ຂ່າວສານຊີອາໄອລາຍງານ ຫວ່າງມໍ່ໆມານີ້ວ່າ: ສະຖາບັນຄົ້ນຄວ້າອຸດສາຫະກຳວັດທະນະທຳຈີນ-ອາຊຽນ ຊຶ່ງເປັນສະຖາບັນຄົ້ນຄວ້າອຸດສາຫະກຳວັດທະນະທຳດ້ານການພິມຂອງກຸ່ມບໍລິສັດສື່ສຳນັກພິມກວາງຊີຈີນ ໄດ້ສ້າງຕັ້ງຂຶ້ນໃນໄລຍະຈັດສັບປະດາວັດທະນະທຳປຶ້ມຈີນ-ອາຊຽນ.

ທ່ານຈ້າງຢີ້ປິ່ນ ຜູ້ອຳນວຍການໃຫຍ່ຂອງກຸ່ມບໍລິສັດສື່ສຳນັກພິມກວາງຊີແນະນຳໃຫ້ຮູ້ວ່າ: ສະຖາບັນຄົ້ນຄວ້າດັ່ງກ່າວແມ່ນສະຖາບັນຄົ້ນຄວ້າແບບສັງລວມ, ຈະສຸມກຳລັງລົງເລິກຄົ້ນຄວ້າສະພາບການໃນປັດຈຸບັນແລະທ່າອ່ຽງແຫ່ງການພັດທະນາອຸດສາຫະກຳວັດທະນະທຳຈີນ- ອາຊຽນ, ວາງມາດຕະການແລະຂໍ້ສະເໜີທີ່ລ້ຳໜ້າແລະປະຕິບັດໄດ້ ເພື່ອຊ່ວຍຊຸກຍູ້ເຂດປົກຄອງຕົນເອງເຜົ່າຈ້ວງກວາງຊີຈີນສ້າງຍີ່ຫໍ້ອຸດສາຫະກຳວັດທະນະທຳທີ່ມີຊື່ສຽງຫຼາຍກວ່າເກົ່າໃນສາກົນ.