ວິທະຍຸກະຈາຍສຽງຫວຽດນາມລາຍງານວ່າ: ງານສັບປະດາດີຈີຕອນສາກົນ ຫວຽດນາມ ປີ 2024 (Vietnam International Digital Week – VIDW 2024) ໄດ້ດຳເນີນໃນວັນທີ 19 ພະຈິກ ຜ່ານມານີ້ຢູ່ນະຄອນຮະລອງແຂວງກວາງນິງ, ດ້ວຍຫົວຂໍ້: ຜູ້ຊ່ວຍສະເໝືອນຈິງ.

ຂ່າວລະບຸວ່າ: ງານດັ່ງກ່າວ ຈັດໂດຍກະຊວງຖະແຫຼງຂ່າວ ແລະ ການສື່ສານ ຫວຽດນາມ ສົມທົບກັບ ຄະນະກຳມະການປະຊາຊົນແຂວງກວາງນິງ, ໂດຍສືບຕໍ່ຢັ້ງຢືນຄຳໝັ້ນສັນຍາຢ່າງແຂງແຮງຂອງ ຫວຽດນາມ ໃນການຊຸກຍູ້ການຮ່ວມມືດີຈີຕອນໃນພາກພື້ນອາຊຽນ ແລະ ເປີດກວ້າງການພົວພັນກັບບັນດາຄູ່ຮ່ວມມືສາກົນ. ງານໄດ້ດຳເນີນຮອດວັນທີ 22 ພະຈິກ ຈຶ່ງປິດລົງ, ຄາດວ່າຈະດຶງດູດຜູ້ແທນຫຼາຍກວ່າ 600 ທ່ານ ຊຶ່ງເປັນການນຳບັນດາອົງການຄຸ້ມຄອງລັດ ທີ່ມາຈາກເກືອບ 30 ປະເທດ, ຜູ້ແທນອົງການຈັດຕັ້ງສາກົນ ແລະ ວິສາຫະກິດເຕັກໂນໂລຊີແຖວໜ້າເຂົ້າຮ່ວມ.

ໃນວາລະກອງປະຊຸມຄົບຄະນະ, ກອງປະຊຸມໂຕະມົນ, ວາລະປຶກສາຫາລືຂັ້ນລັດຖະມົນຕີໄດ້ສຸມໃສ່ໂປຣແກຣມຂອງຜູ້ຊ່ວຍສະເໝືອນຈິງ, ຊຸກຍູ້ການຮ່ວມມື ເພື່ອແນໃສ່ຂຸດຄົ້ນກຳລັງບົ່ມຊ້ອນຂອງເຄື່ອງມືດັ່ງກ່າວໃຫ້ມີປະສິດທິຜົນ. ທ່ານ ຫງວຽນແມ້ງຮຸ່ງ ລັດຖະມົນຕີກະຊວງຖະແຫຼງຂ່າວ ແລະ ການສື່ສານ ຫວຽດນາມ, ຮອງປະທານຄະນະກຳມະການແຫ່ງຊາດກ່ຽວກັບການຫັນເປັນດີຈີຕອນໃຫ້ຂໍ້ສັງເກດວ່າ: AI ແມ່ນສິ່ງທີ່ໃໝ່ສຳລັບພວກເຮົາ, ດັ່ງນັ້ນ ການຮ່ວມມືແມ່ນເສັ້ນທາງທີ່ດີທີ່ສຸດເພື່ອໃຫ້ພວກເຮົາພັດທະນາ. ຫວຽດນາມ ຖື Opensource AI ເປັນວິທີເພື່ອພັດທະນາແບບຍືນຍົງ. ຫວຽດນາມຈະສືບຕໍ່ໃຫ້ບຸລິມະສິດຊຸກຍູ້ບັນດາຂໍ້ລິເລີ່ມການຮ່ວມມືໃນພາກພື້ນ ແລະ ສາກົນໃນຂົງເຂດເຕັກໂນໂລຊີດີຈີຕອນ, ເສດຖະກິດດີຈີຕອນ, ໃນນັ້ນ ຈະໃຫ້ບຸລິມະສິດໃນໂຄງການຮ່ວມມືກ່ຽວກັບ AI, ການພັດທະນາ ແລະ ນຳໃຊ້ຜູ້ຊ່ວຍສະເໝືອນຈິງ.