ບົດຄຳເຫັນຂອງ ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ສປປ ລາວ

ເນື່ອງໃນໂອກາດທີ່ ສປປ ລາວ ເຂົ້າເປັນສະມາຊິກຂອງສະຫະພັນອາຫານໃນໂຮງຮຽນ.

ສປປ ລາວ ພວມຢູ່ໃນໄລຍະສຳຄັນ ຂອງການປັບປຸງວຽກງານດ້ານໂພຊະນາການ ແລະ ການສຶກສາຂອງເດັກ. ໃນອາທິດຜ່ານມາ, ພວກເຮົາໄດ້ລົງນາມໃນຄຳຖະແຫຼງການເຂົ້າເປັນສະມາຊິກຂອງສະຫະພັນອາຫານໃນໂຮງຮຽນ ຊຶ່ງເປັນອົງການຈັດຕັ້ງສາກົນທີ່ໄດ້ເອົາໃຈໃສ່ເຮັດວຽກເພື່ອເສີມສົ່ງໂພຊະນາການ, ການສຶກສາ ແລະ ສະຫວັດດີການຂອງເດັກ ໂດຍຜ່ານການຈັດຕັ້ງປະຕິບັດໂຄງການອາຫານໃນໂຮງຮຽນຢ່າງຮອບດ້ານ. ການເຂົ້າເປັນສະມາຊິກຂອງສະຫະພັນອາຫານໃນໂຮງຮຽນຄັ້ງນີ້, ບໍ່ພຽງແຕ່ເປັນການຢືນຢັນຄວາມມຸ່ງໝັ້ນຂອງລັດຖະບານ ໃນການປັບປຸງການດຳລົງຊີວິດຂອງເດັກນ້ອຍ, ແຕ່ຍັງເປັນການເປີດປະຕູສູ່ໂລກແຫ່ງການຮຽນຮູ້, ນະວັດຕະກໍາ ແລະ ການຮ່ວມມື ທີ່ຄາດວ່າຈະຊ່ວຍຊຸກຍູ້ສົ່ງເສີມ ແລະ ສ້າງຄວາມເຂັ້ມແຂງໃຫ້ວຽກງານສົ່ງເສີມອາຫານທ່ຽງໃນໂຮງຮຽນຂອງພວກເຮົາ.

ວຽກງານສົ່ງເສີມອາຫານທ່ຽງໃນໂຮງຮຽນ ແມ່ນໜຶ່ງໃນແຜນບຸລິມະສິດທີ່ຈຳເປັນທີ່ສຸດ ໃນຂະແໜງສາທາລະນະສຸກ (ສຸຂະພາບ) ແລະ ໂພຊະນາການສຳລັບລູກຫຼານຂອງພວກເຮົາ. ຈາກການສຶກສາຄົ້ນຄວ້າ ໄດ້ສະແດງໃຫ້ເຫັນວ່າທຸກໆການລົງທຶນໜຶ່ງໂດລາໃນວຽກງານດັ່ງກ່າວ ຈະໄດ້ຮັບຜົນຕອບແທນເຖິງ 8 ໂດລາ. ເດັກນ້ອຍທີ່ໄດ້ຮັບຜົນປະໂຫຍດຈາກວຽກງານສົ່ງເສີມອາຫານທ່ຽງໃນໂຮງຮຽນ ຈະສືບຕໍ່ເຂົ້າມາໂຮງຮຽນດົນນານກວ່າ ເດັກທີ່ບໍ່ໄດ້ຮັບອາຫານທ່ຽງ ເປັນເວລາເຄິ່ງປີ. ວຽກງານດັ່ງກ່າວ ນອກຈາກ​ຊ່ວຍ​ປັບ​ປຸງ​ຜົນ​ໄດ້ຮັບດ້ານການ​ສຶກ​ສາ​ ​ຍັງ​ເປັນ​ເຄື່ອງ​ມື​ໃນ​ການ​ປັບ​ປຸງ​ໂພ​ຊະ​ນາ​ການ​ ແລະ ​ສຸ​ຂະ​ພາບ​ຂອງ​ເດັກ​ນ້ອຍ​ ພ້ອມທັງຊ່ວຍ​ເຫຼືອ​ຄອບ​ຄົວຂອງເຂົາເຈົ້າ ​ຕໍ່​ສູ້​ກັບ​ຄວາມ​ບໍ່​ໝັ້ນຄົງດ້ານ​ສະ​ບຽງ​ອາ​ຫານ.

ຫຼາຍກວ່າສອງທົດສະວັດແລ້ວ ທີ່ລັດຖະບານລາວ ກໍຄືກະຊວງສຶກສາທິການ ແລະ ກິລາ ໄດ້ຖືເອົາວຽກງານສົ່ງເສີມອາຫານທ່ຽງໃນໂຮງຮຽນເປັນວຽກໜຶ່ງທີ່ສຳຄັນ. ນັບແຕ່ປີ 2010 ເປັນຕົ້ນມາ, ວຽກງານດັ່ງກ່າວ ຖືກກຳນົດໃຫ້ເປັນແຜນງານແຫ່ງຊາດ ແລະ ນັບແຕ່ປີ 2020 ຫຼັງການມອບໂອນ, ລັດຖະບານລາວ ໄດ້ຈັດສັນງົບປະມານຈຳນວນໜຶ່ງ ເພື່ອຊຸກຍູ້ໃນການຈັດຕັ້ງປະຕິບັດ, ພ້ອມທັງອອກດຳລັດນາຍົກລັດຖະມົນຕີ ວ່າດ້ວຍການສົ່ງເສີມອາຫານທ່ຽງໃນໂຮງຮຽນ ໄດ້ຖືກຮັບຮອງຈາກລັດຖະບານ ໃນປີ 2022. ປັດຈຸບັນ, ວຽກງານສົ່ງເສີມອາຫານໃນໂຮງຮຽນ ກວມເອົາ 1/4 ຂອງໂຮງຮຽນປະຖົມທັງໝົດໃນ ສປປ ລາວ ໃນນັ້ນມີເດັກນ້ອຍເກືອບ 250.000 ຄົນ ທີ່ໄດ້ຮັບຜົນປະໂຫຍດ. ເປົ້າໝາຍຂອງພວກເຮົາແມ່ນ ການຂະຫຍາຍວຽກງານສົ່ງເສີມອາຫານໃນໂຮງຮຽນ ເພື່ອໃຫ້ເດັກນ້ອຍທຸກຄົນໃນທົ່ວປະເທດໄດ້ຮັບອາຫານທ່ຽງໃນໂຮງຮຽນ; ພວກເຮົາມີຄວາມມຸ່ງໝັ້ນຕໍ່ກັບເປົ້າໝາຍດັ່ງກ່າວ ເພາະວ່າວຽກງານສົ່ງເສີມອາຫານທ່ຽງໃນໂຮງຮຽນ ເປັນຫຼາຍກວ່າການກິນອາຫານ-ເປັນເຄື່ອງມືທີ່ມີປະສິດທິພາບໃນການຕໍ່ສູ້ກັບການຂາດສານອາຫານ, ປັບປຸງຜົນໄດ້ຮັບດ້ານການສຶກສາ ແລະ ສົ່ງເສີມການພັດທະນາແບບຍືນຍົງ. ການຮັບປະກັນໃຫ້ເດັກນ້ອຍທຸກຄົນໄດ້ຮັບອາຫານທີ່ມີໂພຊະນາການ ເປັນບຸລິມະສິດອັນຮີບດ່ວນ ແລະ ເປັນການລົງທຶນໄລຍະຍາວໃນການພັດທະນາຊັບພະຍາມະນຸດຂອງປະເທດ.

ໃນເວລານີ້ ແມ່ນເວລາທີ່ຈະຕ້ອງໄດ້ກ້າວໄປຂ້າງໜ້າ. ປັດຈຸ​ບັນ, ບາງ​ຄອບຄົວ ກຳລັງ​ປະສົບ​ກັບ​ຄວາມ​ຫຍຸ້ງຍາກ ​ດ້ານສະບຽງ​ອາຫານ ຊຶ່ງວຽກງານສົ່ງເສີມອາຫານທ່ຽງໃນໂຮງຮຽນ ມີຄວາມສຳຄັນຫຼາຍສໍາລັບຄອບຄົວເຫຼົ່ານັ້ນ. ສະນັ້ນ, ພວກເຮົາຈຳເປັນຕ້ອງຮ່ວມມືກັບທຸກພາກສ່ວນ ເພື່ອສ້າງຄວາມສະຖຽນລະພາບ ແລະ ຄວາມເຂັ້ມແຂງໃຫ້ແກ່ໂຄງປະກອບສ້າງຂອງວຽກງານອາຫານທ່ຽງໃນໂຮງຮຽນ ແລະ ໃນຂະນະດຽວກັນ ກໍສືບຕໍ່ຂະຫຍາຍເປົ້າໝາຍການສະໜັບສະໜູນ; ພວກເຮົາມີຄວາມເຊື່ອໝັ້ນວ່າ ສະຫະພັນອາຫານໃນໂຮງຮຽນ ຈະສາມາດຊ່ວຍຊຸກຍູ້ສົ່ງເສີມການສ້າງຄວາມສະຖຽນລະພາບ ແລະ ຄວາມເຂັ້ມແຂງ ໃຫ້ກັບແຜນງານສົ່ງເສີມອາຫານທ່ຽງໃນໂຮງຮຽນໃນ ສປປ ລາວ. ສະຫະພັນອາຫານໃນໂຮງຮຽນ ໄດ້ຖືກເປີດຕົວຢ່າງເປັນທາງການໃນກອງປະຊຸມສຸດຍອດກ່ຽວກັບລະບົບສະບຽງອາຫານ ໂດຍອົງການອາຫານໂລກ ແລະ ລັດຖະບານ ປະເທດຝຣັ່ງ ໃນເດືອນກັນຍາ 2021 ໂດຍການເປັນປະທານ ຮ່ວມຈາກປະເທດຝຣັ່ງ, ແຟງລັງ ແລະ ບຣາຊິນ ຊຶ່ງມີເປົ້າໝາຍແນໃສ່ຮັບປະກັນວ່າ ເດັກນ້ອຍທຸກຄົນໄດ້ຮັບອາຫານທີ່ມີໂພຊະການຢູ່ໂຮງຮຽນທຸກໆມື້ ພາຍໃນປີ 2030. ກອງປະຊຸມສຸດຍອດຄັ້ງປະຖົມມະລຶກ ຂອງສະຫະພັນອາຫານໃນໂຮງຮຽນ ໄດ້ຈັດຂຶ້ນທີ່ນະຄອນຫຼວງປາຣີ ໃນເດືອນຕຸລາ ປີ 2023, ໂດຍການສະໜັບສະໜູນຂອງປະທານາທິບໍດີປະເທດຝຣັ່ງ.

ບັນດາສະມາຊິກສະຫະພັນອາຫານໃນໂຮງຮຽນທົ່ວໂລກເກືອບ 100 ປະເທດ ມີຄວາມມຸ່ງໝັ້ນທີ່ຈະເຮັດໃຫ້ອາຫານໃນໂຮງຮຽນທີ່ມີໂພຊະນາການ ກາຍເປັນສິດທິລວມສູນລະດັບສາກົນ ພາຍໃນປີ 2030. ບັນດາປະເທດສະມາຊິກຂອງສະຫະພັນ ແມ່ນມາຈາກທຸກທະວີບ ແລະ ຫຼາກຫຼາຍລະດັບຂອງການພັດທະນາ, ລວມທັງບັນດາປະເທດທີ່ຈັດຕັ້ງປະຕິບັດວຽກອາຫານໃນໂຮງຮຽນມາຫຼາຍສິບປີຈົນປະສົບຜົນສໍາເລັດ. ການເຂົ້າເປັນສະມາຊິກສະຫະພັນອາຫານໃນໂຮງຮຽນຄັ້ງນີ້, ສປປ ລາວ ຈະໄດ້ຮັບຜົນປະໂຫຍດຈາກປະສົບການ ແລະ ນະວັດຕະກໍາຕ່າງໆທີ່ມີຈາກບັນດາປະເທດສະມາຊິກ. ພວກເຮົາຈະຮຽນຮູ້ຈາກຄວາມສໍາເລັດ ແລະ ສິ່ງທ້າທາຍ ພ້ອມທັງການປັບໃຊ້ບົດຮຽນທີ່ປະຕິບັດໄດ້ດີ ໃຫ້ແທດເໝາະກັບສະພາບການທ້ອງຖິ່ນຂອງພວກເຮົາ.

ອີກໜຶ່ງໂອກາດທີ່ສໍາຄັນຂອງການເຂົ້າເປັນສະມາຊິກສະຫະພັນອາຫານໃນໂຮງຮຽນ ແມ່ນໂອກາດໃນການສົ່ງເສີມການຊື້ອາຫານໃນທ້ອງຖິ່ນ ເພື່ອສະໜອງໃຫ້ແກ່ໂຮງຮຽນ, ໂດຍການເຊື່ອມສານລະຫວ່າງກຸ່ມຊາວກະສິກອນທ້ອງຖິ່ນ ແລະ ໂຮງຮຽນເປົ້າໝາຍ. ປະເທດທີ່ໂຄງການອາຫານໃນໂຮງຮຽນມີການຈັດຕັ້ງປະຕິບັດໄດ້ດີ ແລະ ມີຄວາມຍືນຍົງ ສ່ວນໃຫຍ່ແລ້ວແມ່ນນຳໃຊ້ແນວຄວາມຄິດດັ່ງກ່າວນີ້ ເນື່ອງຈາກຈະຊ່ວຍສະໜັບສະໜູນຊາວກະສິກອນທ້ອງຖິ່ນ ແລະ ຫຼຸດຜ່ອນການເພິ່ງພາອາໄສແຫຼ່ງອາຫານພາຍນອກ. ໃນຂະນະດຽວກັນ, ຍັງຊ່ວຍສົ່ງເສີມການກະສິກໍາແບບຍືນຍົງ. ​ເມື່ອ​ບໍ່​ດົນ​ມາ​ນີ້, ກໍໄດ້ມີການປະກາດນຳໃຊ້ ມາດຕະຖານ​ຂັ້ນຕ່ຳດ້ານໂພຊະນາ​ການໃນ​ໂຮງຮຽນ ຂອງສະມາຄົມອາ​ຊຽນ ຊຶ່ງໃນນັ້ນລວມມີ​ມາດຕະຖານ​ ​ກ່ຽວ​ກັບ​ການຈັດ​ຊື້​ຢູ່ຂັ້ນທ້ອງ​ຖິ່ນ ​ເພື່ອ​ສ້າງຄວາມຍືນຍົງຂອງຕ່ອງໂສ້ການ​ສະໜອງ​ອາຫານ​ໃຫ້​ໂຮງຮຽນ.

ນອກຈາກນັ້ນ, ການເຂົ້າເປັນສະມາຊິກສະຫະພັນອາຫານໃນໂຮງຮຽນ ຍັງຈະຊ່ວຍຊຸກຍູ້ວຽກງານການສ້າງລະບົບຕ່ອງໂສ້ການສະໜອງອາຫານໃນທ້ອງຖິ່ນໃຫ້ແກ່ໂຮງຮຽນ, ແນໃສ່ສົ່ງເສີມການກິນອາຫານພືດຜັກສີຂຽວ ຊຶ່ງບໍ່ພຽງແຕ່ດີຕໍ່ສຸຂະພາບຂອງເດັກ, ແຕ່ຍັງດີຕໍ່ສິ່ງແວດລ້ອມຂອງໂລກ. ພວກເຮົາເຊື່ອວ່າການປັບຕົວຕາມການປ່ຽນແປງຂອງສະພາບອາກາດ ແມ່ນຫົວໃຈຂອງຍຸດທະສາດອາຫານໃນໂຮງຮຽນ. ດ້ວຍການນຳໃຊ້ການຜະລິດກະສິກຳແບບຍືນຍົງ ແລະ ສົ່ງເສີມການຜະລິດອາຫານທ້ອງຖິ່ນທີ່ມີທາດບຳລຸງສູງ ແລະ ຜະລິດຕາມລະດູການ, ພວກເຮົາ ຈະສາມາດຫຼຸດຜ່ອນການປ່ອຍກາກບອນໃນໂຮງຮຽນ ພ້ອມທັງສະໜັບສະໜູນຊາວກະສິກອນ ແລະ ຊ່ວຍຮັກສາສິ່ງແວດລ້ອມ.

ວຽກງານສົ່ງເສີມອາຫານໃນໂຮງຮຽນ ຍັງມີບົດບາດສໍາຄັນໃນການເສີມສ້າງຄວາມເຂັ້ມແຂງໃຫ້ແມ່ຍິງ ໂດຍສະເພາະຜູ້ແຕ່ງກິນ ທີ່ມາກະກຽມ ແລະ ປຸງແຕ່ງອາຫານໃຫ້ເດັກນ້ອຍ ແລະ ອະນາໄມເຮືອນຄົວ. ໃນຂະນະທີ່ພວກເຮົາໄດ້ຂະຫຍາຍ ແລະ ຍົກສູງຄຸນນະພາບຂອງແຜນງານອາຫານໃນໂຮງຮຽນ, ພວກເຮົາຕ້ອງສືບຕໍ່ສະໜັບສະໜູນແມ່ຍິງເຫຼົ່ານັ້ນ ດ້ວຍຄ່າຕອບແທນທີ່ເໝາະສົມ, ການຝຶກອົບຮົມ, ໂອກາດຕ່າງໆ ເພື່ອຄວາມກ້າວໜ້າ ແລະ ການຮັບຮູ້ເຖິງບົດບາດອັນສຳຄັນຂອງເຂົາເຈົ້າໃນວຽກງານການປັບປຸງສຸຂະພາບ ແລະ ການສຶກສາຂອງເດັກນ້ອຍ; ດ້ວຍການສະໜັບສະໜູນຊ່ວຍເຫຼືອຈາກສະຫະພັນອາຫານໃນໂຮງຮຽນ, ສິ່ງທີ່ໄດ້ກ່າວມາທັງໝົດນີ້ໝາຍຄວາມວ່າ ໂຮງຮຽນເປົ້າໝາຍ ແມ່ນມີທ່າແຮງໃນການປະກອບສ່ວນເຂົ້າໃນການຫຼຸດຜ່ອນຄວາມທຸກຍາກ ແລະ ການພັດທະນາປະເທດ, ໂດຍການລິເລີ່ມຈາກການສ້າງວົງຈອນຂອງຄວາມຕ້ອງການ ແລະ ການສະໜອງທີ່ສາມາດຊ່ວຍຊຸມຊົນໃຫ້ຫຼຸດພົ້ນອອກຈາກຄວາມທຸກຍາກ ຊຶ່ງອີກດ້ານໜຶ່ງກໍຈະ​ຊ່ວຍໃຫ້ມີ​​ແຮງ​ງານທີ່ເຂັ້ມແຂງ ແລະ ມີຄຸນນະພາບໃນ​​ຕໍ່ໜ້າ.

ການເຂົ້າເປັນສະມາຊິກຂອງສະຫະພັນອາຫານໃນໂຮງຮຽນ ເປັນຂີດໝາຍທີ່ສຳຄັນໃນຄວາມພະຍາຍາມຢ່າງຕໍ່ເນື່ອງ ເພື່ອສ້າງສັງຄົມໃຫ້ເຂັ້ມແຂງ, ມີສຸຂະພາບດີ ແລະ ມີການສຶກສາທີ່ດີຂຶ້ນ ຊຶ່ງໄດ້ສະແດງໃຫ້ເຫັນເຖິງຄໍາໝັ້ນສັນຍາທີ່ມີຕໍ່ເດັກນ້ອຍ, ຊຸມຊົນ ແລະ ໂລກຂອງພວກເຮົາ. ​ດ້ວຍ​ການນຳ​ໃຊ້ປະສົບການ-​ທັກສະຄວາມຮູ້ໃນວຽກງານ ​ແລະ ນະວັດຕະກຳຂອງສາກົນ, ພວກ​ເຮົາ​ໝັ້ນ​ໃຈ​ວ່າ ສປປ ລາວ ສາມາດ​ສ້າງ​ວຽກງານສົ່ງເສີມອາຫານທ່ຽງໃນໂຮງຮຽນ​ ໃຫ້​ມີ​ລັກສະນະທີ່ແທດເໝາະກັບ​ທ້ອງ​ຖິ່ນ, ​ເປັນ​ມິດຕໍ່​ສິ່ງແວດລ້ອມ ​ແລະ ສ້າງການປ່ຽນແປງ​ ແລະ ການພັດທະນາ ໃຫ້​ຄົນ​ຮຸ່ນຫຼັງ.