ກອງປະຊຸມພົບປະປຶກສາຫາລືລະຫວ່າງກອງເລຂາໄອປາ ແລະ ກອງເລຂາອາຊຽນຈັດຂຶ້ນໃນວັນທີ 19 ຕຸລາຜ່ານມາ ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານນາງ ສູນທອນ ໄຊຍະຈັກ ຮອງປະ ທານສະພາແຫ່ງຊາດລາວ, ທ່ານນາງ ອາ ສິຕິ ໂຣໄຊເມີຣິຍັນຕິ ດາໂຕະ ຮາຈິ ອັບດຸນ ຣາມານ ເລຂາທິການໃຫຍ່ໄອປາ, ທ່ານ ນາລາຢາ ໂຊອິພຣາບໂຕ ຮອງເລຂາທິການໃຫຍ່ອາຊຽນ ພ້ອມດ້ວຍບັນດາສະມາຊິກລັດຖະສະພາໄອປາເຂົ້າຮ່ວມເພື່ອປຶກສາຫາລື ແລະ ຮັບຟັງຄຳຄິດຄຳເຫັນເຊິ່ງກັນ ແລະ ກັນ ກ່ຽວກັບການປະສານງານ ແລະ ການປະຕິບັດໜ້າທີ່ຕາມພາລະບົດບາດຂອງຕົນໃນການຊຸກຍູ້ ແລະ ອຳນວຍຄວາມສະດວກໃຫ້ແກ່ການຈັດ ຕັ້ງປະຕິບັດແຜນງານຕ່າງໆຂອງອາຊຽນ ກໍຄືບັນດາມະຕິຂອງໄອປາໃຫ້ມີປະສິດທິພາບ ແລະ ບັນລຸຕາມຈຸດປະສົງຄາດໝາຍ.
ທ່ານນາງ ສູນທອນ ໄຊຍະຈັກ ໄດ້ກ່າວວ່າ: ກອງປະຊຸມຄັ້ງນີ້, ຈະໄດ້ລົງເລິກກ່ຽວກັບການເພີ່ມທະວີການປະສານງານ, ການປຶກສາຫາລືລະຫວ່າງກອງເລຂາໄອປາ ແລະ ອາຊຽນ ເພື່ອຮັບປະກັນການເຊື່ອມຈອດ ແລະ ການເຕີບໂຕແບບກວມລວມໃນພາກພື້ນ, ເຊື່ອໝັ້ນວ່າ ການປຶກສາຫາລືພາຍໃຕ້ຫົວຂໍ້ດັ່ງກ່າວຈະເປັນປະໂຫຍດຫຼາຍໃນການເສີມຂະຫຍາຍບົດບາດ ແລະ ໜ້າທີ່ຂອງສອງອົງການໃຫ້ມີປະສິດທິພາບກວ່າເກົ່າ, ປະກອບສ່ວນເຂົ້າໃນການຊຸກຍູ້ບົດບາດການເປັນແກນກາງຂອງອາຊຽນ, ສົ່ງເສີມການມີສ່ວນຮ່ວມຂອງປະຊາຊົນໃຫ້ຫຼາຍຂຶ້ນ ເພື່ອບັນລຸວິໄສທັດການສ້າງປະຊາຄົມອາຊຽນ 2025 ແລະ ໄລຍະຕໍ່ໜ້າ. ໃນໄລຍະຜ່ານມາ ອາຊຽນ-ໄອປາ ໄດ້ມີການຮ່ວມມື, ຕິດຕໍ່ພົວພັນ ແລະ ປະສານງານເຊິ່ງກັນ ແລະ ກັນ ໃນຖານະເປັນຄູ່ຮ່ວມມື ຜ່ານກົົນໄກການຈັດກອງປະຊຸມລະຫວ່າງຜູ້ນຳອາຊຽນ-ໄອປາ ແລະ ກອງປະຊຸມປຶກສາຫາລືລະຫວ່າງເລຂາທິການໃຫຍ່ຂອງອາຊຽນ ແລະ ໄອປາໄດ້ປະສົບຜົນສໍາເລັດຫຼາຍດ້ານ. ເພື່ອຕອບສະໜອງກັບຄວາມຮຽກຮ້ອງຕ້ອງການ ແລະ ຮັບມືກັບສິ່ງທ້າທາຍຕ່າງໆທີ່ບັນດາປະເທດພວກເຮົາພວມປະເຊີນໜ້າຢູ່ໃນປັດຈຸບັນ ກໍຄືໃນອະນາຄົດ ເພື່ອເຮັດໃຫ້ວຽກງານຂອງລັດຖະບານມີການເກາະກ່າຍກະທົບເຊິ່ງກັນ ແລະ ກັນ ກໍຄືການປະສານງານກັບວຽກງານນິຕິບັນຍັດໃຫ້ກົມກຽວນັ້ນ, ພວກເຮົາຍິ່ງຕ້ອງເພີ່ມທະວີການພົວພັນຮ່ວມມື ແລະ ການປຶກສາຫາລືໃຫ້ຫຼາຍຂຶ້ນເພື່ອຮັບປະກັນໃຫ້ແກ່ການພົວພັນຮ່ວມມືລະຫວ່າງລັດຖະບານ ແລະ ລັດຖະສະພາຂອງປະເທດອາຊຽນ ກໍຄືຄູ່ຮ່ວມມືຂອງອາຊຽນ-ໄອປາມີປະສິດທິພາບ ແລະ ປະສິດທິຜົນສູງຂຶ້ນ ແນໃສ່ປະຕິບັດຕາມທິດການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ.
ກອງປະຊຸມຄັ້ງນີ້, ເປັນໂອກາດດີໃຫ້ແກ່ບັນດາກອງເລຂາໄອປາ, ກອງເລຂາອາຊຽນ ແລະ ລັດຖະສະພາສະມາຊິກໄອປາ ໄດ້ຮ່ວມກັນຕີລາຄາຄືນກ່ຽວກັບກົນໄກ ແລະ ວິທີການຕ່າງໆໃນການພົວພັນປະສານງານໃຫ້ມີປະສິດທິພາບສູງກວ່າເກົ່າ ພ້ອມກັນຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ຫຼັງປີ 2025 ກໍຄື ສົ່ງເສີມປະຊາຄົມອາຊຽນໃຫ້ມີການເຊື່ອມໂຍງ ແລະ ເຊື່ອມຈອດຢ່າງເປັນຮູບປະທຳ.
ຂ່າວ: ຍຸພິນທອງ, ພາບ: ສຸກສະຫວັນ
