ໃນທ້າຍອາທິດ, ຢູ່ທີ່ຫ້ອງປະຊຸມຄະນະກວດກາພັກແຂວງວຽງຈັນ ໄດ້ມີພິທີມອບ-ຮັບໃບຢັ້ງຢືນ ໜ່ວຍພັກສະຫະພັນນັກຮົບເກົ່າ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2023, ໂດຍການເຂົ້າຮ່ວມຂອງສະຫາຍ ນາງ ຈັນທະບູນ ໂພສະລາດ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ມີສະຫາຍ ພັນເອກ ບຸນຍົງ ວົງສີຈັນ ເລຂາໜ່ວຍພັກ ປະທານສະຫະພັນນັກຮົບເກົ່າແຂວງ, ມີເລຂາ, ຮອງເລຂາໜ່ວຍພັກອ້ອມຂ້າງ, ພ້ອມດ້ວຍສະມາຊິກພາຍໃນໜ່ວຍເຂົ້າຮ່ວມ.

ສະຫາຍ ພັນໂທ ຄຳພອນ ຈະເລີນສັກ ຮອງເລຂາໜ່ວຍພັກ ຮອງປະທານສະຫະພັນນັກຮົບເກົ່າແຂວງ ກ່າວບາງຕອນວ່າ: ໄລຍະຜ່ານມາຄະນະພັກ ໄດ້ເອົາໃຈໃສ່ຊີ້ນຳ-ນຳພາສະມາຊິກພັກ-ພະນັກງານຂອງຕົນໃນການປະຕິບັດໜ້າທີ່ວຽກງານ ຕາມ 5 ມາດຖານ, ເອົາໃຈໃສ່ ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກດ້ວຍການນຳເອົາບັນດາແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ ຄັ້ງທີ XI ຂອງຄະນະບໍລິຫານງານສູນກາງພັກ, ຄັ້ງທີ VI ຂອງອົງຄະນະພັກແຂວງ, ມະຕິຄັ້ງທີ IV ຂອງໜ່ວຍພັກສະຫະພັນນັກຮົບເກົ່າແຂວງ ແລະ ມະຕິ, ຄຳສັ່ງ, ກົດລະບຽບພັກ, ກົດໝາຍຂອງລັດ ມາເຊື່ອມຊຶມໃຫ້ສະມາຊິກພັກ-ພະນັກງານ ເປັນແຕ່ລະໄລຍະຢ່າງເປັນປົກກະຕິ. ຢຶດໝັ້ນ 5 ຫຼັກການ, 3 ທິດນໍາ ໃນການສ້າງພັກ, ຢຶດໝັ້ນຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ບຸກຄົນຮັບຜິດຊອບ. ສັງລວມຜົນຂອງການຕີລາຄາປະເມີນຜົນ ຂອງສະມາຊິກພັກ ມີສະມາຊິກພັກ ປະເພດແຂງ ທັງໝົດ 15 ສະຫາຍ ຍິງ 5 ສະຫາຍ ກວມເອົາ 93,75%, ສະມາຊິກພັກກາງ 1 ສະຫາຍ, ກວມເອົາ 6,25%. ສາມາດຈັດປະເພດໜ່ວຍພັກເປັນໜ່ວຍພັກ ແຂງ. ໃຫ້ກຽດມອບໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຄັ້ງນີ້ ໂດຍສະຫາຍ ນາງ ຈັນທະບູນ ໂພສະລາດ ແລະ ຮັບໂດຍ ສະຫາຍ ພັນເອກ ບຸນຍົງ ວົງສີຈັນ .

(ພາບ+ຂ່າວ: ແກ້ວອຸດົມ)