ພິທີເປີດການແຂ່ງຂັນກິລາ-ສິລະປະຂອງໂຮງຮຽນມັດທະຍົມສຶກສາກຸ່ມ II ເມືອງປະທຸມພອນ ແຂວງຈໍາປາສັກ ປະຈໍາສົກຮຽນ 2024-2025 ໄດ້ຈັດຂຶ້ນ ເມື່ອບໍ່ດົນມານີ້ ຢູ່ທີ່ເດີ່ນກິລາຂອງ ໂຮງຮຽນມັດທະຍົມສົມບູນ ມສ ປະທຸມພອນ ໂດຍໃການເຂົ້າຮ່ວມຂອງ ທ່ານ ສີທະນົນໄຊ ສີສະຫວ່າງວົງ ຫົວໜ້າຫ້ອງວ່າການເມືອງ, ທ່ານ ນາງ ພະນົມພອນ ທອນມະນີວົງ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ມີຕາງໜ້ານັກກິລາ, ນັກສີລະປະ ແລະ ແຂກທີ່ຖຶກເຊີນເຂົ້າຮ່ວມ.

ໃນພິທີ ທ່ານ ຄຳພັນ ນະຄອນສີ ອໍານວຍການໂຮງຮຽນ ມັດທະຍົມ ມສ ປະທຸມພອນ ທັງແມ່ນຫົວໜ້າມັດທະຍົມສຶກສາກຸ່ມ II ໄດ້ໃຫ້ຮູ້ວ່າ: ການແຂ່ງຂັນກິລາ-ສິລະປະຂອງໂຮງຮຽນ ແລະ ມັດທະຍົມສຶກສາກຸ່ມ II ແມ່ນຂະບວນການແຂ່ງຂັນກິລາ-ສິລະປະຂອງນັກຮຽນໃນແຕ່ລະແຕ່ລະຊັ້ນຮຽນ ໂດຍມີ ຈຸດປະສົງ ເພື່ອໃຫ້ນັກຮຽນໄດ້ຫັນມາຫຼິ້ນກິລາ-ສິລະປະເພື່ອຫ່າງໄກຢາເສບຕິດ, ສ້າງຄວາມສະໝານສະມັກຄີ, ສົ່ງເສີມສຸຂະພາບ, ເສີມສ້າງທັກສະພອນສະຫວັນ ແລະ ປະສົບການຂອງນັກຮຽນ, ສ້າງໜໍ່ແໜງ ແລະ ເລືອກເຟັ້ນນັກກິລາ-ສີລະປະ ເພື່ອເຂົ້າຮ່ວມການແຂ່ງຂັນໃນຂັ້ນຕ່າງໆ ແລະ ເປັນການປະຕິບັດຕາມ 5 ຫຼັກມູນການສຶກສາ ທີ່ກະຊວງສຶກສາທິການ ແລະ ກິລາວາງອອກ.

ການລະດູແຂ່ງຂັນໃນຄັ້ງນີ້ຈະໄດ້ດຳເນີນໄປຮອດ ວັນທີ 1/5/2025 ຈຶ່ງຈະສຳເລັດ

(ຂ່າວ-ພາບ: ສີສົມບູນ ວົງວຽງຄຳ)