ພິທີປະກາດແຕ່ງຕັ້ງ ຮອງຫົວໜ້າຫ້ອງເສນາທິການທະຫານແຂວງຫຼວງພະບາງ ໄດ້ຈັດຂຶ້ນຕອນເຊົ້າວັນທີ 21 ພະຈິກນີ້, ໂດຍການເປັນປະທານຂອງສະຫາຍ ພົນຈັດຕະວາ ວິລ່ຽມ ວົງທິສານ ເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງ, ມີຄະນະພັກ - ຄະນະບັນຊາ, ພະນັກງານຫຼັກແຫຼ່ງອົງການ 6 ຫ້ອງ, ກອງບັນຊາການທະຫານນະຄອນ ຫຼວງພະບາງ, ກອງພັນນ້ອຍ 415, ໂຮງຮຽນການທະຫານທ້ອງຖິ່ນ, ພະແນກການກ່ຽວຂ້ອງເຂົ້າຮ່ວມ.

ໂອກາດນີ້, ສະຫາຍ ພັນໂທ ສົມໃຈ ສີສະຫວັດ ຄະນະພັກກອງບັນຊາການ ຮອງຫົວໜ້າຫ້ອງການເມືອງທະຫານແຂວງ ຂຶ້ນຜ່ານຂໍ້ຕົກລົງເລກທີ 6528 ຂອງກະຊວງປ້ອງກັນປະເທດ, ລົງວັນທີ 25 ຕຸລາ 2024 ວ່າດ້ວຍການອະນຸມັດໃຫ້ນາຍທະຫານຢູກອງບັນຊາການທະຫານແຂວງຫຼວງພະບາງ ພັກການກຽມຮັບບໍານານ, ໂດຍປະຕິບັດຕາມກົດໝາຍນາຍທະຫານກອງທັບປະຊາຊົນລາວ ສະບັບເລກທີ 43 ຂອງສະພາແຫ່ງຊາດ, ລົງວັນທີ 14 ມິຖຸນາ 2018 ໃນພາກທີ lll ໝວດທີ 1 ມາດຕາ 33 ວ່າດ້ວຍອາຍຸກະສຽນຮັບບໍານານຂອງນາຍທະຫານ, ກະຊວງປ້ອງກັນປະເທດຕົກລົງອະນຸມັດໃຫ້ສະຫາຍ ພັນໂທ ບຸນລຽງ ລໍວັນຄຳ ຮອງຫົວໜ້າຫ້ອງເສນາທິການທະຫານແຂວງຫຼວງພະບາງ ພັກການກຽມຮັບບໍານານ, ພ້ອມດຽວກັນນີ້, ຍັງໄດ້ຜ່ານຂໍ້ຕົກລົງເລກທີ 6527 ຂອງກະຊວງປ້ອງກັນປະເທດ, ລົງວັນທີ 25 ຕຸລາ 2024 ວ່າດ້ວຍການແຕ່ງຕັ້ງຮອງຫົວໜ້າຫ້ອງເສນາທິການທະຫານແຂວງ, ຊຶ່ງໃນນີ້ ໄດ້ແຕ່ງຕັ້ງສະຫາຍ ພັນໂທ ຈັນເພັງ ໄຊອຸດົມ ເປັນຮອງຫົວໜ້າຫ້ອງເສນາທິການທະຫານແຂວງ, ໂດຍປະຕິບັດຕາມກົດໝາຍນາຍທະຫານກອງທັບປະຊາຊົນລາວ ສະບັບເລກທີ 43 ຂອງສະພາແຫ່ງຊາດ, ລົງວັນທີ 14 ມິຖຸນາ 2018 ໃນພາກທີ ll ໝວດທີ 4 ມາດຕາ 26 ວ່າດ້ວຍແຕ່ງຕັ້ງ, ຍົກບ້ານນາຍທະຫານ, ພິທີຍັງໄດ້ແຕ່ງຕັ້ງສະຫາຍ ພັນໂທ ຄຳມອນ ສຸວັນຄຳ ເປັນຮອງຫົວໜ້າພະແນກການທະຫານທ້ອງຖິ່ນ ແລະ ໄດ້ແຕ່ງຕັ້ງສະຫາຍ ພັນຕີ ບຸນແພງ ທະລາດລີ ຊ່ວຍວຽກພະແນກຕີພິເສດ, ສະຫາຍ ພັນຕີ ອຳໄພວັນ ໂພທິວັນ ຊ່ວຍວຽກພະແນກສູ້ຮົບ ແລະສະຫາຍ ຮ້ອຍເອກ ແກ້ວພະກອນ ມະນີວົງ ຊ່ວຍວຽກພະແນກອົບອົມ.

ສະຫາຍ ພົນຈັດຕະວາ ວິລ່ຽມ ວົງທິສານ ໄດ້ໂອ້ລົມຍົກໃຫ້ເຫັນຄວາມຈໍາເປັນພາວະວິໄສໃນການແຕ່ງຕັ້ງມອບໝາຍໜ້າທີ່ໃໝ່, ຊຶ່ງເປັນກົດເກນແຫ່ງການເຕີບໃຫຍ່ຂະຫຍາຍຕົວຂອງນາຍທະຫານ, ເປັນການປັບປຸງບູລະນະກົງຈັກການຈັດຕັ້ງໃຫ້ມີຄວາມເຂັ້ມແຂງໜັກແໜ້ນຮອບດ້ານ, ຕອບສະໜອງຕາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ພ້ອມທັງເນັ້ນໜັກໃຫ້ນາຍທະຫານທີ່ໄດ້ຮັບການແຕ່ງຕັ້ງໜ້າທີ່ໃໝ່ ຍົກສູງບົດບາດຄວາມຮັບຜິດຊອບໜ້າທີ່ການເມືອງຂອງຕົນ, ປັບປຸງແບບແຜນນໍາພາ - ບັນຊາ ແລະ ວິທີເຮັດວຽກໃຫ້ມີຄວາມເປັນເອກະພາບ, ເປັນໝູ່ຄະນະ ຕິດພັນກັບການກໍ່ສ້າງພັກ-ກໍ່ສ້າງພະນັກງານໃຫ້ມີຄວາມປອດໃສ, ເຂັ້ມແຂງຮອບດ້ານ, ສືບຕໍ່ຝຶກຝົນຫຼໍ່ຫຼອມຕົນເອງດ້ານຄຸນສົມບັດ, ສິນທໍາປະຕິວັດ ແລະ ສຸມສະຕິປັນຍາປະກອບສ່ວນສ້າງກົມກອງກ້າວຂຶ້ນສູ່ກອງທັບປະຕິວັດ, ທີມີລະບຽບແບບແຜນ.

(ຂ່າວ: ສົມພອນ ສຸວັນທອນ)