ຄະນະແພດສາດມະຫາວິທະຍາໄລວິທະຍາສາດສຸຂະພາບ (ມວສ) ໄດ້ຈັດພິທີສະເຫຼີມສະຫຼອງວັນເບົາຫວານໂລກປະຈຳປີ 2024 ຂຶ້ນໃນວັນທີ 8 ພະຈິກນີ້ທີ່ມວສ ໂດຍການເຂົ້າຮ່ວມຂອງທ່ານຄໍາປະສົງ ເສດຖາວັນໄຊ ຮອງອະທິການບໍດີ ມວສ, ມີທ່ານນາງພູວັງແສງເມືອງຄະນະບໍດີຄະນະແພດສາດ, ມີບັນດາຜູ້ຊ່ຽວຊານຈາກໂຮງໝໍຕ່າງໆ, ນັກວິທະຍາກອນແລະ ນັກສຶກສາເຂົ້າຮ່ວມ.

ທ່ານຄໍາປະສົງເສດຖາວັນໄຊ ໄດ້ກ່າວວ່າ: ການຈັດງານໃນຄັ້ງນີ້ ເພື່ອສະເຫຼີມສະຫຼອງວັນເບົາຫວານໂລກ, ພະຍາດເບົາຫວານແມ່ນພະຍາດໜຶ່ງທີ່ເກີດມາຈາກການປັ່ນປ່ວນທາງດ້ານການເຜົາປ່ຽນທາດທີ່ບໍ່ສົມສ່ວນເຮັດໃຫ້ເກີດມີພາວະທາດນໍ້າຕານສູງຂຶ້ນໃນເລືອດກາຍເປັນພະຍາດເບົາຫວານດົນໄປກໍຈະເຮັດໃຫ້ເກີດການທໍາລາຍຫຼາຍອະໄວຍະວະຕ່າງໆ ໂດຍສະເພາະແມ່ນຫົວໃຈ-ເສັ້ນເລືອດ, ໄຂ່ຫຼັງ, ຕາ, ເສັ້ນປະສາດ ແລະ ອື່ນໆ. ການສະເຫຼີມສະຫຼອງວັນເບົາຫວານໂລກ ຊຶ່ງມີການປະຕິບັດກິດຈະກຳຕ່າງໆ ໂດຍແນໃສ່ໃຫ້ຄວາມຮູ້ກ່ຽວກັບການປ້ອງກັນພະຍາດເບົາຫວານການຊອກຮູ້ບັນຫາແຕ່ຫົວທີ ການດູແລປິ່ນປົວຄົນທີ່ເປັນພະຍາດເບົາຫວານ ແລະ ຄົນທີ່ເປັນພະຍາດເບົາຫວານຮ່ວມກັບພະຍາດອື່ນເຊັ່ນ: ພະຍາດຫົວໃຈເສັ້ນເລືອດ, ພະຍາດໄຂ່ຫຼັງຊຸດໂຊມ ແລະ ອື່ນໆ.ຈໍານວນຄົນທີ່ເປັນພະຍາດເບົາຫວານໄດ້ມີທ່າອ່ຽງນັບມື້ນັບສູງຂຶ້ນໂດຍສະເພາະແມ່ນຢູ່ໃນປະເທດກຳລັງພັດທະນາ ແລະ ປະເທດທີ່ພັດທະນາແລ້ວ ຊຶ່ງໄດ້ສົ່ງຜົນກະທົບອັນໃຫຍ່ຫຼວງຕໍ່ສຸຂະພາບເປັນໄພອັນຕະລາຍຕໍ່ຊີວິດ ແລະ ຊັບສິນຂອງຄົນໃນທົ່ວໂລກຈໍານວນບໍ່ໜ້ອຍ.ປັດຈຸບັນທຸກໆ 11 ຄົນໃດຈະມີ 1 ຄົນເປັນເບົາຫວານ, ທຸກໆ 1 ວິນາທີຈະມີ 3 ຄົນຖືກບົ່ງມະຕິວ່າເປັນເບົາຫວານ ແລະ ທຸກໆ 6 ວິນາທີຈະມີຄົນຕາຍຍ້ອນພະຍາດເບົາຫວານ 1 ຄົນ.ປີ 2021, ຄາດຄະເນວ່າໃນເກນອາຍຸ 20-79 ປີມີຫຼາຍກວ່າ 6,7 ລ້ານຄົນມີການຕາຍທີ່ມີການພົວພັນກັບພະຍາດເບົາຫວານ.ປີ 2021, ໂຕເລກຄາດຄະເນຈະມີ 541 ລ້ານຄົນກຽມເປັນເບົາຫວານ, ຈະມີຄົນເປັນເບົາຫວານ 537 ລ້ານຄົນ, ຄ່າໃຊ້ຈ່າຍໂດຍກົງໃນການປິ່ນປົວເບົາຫວານເກືອບບັນລຸ 1,000 ຕື້ໂດລາ.ໃນປີ 2030 ຄົນເປັນເບົາຫວານຈະເພີ່ມຂຶ້ນເປັນ 643 ລ້ານຄົນ ແລະ ຮອດປີ 2045 ຄົນເປັນເບົາຫວານຈະເພີ່ມຂຶ້ນເປັນ 783 ລ້ານຄົນ,ສໍາລັບຢູ່ປະເທດລາວແມ່ນປະເທດໜຶ່ງທີ່ໄດ້ຮັບຜົນກະທົບຈາກພະຍາດດັ່ງກ່າວ, ສະຖິຕິຄົນເປັນພະຍາດເບົາຫວານຢູ່ໃນປະເທດເຮົາມີທ່າອ່ຽງນັບມື້ນັບສູງຂຶ້ນເຊັ່ນດຽວກັນ.

ທ່ານນາງພູວັງແສງເມືອງໄດ້ກ່າວວ່າ:ພະຍາດເບົາຫວານເປັນພະຍາດບໍ່ຕິດຕໍ່, ມີການພັດທະນາທາງດ້ານກາຍວິພາກພະຍາດແບບຕໍ່ເນື່ອງ, ເປັນພະຍາດທີ່ພົບຫຼາຍໃນທົ່ວໂລກ ມີສາເຫດຈາກທາງພັນທຸກຳ, ອາຍຸ, ຄວາມອ້ວນ, ການດື່ມເຫຼົ້າ,ສູບຢາ, ປະຫວັດເປັນພະຍາດຄວາມດັນເລືອດສູງ ການກິນອາຫານທີ່ມີລົດຫວານ ລົດມັນເຄັມ ບັນຫາຂອງຄົນເຈັບທີ່ເປັນພະຍາດເບົາຫວານໄດ້ແກ່ການເກີດພາວະແຊກຊ້ອນຊຶ່ງມີ 2 ປະເພດຄື: ພະວະກະທັນຫັນໄດ້ແກ່: ພາວະນໍ້າຕານໃນເລືອດສູງ ກົດອັ່ງໃນເລືອດຊຶມບໍ່ຮູ້ສຶກຕົວ ຈາກລະດັບນໍ້າຕານໃນເລືອດສູງ ແລະລະດັບນໍ້າຕານໃນເລືອດຕໍ່າ. ສ່ວນພາວະແຊກຊ້ອນຊໍາເຮື້ອມີການເກີດຂຶ້ນຄ່ອຍເປັນຄ່ອຍໄປ ອາດເກີດຂຶ້ນໃນທຸກລະບົບຂອງຮ່າງກາຍໄດ້ແກ່: ພາວະແຊກຊ້ອນທາງລະບົບປະສາດ, ລະບົບຫົວໃຈເສັ້ນເລືອດຕາ ແລະ ໄຂ່ຫຼັງ. ສະນັ້ນ, ພະຍາດເບົາຫວານສົ່ງຜົນກະທົບໃສ່ສຸຂະພາບຢ່າງຫຼວງຫຼາຍເຊັ່ນ: ເກີດຄວາມພິການທາງຮ່າງກາຍ, ຈິດໃຈແລະສົ່ງຜົນກະທົບທາງດ້ານເສດຖະກິດແລະອື່ນໆ. ພາຍໃນງານມີກິດຈະກໍາກວດສຸຂະພາບ, ການສະແດງລະຄອນ ແລະ ອື່ນໆ.

ຂ່າວ-ພາບ: ບຸນອູ້ມ