ວັນທີ 18 ພະຈິກນີ້, ທີ່ໂຮງແຮມຈຳປາສັກແກຣນ ນະຄອນປາກເຊ ແຂວງຈໍາປາສັກ, ກົມພັດທະນາການທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ລະ ທ່ອງທ່ຽວ (ຖວທ) ໄດ້ຈັດກອງປະຊຸມຜ່ານແຜນແມ່ບົດພັດທະນາ ແລະ ຄຸ້ມຄອງການທ່ອງທ່ຽວ ນາກະສັງ, ດອນເດດ, ດອນຄອນ ແລະ ບໍລິເວນອ້ອມຮອບ ສໍາລັບປີ 2025-2035 ໂດຍເປັນປະທານຂອງທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງ ຖວທ, ມີທ່ານ ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນແຂວງ, ທ່ານ ວັນນະໄຊ ຊາດຕະກຸນ ຫົວໜ້າພແນກ ຖວທ ແຂວງ ພ້ອມດ້ວຍຄະນະ,ມີຄະນະນຳຈາກກົມພັດທະນາການທອງທ່ຽວ, ຄະນະຊີ້ນຳໂຄງການ, ຄະນະຫ້ອງວ່າການແຂວງ,ພະແນກການອ້ອມຂ້າງແຂວງ, ຫ້ອງການກ່ຽວຂ້ອງເມືອງໂຂງເຂົ້າຮ່ວມ.

ທ່ານ ນາງ ດາລານີ ພົມມະວົງສາ ໄດ້ກ່າວວ່າ: ປັດຈຸບັນ ລັດຖະບານໄດ້ຖືເອົາວຽກງານການທ່ອງທ່ຽວ ແມ່ນໜຶ່ງໃນບັນດາຂະແໜງເສດຖະກິດປາຍແຫຼມ ເພື່ອສຸມໃສ່ພັດທະນາ ແນໃສ່ເຮັດໃຫ້ວຽກງານດັ່ງກ່າວ ປະກອບສ່ວນເຂົ້າໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງປະເທດພວກເຮົາ ໂດຍໄດ້ມີນະໂຍບາຍສົ່ງເສີມການທ່ອງທ່ຽວ ເປັນຕົ້ນນະໂຍບາຍດ້ານວິຊາສໍາລັບກຸມປະເທດເປົ້າໝາຍ, ການປະກາດປີທ່ອງທ່ຽວລາວ 2024 ແລະ ອື່ນໆ. ປີນີ້ ແມ່ນປີທີ່ ສປປ ລາວ ໄດ້ຮັບກຽດເປັນເຈົ້າພາບກອງປະຊຸມ ສຸດຍອດອາຊຽນ ສາມາດດຶງດູດຄະນະຜູ້ແທນ ແລະ ນັກທ່ອງທ່ຽວເຂົ້າມາປະເທດເຮົາເປັນຈໍານວນຫຼາຍສົມຄວນ. ສໍາລັບ 9 ເດືອນຜ່ານມາ ມີນັກທ່ອງທ່ຽວສາກົນເຂົ້າມາ ສປປ ລາວ ຈໍານວນ 2.9 ລ້ານເທື່ອຄົນ ທຽບໃສ່ແຜນປີ ແມ່ນລື່ນຄາດໝາຍ, ຄາດວ່າ 3 ເດືອນທ້າຍປີຈະມີນັກທ່ອງທ່ຽວສາກົນເພີ່ມຂຶ້ນຕື່ມອີກ.

ໃນວາລະດຳເນີນກອງປະຊຸມ, ທ່ານ ໂອເງິນ ປັນຍານຸວົງ ຮອງຫົວໜ້າກົມພັດທະນາການທ່ອງທ່ຽວ ໄດ້ນໍາສະເໜີແຜນພັດທະນາ ແລະ ຄຸ້ມຄອງການທ່ອງທ່ຽວ ນາກະສັງ, ດອນເດດ, ດອນຄອນ ແລະ ບໍລິເວນອ້ອມຮອບ ສໍາລັບປີ 2025-2035. ຈາກນັ້ນ, ບັນດາທ່ານທີ່ເຂົ້າຮ່ວມໄດ້ປະກອບຄຳຄິດຄຳເຫັນ ແລກປ່ຽນເພື່ອເຮັດໃຫ້ແຜນແມ່ບົດນີ້ ມີເນື້ອໃນສົມບູນ, ຮັດກຸມ ແລະ ຈັດຕັ້ງປະຕິບັດໃຫ້ສອດຄ່ອງກັບສະພາບຄວາມເປັນຈິງຂອງທ້ອງຖິນ.

ກອງປະຊຸມຄັ້ງນີ້, ໄດ້ຮັບການສະໜັບສະໜູນຈາກໂຄງການພັດທະນາໂຄງລ່າງພື້ນຖານ ເພືອສົ່ງເສີມການທ່ອງທ່ຽວອະນຸພາກພື້ນແມ່ນໍ້າຂອງ ໄລຍະ 2.

(ຂ່າວ: ເກດສະໜາ ແກ້ວສຸວັນນະແສງ)