ບໍລິສັດ ລາວ ໂຕໂຢຕ້າ ຮ່ວມກັບ ບໍລິສັດ ນໍ້າເທີນ 2 ແລະ ຜະລິດຕະພັນນໍ້າດື່ມກາຫົວເສືອ ບໍລິສັດ ເບຍລາວ ຈຳກັດ ສືບຕໍ່ສະໜັບສະໜູນໂຄງການແລ່ນ ຄັ້ງທີ 10 ສົ່ງເສີມທີມນັກກິລາແລ່ນວີຣັນ ຫຼື "Team We Run" ກຽມແລ່ນຕາມເສັ້ນທາງໄລຍະ 385 ກິໂລແມັດ ລະດົມທຶນການກຸສົນ ໃຫ້ບັນລຸເປົ້າໝາຍ 1 ຕື້ກີບ ເພື່ອຊ່ວຍເຫຼືອໂຮງໝໍເພື່ອນລາວ ສຳລັບເດັກນ້ອຍທີ່ແຂວງຫຼວງພະບາງ ແລະ ຜູ້ປະສົບໄພນໍ້າຖ້ວມ ເຂດພາກເໜືອ ໂດຍສະເພາະແມ່ນແຂວງຫຼວງນໍ້າທາ.

ພິທີຖະແຫຼງຂ່າວການກະກຽມຄວາມພ້ອມແລ່ນໃນຄັ້ງນີ້ ຈັດຂຶ້ນໃນວັນທີ 15 ຕຸລາ ຜ່ານມາທີ່ສູນຈຳໜ່າຍ Toyota Square Parkson ໂດຍມີ ທ່ານ ຄຸນິຮິໂກະ ອິນາດະ ຜູ້ອໍານວຍການ ບໍລິສັດ ລາວ ໂຕໂຢຕ້າ ໃນນາມຜູ້ສະໜັບສະໜູນຫຼັກ, ທ່ານ ອໍາມະລິດ ຈັນທະລັງສີ ຕົວແທນຈາກ ບໍລິສັດ ນໍ້າເທີນ 2 ແລະ ທ່ານ ນາງ ຂັນຄໍາ ບຸຊາຕີ ຕົວແທນຈາກນໍ້າດື່ມຫົວເສືອ ພ້ອມດ້ວຍຄະນະຮັບຜິດຊອບຈັດງານ, ນັກກິລາແລ່ນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນພິທີ, ທ່ານ ຄາໂລ ບາຄາລ້າ ນັກກິລາແລ່ນຊາວຟີລິບປິນ ຜູ້ລິເລີ່ມໃນການແລ່ນ 385 ກິໂລແມັດ ແຕ່ນະຄອນຫຼວງວຽງຈັນ ຫາ ແຂວງຫຼວງພະບາງ ເພື່ອເດັກນ້ອຍ ກ່າວວ່າ: ກິດຈະກຳແລ່ນ ເພື່ອການກຸສົນແລ່ນ 385 ກິໂລແມັດ ເພື່ອເດັກນ້ອຍ ນັບຕັ້ງແຕ່ປີ 2014 ເປັນຕົ້ນມາ, ທີມວີຣັນ ໄດ້ຈັດໃຫ້ມີການແລ່ນການກຸສົນ ເພື່ອລະດົມທຶນເຂົ້າກອງທຶນຂອງໂຮງໝໍເພື່ອນລາວ ສຳລັບເດັກນ້ອຍທີ່ ນະຄອນຫຼວງພະບາງ. ໃນເດືອນຕຸລານີ້ ນັກແລ່ນຈາກທີມວີຣັນ ຈະໄດ້ສືບຕໍ່ພາລະກິດການແລ່ນ 385 ກິໂລແມັດ ເປັນປີທີ 10 ແຕ່ນະຄອນຫຼວງວຽງຈັນ-ຫຼວງພະບາງ ເພື່ອລະດົມທຶນເຂົ້າກອງທຶນຂອງໂຮງໝໍເດັກດັ່ງກ່າວ.

ທ່ານ ຄາໂລ ບາຄາລ້າ ກ່າວອີກວ່າ: ການລະດົມທຶນຊ່ວຍໂຮງໝໍເດັກດັ່ງກ່າວ ກໍຍ້ອນວ່າ ໂຮງໝໍເດັກເພື່ອນລາວ ໄດ້ໃຫ້ການປິ່ນປົວເດັກນ້ອຍໃນ ແຂວງຫຼວງພະບາງ ແລະ ບັນດາແຂວງພາກເໜືອຂອງລາວເຮົາ ໂດຍບໍ່ເສຍຄ່າໃຊ້ຈ່າຍໃດໆ. ພ້ອມກັນນັ້ນ, ຍັງໃຫ້ການຝືກອົບຮົມ ບັນດາ ແພດໝໍ ຂອງບັນດາເມືອງ ແລະ ກິດຈະກຳອື່ນ ນຳອີກ. ງານແລ່ນໃນປີນີ້ ຍັງເປັນການລະດົມທຶນ ໄປປະກອບສ່ວນ ຊ່ວຍບັນດາແຂວງພາກເໜືອທີ່ຖືກຜົນກະທົບ ຈາກໄພນໍ້າຖ້ວມ ຕື່ມອີກ ຊຶ່ງປີນີ້ ພວກເຮົາໄດ້ຕັ້ງເປົ້າໝາຍໄວ້ 1 ຕື້ກີບ.

ສໍາລັບ ທີມນັກກິລາແລ່ນ ວີຣັນ ຈະເລີ່ມອອກແລ່ນ ຈາກນະຄອນຫຼວງວຽງຈັນ ໃນວັນທີ 21 ຕຸລາ ແລະ ຮອດແຂວງຫຼວງພະບາງ ໃນວັນທີ 25 ຕຸລາ 2024 ຊຶ່ງຈະແລ່ນເປັນໄລຍະທາງ ແລະ ມີການພັກຜ່ອນບາງເຂດທ້ອງຖິ່ນ ໂດຍມີ ນັກແລ່ນຫຼັກ ລວມມີ 4 ທ່ານ ຄື: ທ່ານ ນາງ ວຽງດາລາ ສົມເພັດ (ເອ), ທ່ານ ນາງ ວິລາວອນ ເທບສີເມືອງ (ເປົາໂລ), ທ່ານ ບຸນເຈີ ຄຳມະນີສອນ (ອາເຈີ) ແລະ ທ່ານ ແກ້ວບຸນມີ ສຸວັນນະສິນ (ແກ້ວ).

ນອກນັ້ນ, ຍັງມີນັກແລ່ນອີກຫຼາຍທ່ານຮ່ວມແລ່ນໃຫ້ກຳລັງໃຈ ແລະ ຍັງມີທີມງານຕິດຕາມນຳອີກ. ປີນີ້ເປັນປີແຫ່ງປະຫວັດສາດ ທີ່ທີມວີຣັນ ເລີ່ມແລ່ນແຕ່ເດີນພະທາດຫຼວງ ນະຄອນຫຼວງວຽງຈັນ ຫາ ແຂວງຫຼວງພະບາງ ດ້ວຍໄລຍະທາງ 385 ກິໂລແມັດ. ພ້ອມດຽວກັນນັ້ນ, ຍັງເປັນປີທຳອິດ ທີ່ມີນັກກິລາແລ່ນຍິງ ທີ່ເປັນນັກແລ່ນຫຼັກ ແລະ ນັກແລ່ນຫຼັກທັງໝົດແມ່ນເປັນຄົນລາວ ທີ່ມີຄວາມຕັ້ງໃຈໃນການແລ່ນ ແລະ ເຕັມໃຈ ທີ່ຈະຮັບພາລະກິດ ແລ່ນ ຕັ້ງແຕ່ນະຄອນຫຼວງວຽງຈັນ - ຫຼວງພະບາງ ເພື່ອເດັກນ້ອຍລາວ ຈະໄດ້ເຂົ້າເຖິງການປີ່ນປົວທີ່ມີປະສິດທິພາບ. ນັກແລ່ນທຸກຄົນກຳລັງຂຸ້ນຂ້ຽວໃນການຝຶກຊ້ອມ ກຽມຄວາມພ້ອມຂອງຮ່າງການ ເພື່ອງານນີ້.

ຖ້າຫາກທ່ານມີຄວາມສົນໃຈການກຸສົນ ກໍສາມາດຊ່ວຍໄດ້ໃນຫຼາຍໆດ້ານເຊັ່ນ: ຮ່ວມບໍລິຈາກ-ຜ່ານ QR code ໃນໂພສເຕີ້ ຫຼື ໂອນເຂົ້າບັນຊີ ທະນາຄານ ການຄ້າຕ່າງປະເທດລາວ ມະຫາຊົນ (BCEL) ຊື່ບັນຊີ: Events for Good (ອີເວັ້ນຟໍກູດ) ບັນຊີເງີນ(ກີບ): 010-11-00-01140755-001 ເນື້ອໃນໃສ່ວ່າ: ບໍລິຈາກ ແລ່ນ 385 ກິໂລແມັດ ຫຼື ແຄບໜ້າຈໍທີ່ທ່ານໂອນ, ສົ່ງຮູບ ແລະ ຊື່ ຂອງທ່ານມາຫາແອັດມິນຜ່ານທາງວອດແອັບ 020 9190 1222 ໂດຍຈະມີການໂພສຮູບຂອງທ່ານລົງຜ່ານທາງ Team We Run and Run Laos Facebook Fan Page ເພື່ອສະແດງຄວາມຂອບໃຈອີກດ້ວຍ.

(ຂ່າວ-ພາບ: ສົງການ ພັນແພງດີ)