ໃນວັນທີ 22 ກັນຍາ ນີ້ ທີ່ສໍານັກງານນາຍົກລັດຖະມົນຕີ, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ອີນາ ມາຈູລໍນີເຕ (Ms. Ina Marciulionyte) ເອກອັກຄະລັດຖະທູດສະຫະພາບເອີຣົບ ປະຈໍາ ສປປ ລາວ, ທ່ານ ດຣ. ເພຍ ເຣເບລໂລ ບຣິດໂຕ (Dr. Pia Rebello Britto) ຜູ້ຕາງໜ້າອົງການອຸຍນີເຊັບ ປະຈຳລາວ ພ້ອມດ້ວຍຄະນະ.

​ ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສະຫະພາບເອີຮົບ ແລະ ອົງການອຸຍນີເຊັບ ທີ່ໃຫ້ການຮ່ວມມື ແລະ ຊ່ວຍເຫຼືອ ສປປ ລາວ ຕະຫຼອດໄລຍະຜ່ານມາໂດຍສະເພາະ ໃນຂົງເຂດວຽກງານໂພຊະນາການ ຊຶ່ງໄດ້ປະກອບສ່ວນທີ່ສໍາຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ເວົ້າລວມ, ເວົ້າສະເພາະ ຊ່ວຍຍົກລະດັບຄຸນນະພາບດ້ານສຸຂະພາບ ແລະ ຊີວິດການເປັນຢູ່ຂອງປະຊາຊົນ ໃຫ້ດີຂຶ້ນເທື່ອລະກ້າວ ຊຶ່ງລັດຖະບານ ແຫ່ງ ສປປ ລາວ ໄດ້ໃຫ້ຄວາມສໍາຄັນ ດ້ານວຽກງານໂພຊະນາການ ແລະ ການຄໍ້າປະກັນດ້ານສະບຽງອາຫານ ໂດຍໄດ້ແຕ່ງຕັ້ງ ຄະນະກໍາມະການດ້ານໂພຊະນາການຂັ້ນສູນກາງ ຮອດທ້ອງຖິ່ນ ເປັນຜູ້ຈັດຕັ້ງປະຕິບັດວຽກງານດັ່ງກ່າວ, ພ້ອມທັງ ໄດ້ມີການຈັດກອງປະຊຸມແຫ່ງຊາດ ດ້ານໂພຊະນາການແຫ່ງຊາດ ຄັ້ງທີ VIII ແລະ ກອງປະຊຸມຄະນະກໍາມະການແຫ່ງຊາດດ້ານໂພຊະນາການ ປະຈໍາປີ ເພື່ອປຶກສາຫາລືເຖິງສິ່ງທ້າທາຍ ແລະ ທົບທວນຄືນ ເຖິງຄວາມຄືບໜ້າໃນການແກ້ໄຂບັນຫາການຂາດໂພຊະນາການໃນ ສປປ ລາວ ແລະ ເອກະພາບແຜນບຸລິມະສິດສໍາລັບປີ 2023. ພ້ອມກັນນີ້ ກໍສະແດງຄວາມຊົມເຊີຍເປັນຢ່າງຍິ່ງຕໍ່ ການຮ່ວມມືລະຫວ່າງ ສປປ ລາວ ແລະ ອົງການອຸຍນີເຊັບ ຄົບຮອບ 50 ປີ ແຕ່ປີ 1973-2023 ແລະ ໃນຕໍ່ໜ້າ ຫວັງຢ່າງຍິ່ງວ່າ ສະຫະພາບເອີຮົບ ແລະ ອົງການອຸຍນີເຊັບ ຈະສືບຕໍ່ຊຸກຍູ້ຊ່ວຍເຫຼືອດ້ານຕ່າງໆໃນຂອບການຮ່ວມມືທີ່ໄດ້ຕົກລົງກັນ ໂດຍສະເພາະດ້ານເຕັກນິກວິຊາການ ເພື່ອຖ່າຍທອດຄວາມຮູ້ ແລະ ສ້າງຂີດຄວາມສາມາດ ໃຫ້ແກ່ພະນັກງານຂອງພາກສ່ວນກ່ຽວຂ້ອງ ທັງຂັ້ນສູນກາງ ແລະ ທ້ອງຖິ່ນ ໃຫ້ມີຄວາມເຂັ້ມແຂງ, ສາມາດຕອບສະໜອງຄວາມຮຽກຮ້ອງຕ້ອງການ ຂອງການພັດທະນາ ໃນແຕ່ລະໄລຍະ; ສະເໜີສືບຕໍ່ໃຫ້ການສະໜັບສະໜູນ ແລະ ປະສານສົມທົບກັບຄູ່ຮ່ວມພັດທະນາອື່ນ ໃນການຈັດຕັ້ງປະຕິບັດແຜນງານໃນແຕ່ລະໄລຍະ ໃຫ້ບັນລຸຕາມຈຸດປະສົງ ແລະ ລະດັບຄາດໝາຍ ທີ່ກຳນົດໄວ້. ພ້ອມນີ້, ຈະຊີ້ນຳໃຫ້ກະຊວງກ່ຽວຂ້ອງ ໃນການປັບປຸງກົນໄກການປະສານງານ ໃຫ້ໂລ່ງລ່ຽນ ແລະ ການຄຸ້ມຄອງການຈັດຕັ້ງປະຕິ ບັດໂຄງການ ໃຫ້ມີປະສິດທິພາບ, ປະສິດທິຜົນ ແລະ ໂປ່ງໃສ.

ໃນໂອກາດດຽວກັນ, ທ່ານ ນາງ ອີນາ ມາຈູລໍນີເຕ ກໍໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານຮອງນາຍົກລັດຖະມົນຕີ ແລະ ພາກສ່ວນກ່ຽວຂ້ອງຂອງ ສປປ ລາວ, ພ້ອມທັງລາຍງານໃຫ້ທ່ານຮອງນາຍົກລັດຖະມົນຕີຊາບກ່ຽວກັບຈຸດປະສົງຂອງການເຂົ້າພົບ ແລະ ໄດ້ລາຍງານກ່ຽວກັບຜົນສຳເລັດອັນພົ້ນເດັ່ນ ໃນການປະຕິບັດພາລະບົດບາດຂອງຕົນ ເຂົ້າໃນການປະກອບສ່ວນການພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານ ກໍຄື ແຜນການຮ່ວມມືໃນຕໍ່ໜ້າ ເພື່ອໃຫ້ວຽກງານທີ່ກ່ຽວຂ້ອງ ຂອງ ສປປ ລາວ ນັບມື້ໄດ້ຮັບການພັດທະນາຢ່າງມີປະສິດທິ ພາບ ແລະ ປະສິດທິຜົນຫຼາຍຂຶ້ນ.

(ຂ່າວ: ຫສນຍ, ພາບ: ສຳນານ)