ຂ່າວຕ່າງປະເທດລາຍງານ, ຖະແຫຼງການຂອງຜູ້ນໍາກຸ່ມບັນດາພື້ນຖານເສດຖະກິດພັດທະນາແລະຫາກໍພົ້ນເດັ່ນຂຶ້ນແຖວໜ້າໂລກ (G20)ຢູ່ນະຄອນຣີໂອ ເດຈາເນໂຣ ປະເທດບຣາຊິນທີ່ເຜີຍແຜ່ໃນວັນທີ 19 ພະຈິກ ຜ່ານມາລະບຸວ່າ: ຜູ້ນຳກຸ່ມG20 ແນະນຳການຮ່ວມມືລະດັບໂລກເພື່ອຕໍ່ສູ້ກັບຄວາມອຶດຫິວ, ຄວາມທຸກຍາກ ແລະ ເພື່ອສະໜັບສະໜູນການດຳເນີນງານໂຄງການທີ່ເປັນເຈົ້າຂອງແລະນຳໂດຍປະເທດໃດປະເທດໜຶ່ງ ທີ່ມີຈຸດປະສົງເພື່ອຫຼຸດຜ່ອນຄວາມອຶດຫິວ ແລະ ຄວາມທຸກຍາກໃນທົ່ວໂລກ ຊຶ່ງຈະປະກອບສ່ວນເຂົ້າໃນການຟື້ນຟູການພົວພັນຄູ່ຮ່ວມມືລະດັບໂລກເພື່ອການພັດທະນາທີ່ຍືນຍົງ.
ຜູ້ນໍາກຸ່ມG20ຢືນຢັນວ່າ: ຈະເນັ້ນເຮັດວຽກເພື່ອເພີ່ມຜົນຜະລິດທາງການກະເສດ ແລະ ຫຼຸດການສູນເສຍອາຫານ ແລະ ຂີ້ເຫຍື້ອອາຫານຢ່າງຍືນຍົງ ລວມທັງຄຳນຶງເຖິງການເພິ່ງພາອາໄສຊຶ່ງກັນ ແລະ ກັນ ຂອງນາໆປະເທດໃນການບັນລຸຄວາມໝັ້ນຄົງທາງດ້ານອາຫານ ແລະ ໂພຊະນາການ, ຄວາມປອດໄພທາງດ້ານອາຫານ ແລະ ຄວາມຍືນຍົງຜ່ານນະໂຍບາຍການຄ້າແບບເປີດທີ່ສອດຄ່ອງກັບກົດລະບຽບຂອງອົງການການຄ້າໂລກ.
ຜູ້ນຳກຸ່ມG20 ຢືນຢັນການຢຶດໝັ້ນໃນວາລະການພັດທະນາຂອງອົງການສະຫະປະຊາຊາດ ແລະຢືນຢັນຄຳໝັ້ນສັນຍາທີ່ຈະຊ່ວຍເຫຼືອປະເທດກຳລັງພັດທະນາໃຫ້ນຳໃຊ້ເຂົ້າກັບຕ່ອງໂສ້ອຸດສາຫະກຳ, ຕ່ອງໂສ້ມູນຄ່າ ແລະ ຕ່ອງໂສ້ການສະໜອງລະດັບໂລກໃຫ້ດີຍິ່ງຂຶ້ນ ຕະຫຼອດຈົນເລັ່ງຂະບວນການປັບໃຫ້ເປັນອຸດສາຫະກຳ ແລະ ການຄ້າທີ່ທັນສະໄໝ.
ຜູ້ນຳກຸ່ມG20 ຍັງເລັງເຫັນວ່າ: ການສໍ້ລາດບັງຫຼວງ ສົ່ງຜົນກະທົບຕໍ່ການພັດທະນາທີ່ຍືນຍົງ ພ້ອມຢືນຢັນຄຳໝັ້ນສັນຍາ ແລະ ທຸ່ມເທຮ່ວມກັນໃນການເປັນຜູ້ນຳ, ໂດຍການເປັນຕົວຢ່າງຄວາມພະຍາຍາມລະດັບໂລກໃນການຕ້ານການສໍ້ລາດບັງຫຼວງ ແລະ ເງິນທຶນຜິດກົດໝາຍທີ່ກ່ຽວຂ້ອງ.