ກະຊວງກະສິກຳແລະປ່າໄມ້ (ກປ) ໄດ້ຈັດພິທີປະກາດການຈັດຕັ້ງໃນວັນທີ 4 ມິຖຸນາ ນີ້, ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ລິນຄໍາ ດວງສະຫວັນ ລັດຖະມົນຕີກະຊວງ ກປ, ມີຄະນະນຳແລະພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ບຸນທະວີ ໄຊຍະເພັດ ຫົວໜ້າກົມຈັດຕັ້ງ ແລະ ພະນັກງານໄດ້ຂຶ້ນຜ່ານດໍາລັດ ຂອງນາຍົກລັດຖະມົນຕີ ວ່າດ້ວຍ ການອະນຸມັດໃຫ້ພະນັກງານ ອອກພັກການ-ຮັບອຸດໜຸນບໍານານ, ດໍາລັດ ວ່າດ້ວຍການແຕ່ງຕັ້ງຫົວໜ້າກົມກວດກາກະຊວງກະສິກໍາ ແລະ ປ່າໄມ້, ດໍາລັດ ວ່າດ້ວຍການແຕ່ງຕັ້ງ ຫົວໜ້າກົມແຜນການ ແລະ ການຮ່ວມມືກະຊວງກະສິກໍາ ແລະ ປ່າໄມ້ ແລະ ມະຕິຕົກລົງ ວ່າດ້ວຍ ການບົ່ງຕົວແຕ່ງຕັ້ງ ເລຂາຄະນະພັກຮາກຖານ ກົມແຜນການ ແລະ ການຮ່ວມມື ທີ່ຂຶ້ນກັບອົງຄະນະພັກກະຊວງກະສິກໍາ ແລະ ປ່າໄມ້ ລາຍລະອຽດດັ່ງລຸ່ມນີ້:
1. ອະນຸມັດໃຫ້ ທ່ານ ນາງ ພວງເພັດ ປູ່ວັງ ຫົວໜ້າກົມກວດກາກະຊວງກະສິກໍາ ແລະ ປ່າໄມ້ ອອກພັກການ-ຮັບອຸດໜຸນບໍານານ;
2. ແຕ່ງຕັ້ງ ທ່ານ ທັດສະກາ ສະພັງທອງ ເປັນຫົວໜ້າກົມກວດກາກະຊວງກະສິກໍາ ແລະ ປ່າໄມ້; 
3. ແຕ່ງຕັ້ງ ທ່ານ ບຸນເດດ ສຸດທະວິໄລ ເປັນຫົວໜ້າກົມແຜນການ ແລະ ການຮ່ວມມືກະຊວງກະສິກໍາ ແລະ ປ່າໄມ້ ແລະ ບົ່ງຕົວແຕ່ງຕັ້ງ ເປັນເລຂາຄະນະພັກຮາກຖານກົມແຜນການ ແລະ ການຮ່ວມມື.
ໃນພິທີທ່ານລິນຄຳດວງສະຫວັນໄດ້ໃຫ້ກຽດໂອ້ລົມ ພ້ອມທັງໃຫ້ທິດຊີ້ນໍາບາງດ້ານ ດັ່ງນີ້: 1). ພາຍ ຫຼັງປະກາດການຈັດຕັ້ງນີ້ແລ້ວ ໃຫ້ຮີບຮ້ອນ ມອບ-ຮັບ ໜ້າທີ່ ລະຫວ່າງຫົວໜ້າກົມຜູ້ເກົ່າ ແລະ ຜູ້ໃໝ່; 2). ບັນດາສະຫາຍທີ່ຖືກແຕ່ງຕັ້ງ ຕະຫຼອດຮອດສະມາຊິກພັກ, ພະນັກງານ-ລັດຖະກອນ ຈົ່ງສືບຕໍ່ຂະຫຍາຍມູນເຊື້ອ ສາມັກຄີ, ນໍາພາ-ຊີ້ນໍາ ແລະ ຈັດຕັ້ງປະຕິບັດໜ້າທີ່ການເມືອງ ກໍຄືວຽກງານແຕ່ລະດ້ານຂອງຕົນ ໃຫ້ມີບາດກ້າວໃໝ່ ໃຫຍ່ຫຼວງກວ່າເກົ່າ; 3). ເອົາໃຈໃສ່ສຶກສາອົບຮົມ ສະມາຊິກພັກ, ພະນັກງານ ໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີການເຮັດວຽກ; 4). ປັບປຸງ ແລະ ມີແບບແຜນວິທີ ນໍາພາ-ວິທີເຮັດວຽກ, ເຄົາລົບ ແລະ ປະຕິບັດຫຼັກການລວມສູນ ປະຊາທິປະໄຕຢ່າງເຂັ້ມງວດ ໃຫ້ມີການຫັນປ່ຽນຈະແຈ້ງ; 5). ເພີ່ມທະວີຄວາມໃຈໃສ່ ໃນການກະກຽມດໍາເນີນກອງປະຊຸມໃຫຍ່ 3 ຂັ້ນ ໃຫ້ສໍາເລັດຕາມແຜນການຂອງໜ່ວຍ, ຮາກຖານ ແລະ ແຜນຂອງອົງຄະນະພັກກະຊວງ.
ຂ່າວ-ພາບ: ກະຊວງ ກປ