທົບຕໍ່ການສົ່ງອອກຜະລິດຕະພັນກະສິກຳຂອງມຽນມາໃນປີນີ້ຢ່າງຫຼວງຫຼາຍ.