ບັນດາສະມາຊິກສະພາແຫ່ງຊາດ (ສສຊ) ຈາກເຂດເລືອກຕັ້ງຕ່າງໆ ໄດ້ປະກອບຄໍາເຫັນໃສ່ບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຕໍ່ກອງປະຊຸມກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 19 ພະຈິກນີ້ ໂດຍການເປັນປະທານຂອງ ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໂດຍສະເພາະ ສສຊ ຈາກເຂດເລືອກຕັ້ງຕ່າງໆ ສະເໜີໃຫ້ລັດຖະບານແກ້ໄຂຫຼາຍບັນຫາທີ່ເຄັ່ງຮ້ອນຂອງສັງຄົມ.
ທ່ານ ສາຍທອງ ໄຊຍະວົງ ສສຊ ປະຈໍາເຂດເລືອກຕັ້ງ ທີ 15ແຂວງຈໍາປາສັກ ໄດ້ມີຄຳເຫັນວ່າ: ການຜະລິດເພື່ອທົດແທນການນໍາເຂົ້າ ກໍຄືການສົ່ງອອກເປັນສິ່ງທີ່ຈໍາເປັນ ແລະ ຮີບດ່ວນທີ່ພວກເຮົາຈະຕ້ອງສຸມໃສ່ແກ້ໄຂ ທັງໄລຍະສັ້ນ ແລະ ໄລຍະຍາວ ເພາະວ່າໄລຍະຜ່ານມາການຈັດຕັ້ງປະຕິບັດ, ການຜະລິດ ບໍ່ວ່າຈະເປັນອຸດສາຫະກໍາ, ກະສິກໍາຍັງເຫັນວ່າບໍ່ທັນເຄັ່ງຄັດ. ປັດຈຸບັນຈໍາເປັນຕ້ອງໄດ້ປູກ, ລ້ຽງ ເພື່ອທົດແທນການນຳເຂົ້າແລະເພື່ອສົ່ງອອກ ໂດຍສະເພາະການປູກກາເຟ, ພືດຜັກ, ຢາງພາລາ ແລະ ອື່ນໆ.ພ້ອມນັ້ນ, ສະເໜີໃຫ້ລັດຖະບານເບິ່ງຄືນສິນຄ້າປະເພດຖົ່ວລຽນທີ່ເປັນສິນຄ້າໃໝ່ ເປັນຕົ້ນທາງແຂວງພາກໃຕ້ທີ່ມີເງື່ອນໄຂປູກໄດ້ເຊັ່ນ: ແຂວງຈໍາປາສັກ ສະເໜີໃຫ້ລັດຖະບານຊຸກຍູ້ພາກທຸລະກິດທີ່ມີປະສົບການ ແລະ ມີທຶນ, ເຕັກນິກ, ມີວິຊາການ ແລະພ້ອມທີ່ຈະລົງທຶນໃນດ້ານນີ້ ເຊື່ອວ່າຈະໄດ້ຮັບຜົນທີ່ຄຸ້ມຄ່າ.
ທ່ານ ພອນສານ ວິໄລເມັ້ງ ສສຊ ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ໄດ້ສະເໜີໃຫ້ລັດຖະບານ ເອົາໃຈໃສ່ ວຽກງານການຄຸ້ມຄອງພະນັກງານ-ລັດຖະກອນ ຂຶ້ນຕື່ມໂດຍສະເພາະການໄປວຽກສວາຍ-ເລີກໄວ ເຫັນວ່າການປະຕິບັດລະບຽບລັດຖະກອນຍັງບໍ່ທັນເຂັ້ມງວດແລະຮັດກຸມ, ຖ້າບໍ່ປະຕິບັດຢ່າງເຂັ້ມງວດຈະເຮັດໃຫ້ການຈັດຕັ້ງປະຕິບັດໜ້າທີ່ຂອງພະນັກງານ-ລັດຖະກອນ ບໍ່ໄດ້ຕາມລະດັບຄາດໝາຍ.ໃນຂະນະດຽວກັນການເພີ່ມເງິນເດືອນໃຫ້ພະນັກງານ-ລັດຖະກອນ ຂັ້ນຕໍ່າຈາກ 1,850,000 ກີບເປັນ 2,200,000 ກີບໃນປີ 2025 ເຫັນວ່າຍັງຕໍ່າເມື່ອທຽບກັບຄ່າຄອງຊີບໃນປັດຈຸບັນ, ພະນັກງານບາງຄົນໄປການບໍ່ເປັນປົກກະຕິຍ້ອນບາງສາເຫດ, ໂດຍສະເພາະແມ່ນບັນຫາລາຍຮັບ, ແນວໃດກໍຕາມກໍຍັງມີຫຼາຍຄົນຢາກເຮັດວຽກນໍາລັດ ເພື່ອຢາກໃຫ້ມີອະນາຄົດທີ່ສົດໃສ. ສະນັ້ນ, ສະເໜີໃຫ້ລັດຖະບານພິຈາລະນາ ເພີ່ມເງິນເດືອນຂຶ້ນຕື່ມໃຫ້ເໝາະສົມກັບຄ່າຄອງຊີບໃນປັດຈຸບັນຈະເປັນການດີ. ພ້ອມນັ້ນ, ສະເໜີໃຫ້ລັດຖະບານແກ້ໄຂບັນຫາຄວາມຫຍຸ້ງຍາກຂອງຄົວເຮືອນ ເປັນຕົ້ນບັນຫາການສຶກສາ, ການຜະລິດ, ນໍ້າສະອາດ ແລະ ອື່ນໆ ທີ່ເຫັນວ່າບາງທ້ອງຖິ່ນຍັງຂາດເຂີນ.ດັ່ງນັ້ນ, ຕ້ອງແກ້ໄຂຄວາມທຸກຍາກດັ່ງກ່າວ ໂດຍສຸມທຶນຮອນເຂົ້າໄປຕື່ມ.
ທ່ານນາງ ມີນາພອນ ໄຊສົມພູ ສສຊ ປະຈໍາເຂດເລືອກຕັ້ງທີ 17 ແຂວງອັດຕະປຶ ຍັງມີຄໍາເຫັນວ່າ: ການແກ້ໄຂບັນຫາອັດຕາເງິນເຟີ້, ອັດຕາແລກປ່ຽນ ມີທ່າອ່ຽງຫຼຸດລົງແຕ່ລາຄາສິນຄ້າ, ບໍລິການຍັງສູງຂຶ້ນເລື້ອຍໆເນື່ອງມາຈາກ 3 ປັດໄຈຄື: ຄວາມຮັບຜິດຊອບໜ້າທີ່ການເມືອງຍັງບໍ່ທັນສູງ; ການຫັນປ່ຽນບຸກທະລຸໄປສູ່ອັນໃໝ່ທີ່ດີກວ່າເກົ່າຍັງບໍ່ທັນເຮັດໄດ້ດີເທົ່າທີ່ຄວນ; ກົນໄກບໍລິຫານຄຸ້ມຄອງຍັງບໍ່ຄ່ອງຕົວ, ພື້ນຖານການຜະລິດ ແລະ ລະບົບການຜະລິດບໍ່ທັນເຂັ້ມແຂງ ໂດຍສະເພາະການຜະລິດເປັນສິນຄ້າເພື່ອສົ່ງອອກຍັງບໍ່ທັນແຂງແຮງ, ແຕ່ການນໍາເຂົ້າສິນຄ້າຍັງຢູ່ໃນລະດັບສູງ. 3 ປັດໄຈທີ່ກ່າວມານີ້ແມ່ນມີຄວາມສຳຄັນຫຼາຍ. ດັ່ງນັ້ນ, ສະເໜີໃຫ້ລັດຖະບານສືບຕໍ່ນໍາໃຊ້ມາດຕະການທີ່ໄດ້ວາງອອກໃຫ້ປະກົດຜົນເປັນຈິງ ແລະ ເປັນຮູບປະທໍາຫຼາຍຂຶ້ນກວ່າເກົ່າ. ເຖິງວ່າມີການເກັບລາຍຮັບງົບປະມານໄດ້ຕາມແຜນ ຫຼືລື່ນແຜນການ ແຕ່ກໍຍັງມີບາງບ້ວງລາຍຮັບຍັງບໍ່ທັນບັນລຸຕາມແຜນທີ່ໄດ້ກໍານົດໄວ້ໂດຍສະເພາະລາຍຮັບທີ່ຈະມີຄວາມຍືນຍົງເປັນຕົ້ນຄ່າທໍານຽມທາງ, ອາກອນທີ່ດິນ, ອາກອນມອບເໝົາ ໂດຍສະເພາະຢູ່ແຂວງອັດຕະປື, ການປ້ອນຂໍ້ມູນທີ່ດິນເຂົ້າໃນລະບົບເສດຖະກິດຍັງມີຄວາມຫຍຸ້ງຍາກເຮັດໃຫ້ຜູ້ຊົມໃຊ້ພາຫະນະ, ຄອບຄອງສິດນໍາໃຊ້ທີ່ດິນມີລັກສະນະສັບສົນ ລວມທັງສິ່ງອໍານວຍສະດວກຕໍ່ການຈັດເກັບລາຍຮັບກໍຍັງບໍ່ທັນພຽງພໍເປັນຕົ້ນຂາດງົບປະມານ ແລະ ອຸປະກອນຮັບໃຊ້ ແລະ ອື່ນໆ. ພ້ອມນັ້ນ,ສະເໜີໃຫ້ລັດຖະບານເບິ່ງຄືນເຄື່ອງມືທີ່ທັນສະໄໝ ແມ່ນມີຄວາມສໍາຄັນແລະຈຳເປັນໃນການຈັດເກັບລາຍຮັບເພື່ອຊ່ວຍທ້ອງຖິ່ນ ເຮັດໃຫ້ການຈັດເກັບລາຍຮັບໄດ້ດີຂຶ້ນ.
ໃນໂອກາດນີ້, ບັນດາ ສສຊ ຈາກເຂດເລືອກຕັ້ງຕ່າງໆ ຍັງໄດ້ປະກອບຄໍາເຫັນໃສ່ບົດລາຍງານຂອງລັດຖະບານໃນຫຼາຍບັນຫາ ເພື່ອສະເໜີໃຫ້ລັດຖະບານ ນໍາໄປພິຈາລະນາ ແລະ ແກ້ໄຂໃນຕໍ່ໜ້າ.
ຂ່າວ: ວັນເພັງ
