ລາຍການແຂ່ງຂັນກິລາປິ່ງປ່ອງຊາວໜຸ່ມ ເຍົາວະຊົນໂລກ 2024 ຫຼື WTT youth contender 2024 ທີ່ ສປປ ລາວ ໄດ້ຮັບກຽດເປັນເຈົ້າພາບເປັນຄັ້ງທີ 2 ໄດ້ມີພິທີເປີດຢ່າງເປັນທາງການ ໃນຕອນແລງຂອງວັນທີ 18 ກັນຍາ ນີ້ ທີ່ສູນການຄ້າ ລາວ-ໄອ ເຕັກນະຄອນຫຼວງວຽງຈັນ ໂດຍໃຫ້ກຽດເປັນປະທານກ່າວເປີດຂອງທ່ານພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາປະທານຄະນະກຳມະການໂອແລັມປິກແຫ່ງຊາດລາວ, ມີທ່ານ ນາງ ແສງເດືອນ ຫຼ້າຈັນທະບູນ ປະທານສະຫະພັນກິລາປິ່ງປ່ອງແຫ່ງຊາດລາວປະທານຄະນະກຳມະການຈັດງານແຂ່ງຂັນກິລາປິ່ງປ່ອງຊາວໜຸ່ມເຍົາວະຊົນໂລກ 2024 ແລະ ທ່ານ ນາງ ວຽງເງິນ ໄຂຄຳພິທູນ ພັນລະຍາທ່ານຮອງນາຍົກລັດຖະມົນຕີແຫ່ງ ສປປ ລາວ ທັງເປັນທີ່ປຶກສາກິດຕິມະສັກຂອງການແຂ່ງຂັນ, ພ້ອມດ້ວຍຕາງໜ້າຜູ້ສະໜັບສະໜູນຫຼາຍພາກສ່ວນ, ຄະນະນໍາ, ຄູຝຶກ ແລະ ນັກກິລາຈາກບັນດາປະເທດຕ່າງໆ ຕະຫຼອດຮອດສື່ມວນຊົນເຂົ້າຮ່ວມຢ່າງພ້ອມພຽງ.
ທ່ານ ນາງ ແສງເດືອນ ຫຼ້າຈັນທະບູນ ໄດ້ກ່າວລາຍງານວ່າ: ການແຂ່ງຂັນກິລາປິງປ່ອງຊາວໜຸ່ມ ເຍົາວະຊົນໂລກ 2024 ທີ່ ສປປ ລາວ ໄດ້ຮັບກຽດເປັນເຈົ້າພາບເປັນຄັ້ງທີ 2 ຕໍ່ຈາກປີ 2023 ຊຶ່ງຄັ້ງນີ້ມີນັກກິລາຈາກ 14 ປະເທດເຂົ້າຮ່ວມຊີງໄຊ ປະກອບມີ ສປປ ລາວ, ໄທ, ສສ ຫວຽດນາມ, ກຳປູເຈຍ, ສເກົາຫຼີ, ມາເລເຊຍ, ສິງກະໂປ, ຮົງກົງ, ໄຕຫວັນ (ຈີນ), ອິນເດຍ, ມານດິວ, ອົສຕຣາລີ, ໂຄລົມບີ ແລະ ອິນໂດເນເຊຍ ໂດຍມີນັກກິລາທັງໝົດ 201 ຄົນ ຍິງ 80 ຄົນ, ມີຕັ້ງແຕ່ອາຍຸ 11, 13, 15, 17 ແລະ 19 ປີ ຊີງໄຊລະຫວ່າງວັນທີ 18-21 ກັນຍາ ນີ້. ການແຂ່ງຂັນລາຍການນີ້, ແມ່ນມີຄວາມໝາຍຄວາມສໍາຄັນຫຼາຍດ້ານ ເປັນຕົ້ນເປັນການເພີ່ມທະວີຮັດແໜ້ນຄວາມສາມັກຄີກັບບັນດາປະເທດຕ່າງໆໃນໂລກ ແລະ ເປັນໂອກາດທີ່ດີໃຫ້ແກ່ການພັດທະນາບຸກຄະລາກອນທ້າງດ້ານກິລາ-ກາຍຍະກຳ ທັງເປັນການຊຸກຍູ້ສົ່ງເສີມການທ່ອງທ່ຽວຂອງສປປ ລາວຕື່ມອີກ.
ໂອກາດດຽວກັນ, ທ່ານ ພຸດ ສິມມາລາວົງ ຕາງໜ້າໃຫ້ແກ່ຄະນະຮັບຜິດຊອບຈັດການແຂ່ງຂັນ ສະແດງຄວາມຂອບໃຈມາຍັງການນໍາທຸກຂັ້ນ, ຜູ້ໃຫ້ການສະໜັບສະໜູນ ແລະ ທຸກພາກສ່ວນທີ່ມີສ່ວນຮ່ວມ ທີ່ໄດ້ເສຍສະຫຼະເຫື່ອແຮງ ສະຕິປັນຍາ ພ້ອມທັງກຳລັງຊັບ ເຮັດໃຫ້ການກະກຽມຄວາມພ້ອມຈັດການແຂ່ງຂັນ ໄດ້ຕາມກຳນົດທີ່ວາງໄວ້ແລະໄດ້ເປີດການແຂ່ງຂັນຢ່າງເປັນທາງການ.
(ຂ່າວ: ດາວຫວຽດ)