ງານມະຫາກຳແຂ່ງຂັນກິລານັກຮຽນສາຍສາມັນສຶກສາມັດທະຍົມສົມບູນທົ່ວປະເທດຄັ້ງທີ 7 ທີ່ຈະຈັດຂຶ້ນໃນກາງເດືອນທັນວາ 2024 ທີ່ແຂວງສາລະວັນເປັນເຈົ້າພາບ. ແຂວງບໍລິຄໍາໄຊໄດ້ສົ່ງ 8 ປະເພດກິລາເຂົ້າຮ່ວມແຂ່ງຂັນ ຕັ້ງເປົ້າ 9 ຫຼຽນທອງ 12 ຫຼຽນເງິນ ແລະ 10 ຫຼຽນຄໍາ.

ທ່ານ ຄຳເພັດ ໄຊປັນຍາ ຮອງຫົວໜ້າພະແນກ ສຶກສາທິການ ແລະ ກິລາແຂວງ ບໍລິຄຳໄຊ ຕາງໜ້າໃຫ້ຄະນະຮັບຜິດຊອບໄດ້ໃຫ້ສຳພາດຕໍ່ສື່ມວນຊົນແຂວງໃນວັນທີ 16 ພະຈິກຜ່ານມາ ໃຫ້ຮູ້ວ່າ: ງານມະຫາກຳແຂ່ງຂັນກິລານັກຮຽນສາຍສາມັນສຶກສາມັດທະຍົມສົມບູນຄັ້ງທີ 7 ທົ່ວປະເທດທີ່ແຂວງສາລະວັນເປັນເຈົ້າພາບ. ແຂວງ ບໍລິຄໍາໄຊ ຈະໄດ້ສົ່ງນັກກິລາເຂົ້າຮ່ວມແຂ່ງແຂ່ງຂັນ 8 ປະເພດກິລາຄື: ບານເຕະຊາຍ, ແລ່ນ-ລານຍິງ-ຊາຍ, ໝາກເສິກຍິງ-ຊາຍ, ເປຕັງຍິງ-ຊາຍ, ກະຕໍ້ຍິງ-ຊາຍ, ໜ້າເກັກຍິງ-ຊາຍ,ເທັກຄັວນໂດ່ຍິງ-ຊາຍ ແລະ ກິລາດອກປີກໄກ່-ຍິງ-ຊາຍ,ຈຳນວນພົນເຂົ້າຮ່ວມທັງໝົດ 168 ຄົນ. ໃນນັ້ນ, ຄະນະນຳ ແລະ ຄູຝຶກ 68 ຄົນ, ນັກກີລາ 100 ຄົນ, ໃຊ້ງົບປະມານ 997 ລ້ານກວ່າກີບ. ຕັ້ງເປົ້າ 31 ຫຼຽນຄື: ຫຼຽນຄໍາ 10 ຫຼຽນ, ຫຼຽນເງິນ 12 ຫຼຽນ ແລະ 9 ຫຼຽນທອງ. ສໍາລັບຜົນງານແຂ່ງຂັນຄັ້ງທີ 6 ຜ່ານມາ ສາມາດຍາດໄດ້ອັນດັບທີ 3 ຂອງປະເທດ. ມາຮອດປັດຈຸບັນບັນດາໜ້າວຽກທີ່ປີ່ນອ້ອມມີຄວາມພ້ອມຫຼາຍດ້ານ, ທ່ານ ຍັງໄດ້ຮຽກຮ້ອງໃຫ້ທຸກພາກສ່ວນ, ທຸກອົງການຈັດຕັ້ງສັງຄົມ ຈົ່ງຊ່ວຍປະກອບສ່ວນວັດຖຸຊຸກຍູ້ນັກກິລາ ເພື່ອສ້າງກຳລັງໃຈເຮັດໃຫ້ງານກິລາດັ່ງກ່າວສຳເລັດຕາມເປົ້າໝາຍທີ່ຄາດຫັວງໄວ້.

(ຂ່າວ: ແຂວງບໍລິຄໍາໄຊ)