ກົມສ່ວຍສາອາກອນ ກະຊວງການເງິນ ແຫ່ງ ສປປ ລາວ ໄດ້ເປັນເຈົ້າພາບຈັດກອງປະຊຸມວຽກງານສ່ວຍສາອາກອນອາຊຽນ (WG-AFT) ຄັ້ງທີ 19 ແລະ ກອງປະຊຸມວຽກງານອາກອນຊົມໃຊ້ອາຊຽນ (SF-ET) ຄັ້ງທີ 16 ຂຶ້ນລະຫວ່າງວັນທີ 14-16 ຕຸລາ 2024 ນີ້ ຢູ່ທີ່ແຂວງຫຼວງພະບາງ, ໂດຍການເປັນປະທານກ່າວເປີດຂອງທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນ, , ມີຄະນະຜູ້ແທນ ຈາກບັນດາປະເທດສະມາຊິກອາຊຽນ, ກອງເລຂາອາຊຽນ, ອົງການOECD, ADB, WHO ເຂົ້າຮ່ວມ.

ກອງປະຊຸມຄັ້ງນີ້, ເປັນຂີດໝາຍທີ່ສໍາຄັນຂອງບັນດາປະເທດສະມາຊິກອາຊຽນໂດຍສະເພາະຜູ້ຊ່ຽວຊານວຽກງານສ່ວຍສາອາກອນ, ໄດ້ແລກປ່ຽນດ້ານການແຂ່ງຂັນດ້ານສ່ວຍສາອາກອນ, ນະໂຍບາຍດ້ານວຽກງານສ່ວຍສາອາກອນພາຍຫຼັງການຈັດຕັ້ງປະຕິບັດເສົາຄໍ້າທີ່ສອງ, ການຄຸ້ມຄອງການຈັດເກັບລາຍຮັບອາກອນແບບດິຈິຕອນ ແລະ ປັນຍາປະດິດ (AI), ຄວາມຄືບໜ້າໃນການປັບປຸງສົນທິສັນຍາສ່ວຍສາອາກອນ DTA ໃນອາຊຽນ, ອາກອນຫັກໄວ້ຈ່າຍ, ການຄຸ້ມຄອງອາກອນມູນຄ່າເພີ່ມໃນການສະໜອງສິນຄ້າ, ການບໍລິການລະຫວ່າງປະເທດ, ລວມທັງທິດທາງແຜນການໃນຕໍ່ໜ້າກ່ຽວກັບນະໂຍບາຍທາງກົງດ້ານສ່ວຍສາອາກອນໃນພູມີພາກອາຊຽນ. ພ້ອມທັງໄດ້ທົບທວນຄືນບຸລິມະສິດປະຈຳປີ 2024 ຂອງກອງປະຊຸມ AFT ແລະ SF-ET ນໍາອີກດ້ວຍ. ພ້ອມດຽວກັນນີ້, ບັນດາຜູ້ແທນກອງປະຊຸມໄດ້ປຶກສາຫາລື,ແລກປ່ຽນບາງບັນຫາກ່ຽວກັບຄວາມຄືບໜ້າຂອງບັນດາກອງປະຊຸມລະດັບສູງທີ່ຕິດພັນກັບປະຊາຄົມເສດຖະກິດອາຊຽນຫຼັງປີ2025, ແຜນຍຸດທະສາດປະຊາຄົມເສດຖະກິດອາຊຽນແຕ່ປີ 2026-2030 ແລະບັນດາບັນຫາປິ່ນອ້ອມຈາກກອງປະຊຸມລະດັບສູງ, ການຈັດຕັ້ງປະຕິບັດກົນໄກນະໂຍບາຍທາງດ້ານສ່ວຍສາອາກອນ, ຜົນກະທົບການລົງທຶນໂດຍກົງຈາກຕ່າງປະເທດ (FDI) ແລະ ບົດບາດຂອງຂະແໜງສ່ວຍສາອາກອນຂອງແຕ່ລະປະເທດທີ່ຈະຕ້ອງປະຕິບັດໃນການແຂ່ງຂັນພາຍຫຼັງນໍາໃຊ້ເສົາຄໍ້າທີສອງ.

ນອກນີ້, ຍັງໄດ້ສົນທະນາແລກປ່ຽນບົດຮຽນກ່ຽວກັບສົນທິສັນຍາ, ນະໂຍບາຍອາກອນ, ການອອກໃບແຈ້ງໜີ້, ການປະຕິບັດພັນທະອາກອນຫັກໄວ້ຢູ່ບ່ອນຈ່າຍ, ການເກັບອາກອນຊັບສິນຄຣິບໂຕ crypto,ການຄຸ້ມຄອງອາກອນດິຈິຕອນ. ທັງນີ້, ກໍເພື່ອແນໃສ່ສ້າງລະບົບຂະແໜງສ່ວຍສາອາກອນອາຊຽນໃຫ້ມີຄວາມເປັນອັນໜຶ່ງອັນດຽວ ແລະ ສະເໝີພາບຢ່າງມີປະສິດທິພາບ ປະສິດທິຜົນສູງຂຶ້ນ. ທັງເປັນການເສີມຂະຫຍາຍສ້າງສາຍພົວພັນ, ທີ່ເປັນພື້ນຖານໃຫ້ແກ່ການຮ່ວມມືປະສານສົມທົບກັນໃນອະນາຄົດ, ເພື່ອກໍານົດທິດທາງກ້າວໄປສູ່ການຄຸ້ມຄອງສ່ວຍສາອາກອນທີ່ສະເໝີພາບ, ມີປະສິດທິພາບ ແລະ ຍືນຍົງຍິ່ງຂຶ້ນ,ເພື່ອກ້າວເຂົ້າສູ່ການເຊື່ອມຈອດ ແລະ ມີຄວາມເຂັ້ມແຂງຍິ່ງຂຶ້ນໃນຂົງເຂດອາຊຽນ ແລະ ພາກພື້ນສາກົນ.

(ຂ່າວ: ຫຼວງພະບາງ)