ໃນວັນທີ 11 ມິຖຸນາຜ່ານມາ ທີ່ຫ້ອງວ່າການແຂວງຫົວພັນ, ທ່ານ ຄໍາໄຫຼ ສີປະເສີດ ຮອງປະທານຜູ້ປະຈໍາການສູນກາງແນວລາວສ້າງຊາດ (ສນຊ) ພ້ອມຄະນະໄດ້ເຄື່ອນໄຫວຢ້ຽມຢາມພົບປະທ່ານ ຄຳແພງ ໄຊສົມແພງ ເຈົ້າແຂວງຫົວພັນ.
       ທ່ານຄໍາໄຫຼ ສີປະເສີດໄດ້ແຈ້ງຈຸດປະສົງການມາເຄື່ອນໄຫວເຮັດວຽກໃນຄັ້ງນີ້ໃຫ້ທ່ານເຈົ້າແຂວງຮັບຊາບ ເພື່ອປຶກສາຫາລືວຽກງານທີ່ສຳຄັນຈໍານວນໜຶ່ງ. ໂອກາດນີ້, ທ່ານເຈົ້າແຂວງໄດ້ສະແດງຄວາມຍິນດີຕ້ອນຮັບທ່ານຮອງປະທານ ສນຊ ພ້ອມດ້ວຍຄະນະທີ່ມາເຄື່ອນໄຫວເຮັດວຽກໃນຄັ້ງນີ້ຊຶ່ງທ່ານໄດ້ລາຍງານໃຫ້ຮູ້ບາງວຽກງານຈຸດສຸມ, ແຜນພັດທະນາເສດຖະກິດ-ສັງຄົມຂອງແຂວງໃນໄລຍະຜ່ານມາ ແລະ ທິດທາງໃນຕໍ່ໜ້າໃຫ້ຄະນະຮັບຊາບ ພ້ອມກັນນີ້ທ່ານໄດ້ຍົກໃຫ້ເຫັນຄວາມສາມັກຄີປອງດອງຂອງປະຊາຊົນລາວບັນດາເຜົ່າຂອງແຂວງມີແນວຄິດອຸ່ນອ່ຽນທຸ່ນທ່ຽງໂດຍພື້ນຖານ.
ຂ່າວ: ສນຊ