ໃນລະຫວ່າງວັນທີ 17-19 ຕຸລານີ້, ພັນລະຍາຄະນະຜູ້ແທນຂັ້ນສູງຕຳຫຼວດບັນດາປະເທດອາຊຽນ ທີ່ເຂົ້າຮ່ວມກອງປະຊຸມຫົວໜ້າຕຳຫຼວດອາຊຽນ ຄັ້ງທີ 41 ທີ່ ສປປ ລາວ ຮັບກຽດເປັນເຈົ້າພາບ ທັງພາຍໃນ ແລະ ຕ່າງປະເທດ ໄດ້ເຄື່ອນໄຫວທ່ຽວຊົມສະຖານທີ່ທ່ອງທ່ຽວສຳຄັນຂອງ ສປປ ລາວ ຢູ່ພາຍໃນນະຄອນຫຼວງວຽງຈັນ.
ນຳພາຄະນະເຂົ້າຢ້ຽມຊົມສະຖານທີ່ທ່ອງທ່ຽວ ໂດຍທ່ານ ນາງ ເສົາວະສີ ໄຊຍະກຸມ ມານ ພັນລະຍາຂອງ ທ່ານ ພົຕ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບລາວ ພ້ອມດ້ວຍຄະນະຕິດຕາມເຂົ້າຮ່ວມ; ໃນນີ້, ໄດ້ທ່ຽວຊົມ ຫໍພະແກ້ວ ຊຶ່ງເປັນວັດທີ່ມີຄວາມງົດງາມມີຄຸນຄ່າທາງປະຫວັດສາດ ແລະ ວັດທະນະທຳຂອງຊາດລາວ ແລະ ໄດ້ໄປກາບໄຫວ້ສັກກາລະບູຊາ ພິພິທະພັນວັດສີສະເກດ ບ້ານຊຽງຍືນ ເມືອງຈັນທະບູລີ ຊົມທິວທັດປະຕູໄຊ, ກາບໄຫວ້ພຣະທາດຫຼວງວຽງຈັນ ຊຶ່ງເປັນມິ່ງຂວັນຂອງປວງຊົນລາວທັງຊາດ ກໍຄືຊາວນະຄອນຫຼວງວຽງຈັນ. 
ຈາກນັ້ນ, ກໍໄດ້ສືບຕໍ່ເດີນທາງໄປທ່ຽວຊົມຫໍພິພິຕະພັນສິລະປະລາວ, ຮ້ານຫັດຖະກຳກະເປົາຜະລິດຈາກຫວາຍ ຈາກໂຮງງານອານຸສອນ ແລະ ຮ້ານຜ້າໄໝລາວ ຢູ່ໄອເຕັກ, ຊົມຫໍພິພິທະພັນກະຊວງປ້ອງກັນຄວາມສະຫງົບ ແລະ ຮ້ານຫັດຖະກຳ ກຳແພງວຽງ.
ຂ່າວ: ຄຳສອນ, ພາບ: ບຸນພະຈັນ