ສະມາຄົມນັກທຸລະກິດຮ້ານອາຫານລາວ ຮ່ວມກັບບໍລິສັດ ເບຍລາວ ຈໍາກັດ ຈັດແຂ່ງຂັນກິລາຕີດອກປີກໄກ່ ຂຶ້ນເມື່ອບໍ່ດົນມານີ້ ຢູ່ສະໂມສອນກິລາດອກປີກໄກ່ ບໍລິສັດ ເບຍລາວ ຈໍາກັດ ໂດຍມີທ່ານ Paul Bateman ຜູ້ອຳນວຍການຝ່າຍຂາຍ ບໍລິສັດເບຍລາວ ຈຳກັດ, ທ່ານ ອູ່ຊ້າງ ແສງທອງ ຜູ້ຈັດການພາກນະຄອນຫຼວງວຽງຈັນ ບໍລິສັດ ເບຍລາວ ຈໍາກັດ ທີ່ປືກສາຊີ້ນໍາສະມາຄົມນັກທຸລະກິດຮ້ານອາຫານລາວ, ທ່ານ ຄໍາແພງ ເພົ້າບົວວົງ ປະທານສະມາຄົມນັກທຸລະກິດຮ້ານອາຫານລາວ ພ້ອມດ້ວຍຄະນະບໍລິຫານ ແລະ ສາມາຊິກ ເຂົ້າຮ່ວມ.
ການແຂ່ງຂັນງານດັ່ງກ່າວເປັນໜຶ່ງກິດຈະກຳທີ່ນອນໃນໂຄງການເຄື່ອນໄຫວການແຂ່ງຂັນ  ຂອງສະມາຄົມນັກທຸລະກິດຮ້ານອາຫານລາວ ຮ່ວມກັບບໍລິສັດ ເບຍລາວ ຈໍາກັດ ຈັດຂຶ້ນໃນປີ 2024ນີ້ ເພື່ອສ້າງໂອກາດລະຫວ່າງພະນັກງານ, ລູກຄ້າ, ຄູ່ຮ່ວມທຸລະກິດໃຫ້ມີຄວາມຮັດແໜ້ນສາມັກຄີ ຮັກແພງ ແນໃສ່ສ້າງໂອກາດໃນການແລກປ່ຽນວຽກງານການປະກອບທຸລະກິດຮ້ານອາຫານໃຫ້ມີຄວາມເຂັ້ມແຂງສາມາດປະກອບສ່ວນການສ້າງສາພັດທະນາເສດຖະກິດ-ສັງຄົມຂອງຊາດໃຫ້ນັບມື້ເຕີບໃຫຍ່ຂະຫຍາຍຕົວ, ໂດຍຖືເອົາການສ້າງຂະບວນການກິລາເປັນສື່ກາງ ເພື່ອພົບປະໂອ້ລົມ ແລະ ອອກກໍາລັງກາຍເຮັດໃຫ້ສຸຂະພາບແຂງແຮງ. ນອກນີ້, ກໍຍັງເປັນການສ້າງຂະບວນການຕ້ອນຮັບ-ຊົມເຊີຍວັນສໍາຄັນຕ່າງໆຂອງພັກຊອງຊາດ ຕຶື່ມອີກ.

ການແຂ່ງຂັນຄັ້ງນີ້ ແບ່ງເປັນ 2 ປະເພດ ຄື: ປະເພດຊາວໜຸ່ມ ແລະ ປະເພດອາວຸໂສ ໃນນີ້ປະເພດຊາວໜຸ່ມມີນັກກິລາເຂົ້າຮ່ວມ 32 ທ່ານ, ປະເພດອາວຸໂສ 20 ທ່ານ ຊຶ່ງໄດ້ປະກົບຄູ່ແຂ່ງຂັນ ຊະນະໄດ້ເຂົ້າຮອບຕໍ່ໄປ ຜ່ານການແຂ່ງຂັນປະເພດຊາວໜຸ່ມ ທີ1 ເປັນຂອງທ່ານ ສາຍເພັດ+ທ່ານ ກ້າ,ທີ2 ທ່ານ ສັນຕິພາບ+ທ່ານ ນໍ້າ. ສ່ວນປະເພດອາວຸໂສ ທີ1 ໄດ້ແກ່ທ່ານ ອູ່ຊ້າງ+ທ່ານ ຄໍາອັອດ ແລະທີ2 ທ່ານ ບຸນສຸກ+ທ່ານນາງ ພິດສະໝອນ. 
(ຂ່າວ-ພາບ:ອ້ວນດຳ)