ການແຂ່ງຂັນກິລາບານສົ່ງໃນຮົ່ມ ຊາຍ-ຍິງ 2024 ຫຼື ແຂ່ງຂັນກິລາບານສົ່ງລາວລີກ ລາຍການ BEER Laos Volleyball League 2024 ໄດ້ເປີດຂຶ້ນຫວ່າງບໍ່ດົນມານີ້ ທີ່ເດີ່ນບານສົ່ງໃນຮົ່ມກອງທັບຫຼັກ 5 ບ້ານຈອມມະນີ ເມືອງໄຊນານີ ນະຄອນຫຼວງວຽງຈັນ ໂດຍມີທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ຫຼື ສສກ ປະທານຄະນະກຳມະການໂອແລັມປິກແຫ່ງຊາດລາວ; ທ່ານ ແສງພອນ ພົມອາມາດ ຮອງປະທານ-ເລຂາທິການ ຄະນະກຳມະການໂອແລັມປິກແຫ່ງຊາດລາວ, ທ່ານ ພອລ ບາຣທແມນ (Paul BARTMAN) ຜູ້ອຳນວຍການຝ່າຍຂາຍ ແລະ ຊ່ອງທາງການຈັດຈຳໜ່າຍ ບໍລິສັດ ເບຍລາວ ຈຳກັດ, ທ່ານ ຈັນສະໝອນ ຜອງຈັນທາ ປະທານສະຫະພັນບານສົ່ງແຫ່ງຊາດລາວ ຫຼື ສບສ ພ້ອມດ້ວຍຄະນະບໍລິຫານງານ ສບສ, ຄະນະນຳ, ຄູຝຶກ ແລະ ນັກກິລາເຂົ້າຮ່ວມ.

ການແຂ່ງຂັນໃນລາຍການນີ້ ຈັດຂຶ້ນເພື່ອສ້າງຂະບວນການຂໍ່ານັບຮັບຕ້ອນ ແລະ ສະເຫຼີມສະຫຼອງ ວັນຊາດທີ 2 ທັນວາ ຄົບຮອບ 49 ປີ ພ້ອມທັງສືບຕໍ່ພັດທະນາກິລາບານສົ່ງຂອງ ສປປ ລາວ ໃຫ້ມີຂະບວນການຝຶກຊ້ອມ ແລະ ແຂ່ງຂັນຢ່າງກວ້າງຂວາງ ແລະ ຕໍ່ເນື່ອງ ທັງນີ້ ກໍເພື່ອຍົກລະດັບ ແລະ ພັດທະນາຄວາມສາມາດຂອງນັກກິລາ, ຄະນະກຳມະການເຕັກນິກຈັດການແຂ່ງຂັນ ແລະ ກຳມະການຕັດສິນກິລາບານສົ່ງຂອງລາວເຮົາໃຫ້ມີຄຸນນະພາບສູງຂຶ້ນ. ກ້າວສູ່ສາກົນ, ອີກດ້ານໜຶ່ງ ກໍເພື່ອເປັນການຄັດເລືອກນັກກິລາບານສົ່ງຊາຍ-ຍິງ ຜູ້ທີ່ມີພອນສະຫວັນ ເພື່ອເຂົ້າຝຶກຊ້ອມ ບັນຈຸເຂົ້າເປັນນັກກິລາທີມຊາດລາວ ກຽມເຂົ້າຮ່ວມການແຂ່ງຂັນ ຊີເກມ ຄັ້ງທີ 33 ທີ່ປະເທດໄທ ຈະເປັນເຈົ້າພາບ ໃນປີ 2025 ແລະ ລາຍການຕ່າງໆລະດັບພາກພື້ນ ແລະ ສາກົນ ຊຶ່ງປີນີ້ ມີທີມນັກກິລາເຂົ້າຮ່ວມແຂ່ງຂັນທັງໝົດ 15 ທີມ, ໃນນັ້ນ ເພດຍິງມີທັງໝົດ 5 ທີມ ແລະ ທີມຊາຍ 8 ທີມ.

ສໍາລັບທີມຊາຍມີຄື: ນະຄອນຫຼວງວຽງຈັນ by INTHASONE, ສະໂມສອນ ກະຊວງປ້ອງກັນປະເທດ ຫຼື ກອງທັບ, ສະໂມສອນ ວຽງຈັນ, ສະໂມສອນ ລາວສະກາຍເວ (Lao Skyway), ສະໂມສອນ ໂກຣ-ອັບ (GROW-UP), ສະໂມສອນ ອິນເທັນເຊິນ (INTENTION), ສະໂມສອນ ເອັມພີຊີ (MPC BLUE HAWAII), ສະໂມສອນ ເອັດອີຊີ (SEC), ສະໂມສອນ ແບັກ ບັດເຕີຟາຍ (BLACK BUTTERFLY) ແລະ ສະໂມສອນ ສັນນິວາດ (SUNNIVAD). ສ່ວນທີມຍິງມີ 5 ທີມ ຄື: ສະໂມສອນກົມໃຫຍ່ການເມືອງ ກອງທັບ, ສະໂມສອນ ກະຊວງປ້ອງກັນປະເທດ, ສະໂມສອນ ວຽງຈັນ, ສະໂມສອນ ເອັດອີຊີ (S.E.C) ແລະ ສະໂມສອນ ເອັດເອັນເຄ ໄຊເຊດຖາ (SNK Saysettha).

ການແຂ່ງຂັນນຳໃຊ້ລະບົບແບບລີກ ທັງສອງປະເພດແມ່ນແຂ່ງຂັນພົບກັນໝົດ ໃນຮອບຂາໄປ ແຂ່ງຂັນສະເພາະແຕ່ວັນເສົາ ແລະ ວັນອາທິດ ໂດຍໄດ້ຮັບການສະໜັບສະໜູນຫຼັກຈາກ ບໍລິສັດເບຍລາວ ຈໍາກັດ, ນໍ້າດື່ມຫົວເສືອ, ສະຕິງ, ຣິໄວ້ທ ແລະ ຄູ່ຮ່ວມພັດທະນາ ຄື ບໍລິສັດ ເອັດພີພີ SPP, ບໍລິສັດຄົມປັນຍາ (KHOMPANYA) ແລະ ບໍລິສັດ ອິນດີ (Indee), ກຸ່ມບໍລິສັດ ບຸນນໍາພາ ຈໍາກັດ, ບໍລິສັດເອເຊຍ-ປາຊີຟີກທີ່ປືກສາ ການຄ້າ-ການລົງທຶນ ຈຳກັດຜູ້ດຽວ, ບໍລິສັດ ບີວາຍດີ (BYD) ແລະ ບໍລິສັດ ເມຣາໂຄ (Meracle) ການແຂ່ງຂັນ ຈະດຳເນີນຈົນໄປຮອດວັນທີ 10 ພະຈິກ 2024 ຈຶ່ງຈະສໍາເລັດ.

ໃນພິທີເປີດດັ່ງກ່າວ, ທ່ານ ພອລ ບາຣທແມນ ຕາງໜ້າບໍລິສັດ ເບຍລາວ ຈໍາກັດ ມອບການອຸປະຖຳ 400 ລ້ານກວ່າກິີບ ແລະ ທ່ານ ວິລິດ ແສງດາລາ ປະທານກຸ່ມບໍລິສັດ ບຸນນໍາພາ ຈໍາກັດ ມອບເງິນ 50 ລ້ານກີບ ສະໜັບສະໜູນການແຂ່ງຂັນຄັ້ງນີ້ອີກດ້ວຍ ຕາງໜ້າກ່າວຮັບໂດຍ ທ່ານ ສີຈັນ ຈິດຕະປັນຍາ ຮັກສາການຫົວໜ້າກົມກິລາລະດັບສູງ ແລະ ທ່ານ ຈັນສະໝອນ ຜອງຈັນທາ ປະທານ.

(ຂ່າວ-ພາບ: ຕຸໄລເພັດ)