ຂ່າວຕ່າງປະເທດລາຍງານໃນວັນທີ 20 ພະຈິກ ຜ່ານມາວ່າ: ເວັບໄຊ The Wall Street Journal ເຜີຍແຜ່ບົດຄວາມທີ່ຂຽນໂດຍ ສາດສະດາຈານຜູ້ຊ່ຽວຊານ ໂດຍລະບຸວ່າ: ຄວາມສາມາດຂອງປັນຍາປະດິດ (AI) ໃນການເຮັດວຽກອັດຕະໂນມັດ ແລະເພີ່ມຈໍານວນວຽກທີ່ເຮັດໄດ້ໃນຕົ້ນທຶນທີ່ຕໍ່າອາດສາມາດຊ່ວຍຫຼຸດຄ່າຮຽນລະດັບອຸດົມສຶກສາໄດ້ເຊັ່ນ: ການເຮັດວຽກອັດຕະໂນມັດສົ່ງຜົນໃຫ້ລາຄາສິນຄ້າຖືກລົງໃນອະດີດ ແລະ AIມີປະໂຫຍດໃນການຄຸ້ມຄອງງົບປະມານໂດຍເພີ່ມປະສິດທິພາບການໃຫ້ບໍລິການນັກສຶກສາ.

ທ່ານ ກາຣຕິກ ໂຮຊານາກາ ສາດສະດາຈານດ້ານເຕັກໂນໂລຊີ ແລະ ທຸລະກິດດີຈີຕອນ ປະຈຳຄະນະວິຊາທຸລະກິດວໍຕັນແຫ່ງມະຫາວິທະຍາໄລເພນຊິວເວເນຍກ່າວວ່າ: ລະບົບAIສາມາດວິເຄາະບັນທຶກຜົນການຮຽນຂອງນັກສຶກສາ ແລະສະເໜີແນະນຳອາຊີບສະເພາະບຸກຄົນໄດ້ ຊຶ່ງເອື້ອອຳນວຍໃຫ້ຜູ້ໃຫ້ຄຳປຶກສາດ້ານອາຊີບສາມາດຫັນໄປເນັ້ນການໃຫ້ຄຳແນະນຳສະເພາະບຸກຄົນຫຼາຍກວ່າການເກັບຂໍ້ມູນ ຫຼື ການໃຫ້ຄຳປຶກສາທົ່ວໄປ.

ມະຫາວິທະຍາໄລຕ່າງໆອາດຈະຕ້ອງການຜູ້ໃຫ້ຄຳປຶກສານ້ອຍລົງ ຊຶ່ງຈະຊ່ວຍຫຼຸດຕົ້ນທຶນ ແລະຊ່ວຍຄວບຄຸມການເພີ່ມຄ່າຮຽນໄດ້.ໃນເວລາດຽວກັນ AIສາມາດປັບປຸງປະສິດຜົນຂອງຄູສອນໄດ້ໂດຍການສະໜັບສະໜູນວຽກຕ່າງໆ ເຊັ່ນ: ການວາງແຜນການຮຽນ-ການສອນ, ການກຳນົດວຽກບ້ານ, ການສອບເສັງ ແລະ ການໃຫ້ຄະແນນຊຶ່ງຊ່ວຍໃຫ້ຄູສອນມີເວລາສຳລັບການສອນຫຼາຍຂຶ້ນ.

ທ່ານ ໂຮຊານາກາ ເປີດເຜີຍວ່າ: ຄ່າຮຽນຂອງມະຫາວິທະຍາໄລເອກະຊົນ ຕັ້ງແຕ່ປີ 2004-2023 ໃນສະຫະລັດ ອາເມຣິກາ ເພີ່ມຂຶ້ນ 40% ເມື່ອປັບຕາມອັດຕາເງິນເຟີ້, ຂະນະທີ່ຄ່າຮຽນຂອງມະຫາວິທະຍາໄລລັດຖະບານເພີ່ມສູງຂຶ້ນກວ່ານີ້ຫຼາຍ.

ຄ່າຮຽນທີ່ເພີ່ມຂຶ້ນນີ້, ມີປັດໄຈຫຼັກມາຈາກຄ່າໃຊ້ຈ່າຍສໍາລັບວຽກດ້ານບໍລິຫານ ເນື່ອງຈາກມະຫາວິທະຍາໄລໃຊ້ຈ່າຍໄປກັບການໃຫ້ບໍລິການສະເພາະສຳລັບນັກສຶກສາຫຼາຍຂຶ້ນເຊັ່ນ: ການໃຫ້ຄຳປຶກສາກ່ຽວກັບອາຊີບ, ໂອກາດຈາກກິດຈະກຳນອກຫຼັກສູດ ແລະ ການກວດສຸຂະພາບ ຊຶ່ງທັງໝົດນີ້ຕ້ອງໃຊ້ບຸກຄະລາກອນເພີ່ມຂຶ້ນ.