ວັນທີ 7 ຕຸລາ ຜ່ານມານີ້, ຄູ-ອາຈານ ການນຳແຂວງຫຼວງນ້ຳທາ ນໍາໂດຍທ່ານ ສີວີໄລ ປັນແກ້ວ ຮອງເຈົ້າແຂວງຫຼວງນ້ຳທາ, ທ່ານ ບຸນໂຮມ ຈິດລາດາ ຫົວຫນ້າພະແນກສຶກສາທິການ ແລະ ກິລາແຂວງ ພ້ອມດ້ວຍພະນັກງານ, ຄູອາຈານ ໄດ້ເຂົ້າວາງພວງມາລາຢູ່ທີ່ອະນຸສາວະລີນັກຮົບນິລະນາມ ແລະ ນຳເອົາກະຕ່າດອກໄມ້ໄປວາງຕໍ່ໜ້າອານຸສອນສະຖານ ປະທານ ໄກສອນ ພົມວິຫານ ເນື່ອງໃນໂອກາດສະເຫຼີມສະຫຼອງ ວັນຄູແຫ່ງຊາດຄົບຮອບ 30 ປີ, ເປັນການສະແດງເຖິງຄວາມເຄົາລົບຮັກ, ຄວາມກະຕັນຍູ - ຮູ້ບຸນຄຸນ, ຄຸນງາມຄວາມດີ ແລະ ຜົນງານອັນໃຫຍ່ຫຼວງ ຂອງບັນພະບູລຸດລາວ ທີ່ໄດ້ອຸທິດຕົນ ເພື່ອປະເທດຊາດ ແລະ ການປະຕິວັດ ໃນໄລຍະຜ່ານມາ, ພ້ອມດຽວກັນນີ້ກໍ່ໄດ້ມີປາຖະກະຖາ ວັນຄູແຫ່ງຊາດຄົບຮອບ 30 ປີ (7 ຕຸລາ 1994-7ຕຸລາ 2024) ຢູ່ທີ່ຫໍວັດທະນະທໍາແຂວງຫຼວງນໍ້າທາ ໂດຍການເປັນປະທານຂອງທ່ານ ບຸນໂຮມ ຈິດລາດາ ຫົວຫນ້າພະແນກສຶກສາທິການ ແລະ ກິລາແຂວງ, ເປັນກຽດເຂົ້າຮ່ວມໂດຍ ທ່ານ ສີວີໄລ ປັນແກ້ວ ຮອງເຈົ້າແຂວງຫຼວງນໍ້າທາ, ມີອາດິດການນຳຂະແໜງການສຶກສາ, ຫົວໜ້າພະແນກການ, ສອງກອງບັນຊາການ ປກຊ - ປກສ, ພະນັກງານຄູອາຈານ ແລະ ນ້ອງນັກຮຽນເຂົ້າຮ່ວມ.

ໂອກາດນີ້, ກໍໄດ້ມອບໃບຍ້ອງຍໍໃຫ້ຄູອາຈານຜູ້ທີ່ມີຜົນງານດີເດັ່ນ ແລະ ມອບໃບຢັ້ງຍືນນາມມະຍົດຄູປະສົບການ ໃຫ້ກຽດມອບຂອງໂດຍ ທ່ານ ຮອງເຈົ້າແຂວງຫລວງນ້ຳທາ ແລະ ທ່ານ ບຸນໂຮມ ຈິດລາດາ ຢ່າງສົມກຽດ.

(ຂ່າວ: ອຸ້ມ ສົມນໍວັນ)