ເພື່ອຍົກລະດັບຄວາມສາມາດໃນການຂົນສົ່ງຜູ້ໂດຍສານໃຫ້ດີຂຶ້ນຕື່ມ, ຕອບສະໜອງຕໍ່ປະລິມານການຂົນສົ່ງ ແລະ ກະກຽມເຂົ້າໃນການຮອງຮັບຜູ້ໂດຍສານໃນປີທ່ອງທ່ຽວລາວປີ 2024 ນີ້, ບໍລິສັດທາງລົດໄຟລາວ-ຈີນ ຈໍາກັດ ໄດ້ຈັດຊື້ລົດໄຟ EMU ຂະບວນລ້ານຊ້າງ ຂະບວນໃໝ່ ຊຶ່ງໄດ້ມາຮອດນະຄອນຫຼວງວຽງຈັນ ໃນວັນທີ 23 ກັນຍາ ຜ່ານມາ ແລະ ຈະຖືກນຳໃຊ້ຢ່າງເປັນທາງການໃນໄວໆນີ້.

ໃນການຈັດຊື້ລົດໄຟ EMU ຂະບວນໃໝ່ໃນເທື່ອນີ້, ຈຸດປະສົງຫຼັກກໍເພື່ອແນໃສ່ຮັບໃຊ້ປີທ່ອງທ່ຽວລາວ 2024 ແລະ ຮັບຕ້ອນຜູ້ໂດຍສານທັງພາຍໃນ ແລະ ຕ່າງປະເທດທີ່ເຂົ້າມາທ່ຽວຊົມປະເທດລາວ. ບໍລິສັດທາງລົດໄຟລາວ-ຈີນ ໄດ້ປັບປຸງ ແລະ ຍົກລະດັບຊັ້ນທຸລະກິດໃຫ້ມີຄວາມທັນສະໄໝ, ມີຄວາມສະດວກສະບາຍ ແລະ ງົດງາມຂຶ້ນ ຊຶ່ງບ່ອນນັ່ງຊັ້ນທຸລະກິດແມ່ນຈະມີຄວາມເປັນສ່ວນຕົວກວ່າ, ມີລະບົບສາກໄຟແບບໄຮ້ສາຍ ແລະ ມີລະບົບປັບທ່ານັ່ງທີ່ໄດ້ປ່ຽນເປັນການຄວບຄຸມແບບໜ້າຈໍສໍາຜັດ ເພື່ອເປັນໃບໜ້າໃບຕາໃຫ້ແຂກຕ່າງດ້າວຍ້າວຕ່າງເຮືອນມາທ່ຽວລາວ ໃຫ້ໄດ້ສຳຜັດກັບຄວາມທັນສະໄໝລະດັບສາກົນ.

ເພື່ອປະກອບສ່ວນເຂົ້າໃນການເປີດປີທ່ອງທ່ຽວລາວ, ບໍລິສັດທາງລົດໄຟລາວ-ຈີນ ຍັງໄດ້ຜະລິດປະກາດໂຄສະນາກ່ຽວກັບສະຖານທີ່ທ່ອງທ່ຽວທີ່ສຳຄັນຂອງລາວ ເພື່ອປະກາດຢູ່ເທິງລົດໄຟ, ກຽມພ້ອມອຳນວຍຄວາມສະດວກເລື່ອງການຈອງປີ້ໃຫ້ແກ່ນັກທ່ອງທ່ຽວລາວ ແລະ ຕ່າງປະເທດທີ່ມາເປັນກຸ່ມໃຫຍ່, ຝຶກຊ້ອມດ້ານມາລະຍາດ, ການຕ້ອນຮັບແຂກໃຫ້ແກ່ພະນັກງານບໍລິການທາງລົດໄຟທັງຂະແໜງການຂົນສົ່ງໂດຍສານ, ຂະແໜງການຂົນສົ່ງສິນຄ້າ ແລະ ອື່ນໆ.

ພ້ອມດຽວກັນນັ້ນ, ບໍລິສັດຍັງໄດ້ຮັບພະນັກງານໃໝ່ ເພື່ອບັນຈຸເຂົ້າໃນຫຼາຍຕຳແໜ່ງໜ້າວຽກທີ່ສຳຄັນ, ລວມທັງຝຶກອົບຮົມພະນັກງານຊຸດໃໝ່ ແລະ ເພີ່ມທະວີຍົກສູງການເຮັດວຽກຂອງພະນັກງານຂອງທຸກໆຕຳແໜ່ງ, ຈັດຊື້ວັດສະດຸອຸປະກອນທີ່ຈຳເປັນນຳໃຊ້ເຂົ້າໃນວຽກງານທີ່ກ່ຽວຂ້ອງ; ເພີ່ມກຳລັງແຮງໃຫ້ກັບວຽກງານຄຸ້ມຄອງການບຳລຸງຮັກສາທາງລົດໄຟ ອັນເປັນວຽກທີ່ຕ້ອງຈັດຕັ້ງປະຕິບັດທຸກໆມື້ ເຊັ່ນ: ວຽກລະບົບໄຟຟ້າ, ວຽກລະບົບສັນຍານ, ວຽກລະບົບລາງ, ວຽກອຸປະກອນກົນຈັກຕ່າງໆ ໃຫ້ເຮັດວຽກໄດ້ຢ່າງປົກກະຕິ ເພື່ອຮັບປະກັນຄວາມປອດໄພ, ຍົກສູງການບໍລິການທີ່ມີຄຸນນະພາບ, ສົ່ງເສີມຂະແໜງການທ່ອງທ່ຽວຂອງລາວ, ຮັບໃຊ້ເຂົ້າໃນສັງຄົມ ແລະ ຮັບໃຊ້ການພັດທະນາປະເທດຊາດ.

ນັບແຕ່ເປີດໃຫ້ບໍລິການເສັ້ນທາງລົດໄຟລາວ-ຈີນ ມາຮອດໃນວັນທີ 23 ກັນຍາ 2023 ນີ້, ໄດ້ມີການຂົນສົ່ງຜູ້ໂດຍສານທັງໝົດ 3.230.600 ກວ່າເທື່ອຄົນ. ສະເພາະປີ 2023 ມາຮອດວັນທີ 23 ກັນຍານີ້, ໄດ້ມີການສົ່ງຜູ້ໂດຍສານທັງໝົດ 1.792.900 ເທື່ອຄົນ.

(ຂ່າວ:ບໍລິສັດ ທາງລົດໄຟລາວ-ຈີນ)