ວຽກງານ 3 ສ້າງ ແມ່ນການຈັດຕັ້ງປະຕິບັດວຽກງານ ເພື່ອສ້າງແຂວງເປັນຫົວໜ່ວຍຍຸດທະສາດ ຜ່ານການປະເມີນ 7 ດ້ານ, ການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ປະເມີນ 5 ດ້ານ ແລະ ການສ້າງບ້ານເປັນຫົວໜ່ວຍພັດທະນາ ປະເມີນ 4 ດ້ານ ທີ່ເປັນຕົວຊີ້ວັດ ຊຶ່ງຜ່ານການປະເມີນຄັ້ງທີ 1 ລະຫວ່າງປີ 2016-2020 ແລະ ປີ 2023ຊຶ່ງມີບັນດາແຂວງ, ເມືອງ ແລະ ບ້ານ ຈໍານວນໜຶ່ງທີ່ບັນລຸ.

ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 21 ພະຈິກນີ້ ທີ່ຫໍສະພາແຫ່ງຊາດ, ພາຍໃຕ້ການເປັນປະທານຂອງ ທ່ານພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ; ທ່ານ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ ໄດ້ຕາງໜ້າລັດຖະບານຂຶ້ນລາຍງານການຈັດຕັ້ງປະຕິບັດວຽກງານ 3 ສ້າງ ຕາມມະຕິຂອງສະພາແຫ່ງຊາດ ສະບັບເລກທີ 02/ສພຊ, ລົງວັນທີ 28 ມັງກອນ 2016 ວ່າດ້ວຍການຈັດຕັ້ງປະຕິບັດວຽກງານ 3 ສ້າງ.

ທ່ານ ວິໄລວົງ ບຸດດາຄໍາໃຫ້ຮູ້ວ່າ: ບົນພື້ນຖານນິຕິກຳທີ່ສູນກາງພັກ ແລະ ລັດຖະບານໄດ້ຄົ້ນຄວ້າສ້າງ ເພື່ອເປັນບ່ອນອີງໃຫ້ບັນດາກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນ ໃນການຜັນຂະຫາຍ ແລະ ຈັດຕັ້ງປະຕິບັດວຽກງານ 3 ສ້າງ ເຂົ້າສູ່ລວງເລິກ ຊຶ່ງກະຊວງພາຍໃນ, ຄະນະປະເມີນຜົນວຽກງານ 3 ສ້າງຂັ້ນທ້ອງຖິ່ນ ກໍໄດ້ຈັດຕັ້ງການປະເມີນວຽກງານດັ່ງກ່າວໃນທົ່ວປະເທດຜ່ານຂະບວນການປະເມີນສາມາດສັງລວມດັ່ງນີ້:

ການສ້າງແຂວງເປັນຫົວໜ່ວຍຍຸດທະສາດ: ການປະເມີນໄລຍະປີ 2016-2020 ຈໍານວນດ້ານທີ່ບັນລຸຂອງແຕ່ລະແຂວງ ແມ່ນບັນລຸ 7 ດ້ານ ມີ 3 ແຂວງ (ນະຄອນຫຼວງວຽງຈັນ, ແຂວງສະຫວັນນະເຂດ ແລະ ຈໍາປາສັກ), ບັນລຸ 6 ດ້ານ ມີ 4 ແຂວງ (ອຸດົມໄຊ, ວຽງຈັນ, ບໍ່ແກ້ວ ແລະ ບໍລິຄໍາໄຊ), ບັນລຸ 5 ດ້ານ ມີ 3 ແຂວງ (ຫຼວງພະບາງ, ຫຼວງນໍ້າທາ, ຊຽງຂວາງ), ບັນລຸ 4 ດ້ານ 0 ແຂວງ, ບັນລຸ 3 ດ້ານມີ 4 ແຂວງ (ອັດຕະປື, ເຊກອງ, ສາລະວັນ ແລະ ຄໍາມ່ວນ), ບັນລຸ 2 ດ້ານ ມີ 3 ແຂວງ (ຫົວພັນ, ໄຊຍະບູລີ ແລະ ໄຊສົມບູນ), ບັນລຸ 1 ດ້ານ ມີ 1 ແຂວງ (ຜົ້ງສາລີ); ການປະເມີນໃນປີ 2023 ບັນລຸ 7 ດ້ານ 0 ແຂວງ, ບັນລຸ 6 ດ້ານ ມີ 1 ແຂວງ (ບໍລິຄໍາໄຊ), ບັນລຸ 5 ດ້ານ ມີ 3 ແຂວງ (ບໍ່ແກ້ວ, ອຸດົມໄຊ ແລະ ຫຼວງພະບາງ), ບັນລຸ 4 ດ້ານ ມີ 2 ແຂວງ (ຄໍາມ່ວນ ແລະ ເຊກອງ), ບັນລຸ 3 ດ້ານ ມີ 4 ແຂວງ (ຫຼວງນໍ້າທາ, ຫົວພັນ, ໄຊຍະບູລີ ແລະ ໄຊສົມບູນ), ບັນລຸ 2 ດ້ານ 0 ແຂວງ, ບັນລຸ 1 ດ້ານ 1 ແຂວງ (ຜົ້ງສາລີ).

ພ້ອມດຽວກັນນີ້, ໃນແຕ່ລະດ້ານຂອງການສ້າງແຂວງເປັນຫົວໜ່ວຍຍຸດທະສາດ ໃນການປະເມີນປີ 2016-2020 ດ້ານພັກ-ພະນັກງານ ບັນລຸມີ: ນະຄອນຫຼວງວຽງຈັນ ແລະ 10 ແຂວງ, ບໍ່ບັນລຸ 7 ແຂວງ; ດ້ານການປົກຄອງ ແລະ ການບໍລິຫານລັດ ບັນລຸມີ: ນະຄອນຫຼວງວຽງຈັນ ແລະ 9 ແຂວງ, ບໍ່ບັນລຸ 8 ແຂວງ; ດ້ານການຊຸກດັນການຂະຫຍາຍເສດຖະກິດແຫ່ງຊາດ ບັນລຸມີນະຄອນຫຼວງວຽງຈັນ ແລະ 13 ແຂວງ, ບໍ່ບັນລຸ 4 ແຂວງ; ດ້ານການເງິນ ບັນລຸມີນະຄອນຫຼວງວຽງຈັນ ແລະ 16 ແຂວງ, ບໍ່ບັນລຸ 1 ແຂວງ; ດ້ານການຄຸ້ມຄອງ, ຂຸດຄົ້ນ ແລະ ນໍາໃຊ້ແຫຼ່ງຊັບພະຍາກອນທໍາມະຊາດ ບັນລຸມີ ນະຄອນຫຼວງວຽງຈັນ ແລະ 7 ແຂວງ, ບໍ່ບັນລຸ 10 ແຂວງ; ດ້ານວັດທະນະທໍາ-ສັງຄົມ ແລະ ການພັດທະນາຊັບພະຍາກອນມະ​ນຸດ ບັນລຸມີ ນະຄອນຫຼວງວຽງຈັນ ແລະ 9 ແຂວງ, ບໍ່ບັນລຸ 8 ແຂວງ; ດ້ານການປ້ອງກັນຊາດ, ປ້ອງກັນຄວາມສະຫງົບ ບັນລຸມີ ນະຄອນຫຼວງວຽງຈັນ ແລະ 8 ແຂວງ, ບໍ່ບັນລຸ 9 ແຂວງ.

ການປະເມີນປີ 2023 ດ້ານພັກ-ພະນັກງານ ບັນລຸມີ 9 ແຂວງ, ບໍ່ບັນລຸ 2 ແຂວງ; ດ້ານການປົກຄອງ ແລະ ການບໍລິຫານລັດ ບັນລຸ 7 ແຂວງ, ບໍ່ບັນລຸ 4 ແຂວງ; ດ້ານການຊຸກດັນການຂະຫຍາຍຕົວເສດຖະກິດແຫ່ງຊາດ ບັນລຸ 9 ແຂວງ, ບໍ່ບັນລຸ 2 ແຂວງ; ດ້ານການເງິນ ບັນລຸ 10 ແຂວງ, ບໍ່ບັນລຸ 1 ແຂວງ; ດ້ານການຄຸ້ມຄອງ, ຂຸດຄົ້ນ ແລະ ນໍາໃຊ້ແຫຼ່ງຊັບພະຍາກອນທໍາມະຊາດ ບັນລຸ 1 ແຂວງ, ບໍ່ບັນລຸ 10 ແຂວງ; ດ້ານວັດທະນະທໍາ-ສັງຄົມ ແລະ ການພັດທະນາຊັບພະຍາກອນມະ​ນຸດ ບັນລຸ 4 ແຂວງ ບໍ່ບັນລຸ 7 ແຂວງ; ດ້ານການປ້ອງກັນຊາດ, ປ້ອງກັນຄວາມສະຫງົບ ບັນລຸ 2 ແຂວງ, ບໍ່ບັນລຸ 9 ແຂວງ.

ການສ້າງເມືອງເປັນຫົວໜ່ວຍເຂັ້ມແຂງຮອບດ້ານ: ການປະເມີນໄລຍະປີ 2016-2020 ຈໍານວນເມືອງທີ່ບັນລຸ 5 ດ້ານ ມີ 19 ເມືອງ, ບັນລຸ 4 ດ້ານ ມີ 21 ເມືອງ, ບັນລຸ 3 ດ້ານ ມີ 17 ເມືອງ, ບັນລຸ 2 ດ້ານ ມີ 27 ເມືອງ, ບັນລຸ 1 ດ້ານ ມີ 26 ເມືອງ, ບໍ່ບັນລຸຈັກດ້ານມີ 38 ເມືອງ; ການປະເມີນປີ 2023 ຈໍານວນເມືອງທີ່ບັນລຸ 5 ດ້ານ ມີ 3 ເມືອງ, ບັນລຸ 4 ດ້ານມີ 12 ເມືອງ, ບັນລຸ 3 ດ້ານ ມີ 12 ເມືອງ, ບັນລຸ 2 ດ້ານ ມີ 19 ເມືອງ, ບັນລຸ 1 ດ້ານ ມີ 15 ເມືອງ, ບໍ່ບັນລຸຈັກດ້ານມີ 16 ເມືອງ. ພ້ອມນີ້, ຈໍານວນເມືອງທີ່ບັນລຸໃນແຕ່ລະດ້ານ ຊຶ່ງການປະເມີນໄລຍະປີ 2016-2020 ໃນດ້ານພັກ-ພະນັກງານ ບັນລຸ 3 ນະຄອນ ແລະ 82 ເມືອງ, ບໍ່ບັນລຸ 63 ເມືອງ; ດ້ານການປົກຄອງ ແລະ ບໍລິຫານລັດ ບັນລຸ 3 ນະຄອນ ແລະ 34 ເມືອງ, ບໍ່ບັນລຸ 111 ເມືອງ; ດ້ານການຊຸກຍູ້ການຂະຫຍາຍຕົວເສດຖະກິດ, ການເງິນ, ຊັບພະຍາກອນທໍາມະຊາດ ແລະ ສິ່ງແວດລ້ອມ ບັນລຸ 3 ນະຄອນ ແລະ 38 ເມືອງ, ບໍ່ບັນລຸ 107 ເມືອງ; ດ້ານການຄຸ້ມຄອງວັດທະນະທຳ-ສັງຄົມ ບັນລຸ 3 ນະຄອນ ແລະ 78 ເມືອງ, ບໍ່ບັນລຸ 67 ເມືອງ; ດ້ານປ້ອງກັນຊາດ, ປ້ອງກັນຄວາມສະຫງົບ ບັນລຸ 3 ນະຄອນ ແລະ 63 ເມືອງ, ບໍ່ບັນລຸ 82 ເມືອງ. ໃນການປະເມີນປີ 2023 ດ້ານພັກ-ພະນັກງານ ມີ 1 ນະຄອນ ແລະ 48 ເມືອງ, ບໍ່ບັນລຸ 28 ເມືອງ; ດ້ານການປົກຄອງ ແລະ ບໍລິຫານລັດ ບັນລຸ 1 ນະຄອນ ແລະ 11 ເມືອງ, ບໍ່ບັນລຸ 65 ເມືອງ; ດ້ານການຊຸກຍູ້ການຂະຫຍາຍຕົວເສດຖະກິດ, ການເງິນ, ຊັບພະຍາກອນທໍາມະຊາດ ແລະ ສິ່ງແວດລ້ອມ ບັນລຸ 1 ນະຄອນ ແລະ 23 ເມືອງ, ບໍ່ບັນລຸ 53 ເມືອງ; ດ້ານການຄຸ້ມຄອງວັດທະນະທໍ​າ-ສັງຄົມ ບັນລຸ 1 ນະຄອນ ແລະ 35 ເມືອງ, ບໍ່ບັນລຸ 41 ເມືອງ; ດ້ານປ້ອງກັນຊາດ, ປ້ອງກັນຄວາມສະຫງົບ ບັນລຸ 1 ນະຄອນ ແລະ 30 ເມືອງ, ບໍ່ບັນລຸ 46 ເມືອງ.

ການສ້າງບ້ານເປັນຫົວໜ່ວຍພັດທະນາ, ນັບແຕ່ປີ 2016 ເຖິງປັດຈຸບັນ ສ້າງບ້ານເປັນຫົວໜ່ວຍພັດທະນາໄດ້ 3,618 ບ້ານ.

ທ່ານ ວິໄລວົງ ບຸດດາຄໍາ ຍັງໃຫ້ຮູ້ວ່າ: ໄລຍະປີ 2021-2022 ບັນດາອົງການປົກຄອງທ້ອງຖິ່ນໃນທົ່ວປະເທດ ໄດ້ຢຸດເຊົາການປະເມີນການຈັດຕັ້ງປະຕິບັດນະໂຍບາຍ 3 ສ້າງ, ເນື່ອງຈາກສະພາບພາຍໃນທົ່ວປະເທດມີຄວາມຫຍຸ້ງຍາກ ຍ້ອນການແຜ່ລະບາດຂອງພະຍາດໂຄວິດ-19; ປີ 2023 ກໍມີພຽງ 11 ແຂວງທີ່ສົ່ງຜົນການປະເມີນ (7 ແຂວງທີ່ບໍ່ສົ່ງຜົນການປະເມີນ); ປີ 2024 ນະຄອນຫຼວງວຽງຈັນ, ບັນດາແຂວງ ກຳລັງສະຫຼຸບສັງລວມການປະເມີນ.

(ຂ່າວ-ພາບ: ສຸກສະຫວັນ)