ຫວ່າງບໍ່ດົນມານີ້ທີ່ກະຊວງຍຸຕິທຳ ທ່ານ ໄພວີ ສີບົວລິພາກໍາມະການສູນກາງພັກລັດຖະມົນຕີກະຊວງຍຸຕິທໍາໄດ້ຕ້ອນຮັບທ່ານນາງ ຢາມິລາ ເປນາ ໂອເຈດາກຳມະການສູນກາງພັກກອມມູນິດຫົວໜ້າອົງການໄອຍະການສູງສຸດແຫ່ງສາທາລະນະລັດ ກູບາ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຄື່ອນໄຫວວຽກງານຢູ່ສປປ ລາວ.
    ທ່ານລັດຖະມົນຕີກະຊວງຍຸຕິທໍາໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຄື່ອນໄຫວວຽກງານຢູ່ສປປ ລາວໃນຄັ້ງນີ້ຂອງທ່ານຫົວໜ້າອົງການໄອຍະການປະຊາຊົນສູງສຸດ ສກູບາ ຊຶ່ງເປັນການປະກອບສ່ວນເຂົ້າໃນການສືບຕໍ່ຮັດແໜ້ນຄວາມສາມັກຄີຮັກແພງ, ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງພັກ-ສອງລັດ ແລະ ປະຊາຊົນສອງຊາດລາວ-ກູບາໃຫ້ນັບມື້ແໜ້ນແຟ້ນ ແລະ ຂະຫຍາຍຕົວຍິ່ງໆຂຶ້ນ. ພ້ອມນີ້ໄດ້ແຈ້ງສະພາບການຈັດຕັ້ງປະຕິບັດວຽກງານກົດໝາຍ ແລະ ຍຸຕິທໍາ ການພົວພັນປະສານງານກັນລະຫວ່າງກະຊວງຍຸຕິທໍາກັບອົງການໄອຍະການປະຊາຊົນສູງສຸດສປປ ລາວ ແລະ ບັນດາອົງການທີ່ນອນຢູ່ໃນຂະບວນການດໍາເນີນຄະດີຕາມຂະບວນຍຸຕິທໍາ.
    ໂອກາດນີ້, ທ່ານນາງ ຢາມິລາ ເປນາ ໂອເຈດາ ໄດ້ສະແດງຄວາມຂອບໃຈຕໍ່ທ່ານ ໄພວີ ສີບົວລິພາທີ່ໄດ້ໃຫ້ການຕ້ອນຮັບຢ່າງອົບອຸ່ນພ້ອມທັງແຈ້ງຈຸດປະສົງ ແລະ ສະພາບການຮ່ວມມືຂອງສອງປະເທດ ສກູບາ-ສປປ ລາວໄລຍະຜ່ານມາໃຫ້ຊາບຕື່ມອີກ.
ຂ່າວ: ກົມຮ່ວມມືສາກົນ; ພາບ: ບຸນຖອມ ພະສະແຫວງ