ຄະນະເສດຖະສາດ ແລະ ບໍລິຫານທຸລະກິດ (ຄສບ) ມະຫາວິທະຍາໄລແຫ່ງຊາດ (ມຊ) ໄດ້ເປີດງານຕະຫຼາດນັດນັກສຶກສາ ຄສບ ຄັ້ງທີ XVII ປະຈຳສົກຮຽນ 2024-2025 ຂຶ້ນໃນວັນທີ 18 ພະຈິກນີ້ ທີ່ ມຊ ໂດຍການເຂົ້າຮ່ວມຂອງທ່ານ ເດຊານຸລາດ ແສນດວງເດດ ວ່າການແທນອະທິການບໍດີ ມຊ, ມີທ່ານ ບຸນທອນ ສຸຂະວົງ ຮອງຄະນະບໍດີ ຄສບ ຜູ້ຊີ້ນໍາວຽກງານການຈັດງານຕະຫຼາດນັດນັກສຶກສາ ຄສບ ຄັ້ງທີ XVII ປະຈຳສົກຮຽນ 2024-2025, ມີຄູ-ອາຈານ, ນັກສຶກສາ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ການຈັດງານຕະຫຼາດນັດໃນຄັ້ງນີ້, ເປັນກິດຈະກໍາໜຶ່ງຈັດຂຶ້ນໃນທຸກໆປີທີ່ມີຄວາມສໍາຄັນຫຼາຍໃນການຈັດຕັ້ງປະຕິບັດຫຼັກສູດການຮຽນ-ການສອນທີ່ຕິດພັນກັບພາກປະຕິບັດຕົວຈິງ ທັງເປັນປະເດັນໜຶ່ງທີ່ເປັນເສົາຄໍ້າສໍາຄັນຕໍ່ຜົນຂອງການຮຽນວິຊາຕ່າງໆໃນຫຼັກສູດຂອງ ຄສບ ພ້ອມເປັນຄວາມຄາດຫວັງທີ່ຈະເຮັດໃຫ້ນັກສຶກສາກ້າສະແດງອອກທາງດ້ານທັກສະໃນການບໍລິຫານຈັດການ, ການຈັດການຕະຫຼາດນັດແບບຄົບວົງຈອນ, ນັບແຕ່ການວາງແຜນ, ການກະກຽມ, ການບໍລິການໃຫ້ລູກຄ້າ ຈົນຮອດການປະເມີນຜົນການຈັດຕັ້ງປະຕິບັດ ຊຶ່ງຖືວ່າເປັນການນໍາໃຊ້ຄວາມຮູ້ທີ່ໄດ້ຮຽນທິດສະດີທາງດ້ານການຕະຫຼາດ, ເສດຖະສາດ ແລະ ບໍລິຫານທຸລະກິດເຂົ້າໃນພາກປະຕິບັດຕົວຈິງ ເພື່ອຝຶກທັກສະໃນການເຮັດໜ້າທີ່ ທີ່ມອບໝາຍ. ພ້ອມນັ້ນ, ຍັງເປັນການຈັດເວທີໃຫ້ນັກສຶກສາກ້າສະແດງອອກ, ຄວາມອາດສາມາດ ກໍຄືພອນສະຫວັນໃນການປະດິດຄິດແຕ່ງ, ໃນການປຸງແຕ່ງອາຫານ, ການປະດິດສິນຄ້າທີ່ລະນຶກ, ການຕິດຕໍ່ປະສານງານ, ແຫຼ່ງສິນຄ້າ, ການບໍລິການໃຫ້ລູກຄ້າ ແລະ ອື່ນໆ. ງານຕະຫຼາດນັດໃນຄັ້ງນີ້, ມີທັງໝົດ 24 ຫ້ອງວາງສະແດງ-ຂາຍສິນຄ້າ, ປະກອບມີຫຼາກຫຼາຍປະເພດສິນຄ້າ ລວມມີເຄື່ອງບໍລິໂພກ-ອຸປະໂພກໂດຍແມ່ນນັກສຶກສາປີທີ 3 ຂອງ ຄສບ ຈາກ 5 ພາກວິຊາ (ທັງລະບົບປົກະຕິ, ລະບົບຕໍ່ເນື່ອງແລະ ລະບົບພາສາອັງກິດ), ຄູູ່ຮ່ວມພັດທະນາຂອງ ຄສບ, ວິທະຍາໄລສຸສະກະ, ວິທະຍາໄລສຸກສະຫວັດ, ສະຖາບັນການທະນາຄານ, ມີຮ້ານຄ້າຂອງຄູ-ອາຈານ ແລະ ຄະນະປີ່ນອ້ອມເປັນຜູ້ນໍາເອົາສິນຄ້າມາເຂົ້າຮ່ວມວາງສະແດງ-ຂາຍສິນຄ້າໃນຄັ້ງນີ້.ພາຍຫຼັງທີ່ສໍາເລັດງານໃນຄັ້ງນີ້, ຈະໄດ້ມີການທົບທວນຄືນການຈັດຕັ້ງປະຕິບັດຂໍ້ດີ ແລະ ຂໍ້ບົກຜ່ອງ ເພື່ອນໍາໄປສູ່ການແກ້ໄຂ, ເອົາໄປນໍາໃຊ້ເຂົ້າໃນອາຊີບ, ປະກອບກິດຈະການໃນຕົວຈິງໃນອະນາຄົດ. ງານຕະຫຼາດນັດນັກສຶກສາ ຄສບ ໃນຄັ້ງນີ້, ຈະດໍາເນີນໄປເປັນ 5 ວັນ ເລີ່ມແຕ່ 18 ຫາ 22 ພະຈິກ 2024.

ໃນໂອກາດນີ້, ທ່ານ ເດຊານຸລາດ ແສນດວງເດດ, ທ່ານ ບຸນທອນ ສຸຂະວົງ ໄດ້ໃຫ້ກຽດຕັດແຖບຜ້າ ເພື່ອເປັນສິຣິມຸງຄຸນ ໃນການເປີດງານຄັ້ງນີ້.

(ຂ່າວ-ພາບ: ວັນເພັງ)