ຄະນະພະນັກງານກຸ່ມແຂ່ງຂັນວຽກງານການເມືອງພາຍໃນແຂວງບິ່ງເຢືອງ ສສ ຫວຽດນາມ, ນຳໂດຍ ທ່ານ ວໍ່ແທ່ງເຢີນ ຮອງຫົວໜ້າພະແນກການຕ່າງປະເທດແຂວງບິ່ງເຢືອງ ໄດ້ເຄື່ອນໄຫວຢ້ຽມຢາມ, ແລກປ່ຽນບົດຮຽນຢູ່ແຂວງຈຳປາສັກ ໃນວັນທີ 16 ຕຸລາ ຜ່ານມາ ຊຶ່ງໄດ້ເຂົ້າຢ້ຽມຂໍ່ານັບການນຳແຂວງ, ໂດຍ ການຕ້ອນຮັບຂອງ ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ຊຶ່ງທ່ານໄດ້ກ່າວຕ້ອນຮັບຢ່າງອົບອຸ່ນ ພ້ອມທັງສະເໜີໃຫ້ຮູ້ຈຸດພິເສດ, ສະພາບລວມ ຂອງການພັດທະນາເສດຖະກິດ-ສັງຄົມ ແຂວງຈຳປາສັກ, ພ້ອມກັນນັ້ນ ກໍຕີລາຄາສູງ ຕໍ່ການມາຢ້ຽມຢາມ ຂອງຄະນະດັ່ງກ່າວ ຊຶ່ງເປັນຂີດໝາຍອັນສຳຄັນ ແລະ ປະກອບສ່ວນເຂົ້າໃນການເສີມສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດລາວ-ຫວຽດນາມ ເວົ້າລວມ, ເວົ້າສະເພາະ ແຂວງບິ່ງເຢືອງ ກັບ ແຂວງຈຳປາສັກ ໃຫ້ນັບມື້ຮ່ວມກັນພັດທະນາ ແລະ ກ້າວເຂົ້າສູ່ລວງເລິກ.
ແຂວງຈຳປາສັກ ກັບ ແຂວງບິ່ງເຢືອງ ໄດ້ມີການພົວພັນຮ່ວມມືນຳກັນນັບແຕ່ປີ 2006, ໄລຍະຜ່ານມາ ຍາມໃດກໍໄດ້ໃຫ້ການເອົາໃຈໃສ່ອູ້ມຊູຊ່ວຍເຫຼືອກັນ,  ມີການພົວພັນນຳກັນຢ່າງເລິກເຊິ່ງ ແລະ ໄດ້ມີການສືບຕໍ່ເຊັນບົດບັນທຶກການຮ່ວມມືໃນແຕ່ລະໄລຍະ. ພ້ອມກັນນັ້ນຍັງໄດ້ຮ່ວມກັນຈັດຕັ້ງຜັນຂະຫຍາຍຜົນສຳເລັດບັນດາເນື້ອໃນທີ່ໄດ້ຕົກລົງກັນໃນບົດບັນທຶກ ແລະ ມີຫຼາຍຂົງເຂດທີ່ສາມາດຈັດຕັ້ງປະຕິບັດໄດ້ຮັບປະສິດທິຜົນຢ່າງທີ່ໜ້າເພິ່ງພໍໃຈ ແລະ ເປັນຮູບປະທຳເຊັ່ນ: ການແລກປ່ຽນຄະນະຜູ້ແທນຂັ້ນສູງຂອງແຂວງ, ການພົບປະແລກປ່ຽນຂັ້ນພະແນກການ, ກົມກອງ ແລະ ອົງການຈັດຕັ້ງມະຫາຊົນຂັ້ນຕ່າງໆ ແລະ ເປັນຕົ້ນແມ່ນ ວຽກງານການກໍ່ສ້າງຊັບພະຍາກອນມະນຸດ; ການຮ່ວມມືທາງດ້ານເສດຖະກິດ-ສັງຄົມ ແລະ ການຮ່ວມມືດ້ານສະຫວັດດີການສັງຄົມ ແຂວງບິ່ງເຢືອງໄດ້ສ້າງເງື່ອນໄຂຂໍ້ສະດວກ ໃຫ້ແກ່ພະນັກງານອາວຸໂສບຳນານ ຂອງແຂວງຈຳປາສັກ ໄດ້ໄປກວດເຊັກສຸຂະພາບ ແລະ ໃນການຢ້ຽມຢາມແຂວງຈຳປາສັກ ຄັ້ງນີ້,  ຄະນະພະນັກງານກຸ່ມແຂ່ງຂັນວຽກງານການເມືອງພາຍໃນ ແຂວງບິ່ງເຢືອງ ສສ ຫວຽດນາມ ຍັງໄດ້ຢ້ຽມຢາມ, ແລກປ່ຽນບົດຮຽນ ຮ່ວມກັບ ກອງບັນຊາການທະຫານແຂວງ; ກອງບັນຊາການ ປກສ ແຂວງ ແລະ ຢ້ຽມຢາມໂຮງງານປຸງແຕ່ງຢາງພາລາຂອງບໍລິສັດ ຫຸ້ນສ່ວນພັດທະນາຢາງພາລາ ເຢົ່າຕ໋ຽນ ຫວຽດ-ລາວ ຕື່ມອີກ. 
(ຂ່າວ-ພາບ: ທັດຊະນະ)