ກອງປະຊຸມສະຫຼຸບຖອດຖອນບົດຮຽນຜູ້ບໍລິຫານໂຮງຮຽນກາານເມືອງ ແລະ ການປົກຄອງ ບັນດາແຂວງ, ນະຄອນຫຼວງວຽງຈັນ ປະຈຳປີ 2023 - 2024 ແລະ ທິດທາງແຜນການ 2024 – 2025 ໄດ້ຈັດຂຶ້ນໃນລະຫວ່າງວັນທີ 18-19 ພະຈິກ ທີ່ສະໂມສອນເມືອງບຸນເໜືອ ແຂວງຜົ້ງສາລີ ພາຍໃຕ້ການເປັນປະທານຂອງ ທ່ານ ພູວົງ ອຸ່ນຄຳແສນ ກຳມະການສູນກາງພັກ ເລຂາຄະນະບໍລິຫານງານພັກ ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ໂດຍການເຂົ້າຮ່ວມຂອງ ທ່ານ ຄຳຜອຍ ວັນນະສານ ກຳມະການສູນກາງພັກ ເລຂາພັກແຂວງ ເຈົ້າແຂວງໆຜົ້ງສາລີ, ມີບັນດາສະຫາຍ ຄະນະພັກ, ຄະນະນໍາ, ຫົວໜ້າກົມ, ຫົວໜ້າຫ້ອງການ, ຫົວໜ້າສູນ, ຫົວໜ້າໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ທົ່ວປະເທດເຂົ້າຮ່ວມ.

ໃນກອງປະຊຸມ, ທ່ານ ຄຳຜອຍ ວັນນະສານ ໄດ້ລາຍງານສະພາບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ຂອງແຂວງ ໂດຍສັງເຂບ ຊຶ່ງໄດ້ຍົກໃຫ້ເຫັນສະພາບການຈັດຕັ້ງປະຕິບັດ, ຂໍ້ຫຍຸ້ງຍາກ ແລະ ສິ່ງທ້າທາຍ, ທ່າແຮງບົ່ມຊ້ອນຂອງແຂວງ ໃນການພັດທະນາເສດຖະກິດສັງຄົມ. ຈາກນັ້ນ ທ່ານ ສຸພາວະດີ ຫຼ້າຄຳສາຍ ຫົວໜ້າກົມຄຸ້ມຄອງການຮຽນ-ການສອນ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຜ່ານຮ່າງບົດສະຫຼູບການຈັດຕັ້ງປະຕິບັດຫຼັກສູດການຮຽນ-ການສອນ ຢູ່ໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງວຽງຈັນ ປະຈຳສົກຮຽນ 2023-2024 ແລະ ທິດທາງແຜນການ 2024–2025 ຊຶ່ງທ່ານໄດ້ຍົກໃຫ້ເຫັນສະພາບລວມ, ດ້ານດີຜົນສໍາເລັດ, ດ້ານອ່ອນຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຕໍ່ໜ້າ. ໃນໄລຍະສົກຮຽນທີ່ຜ່ານມາໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງ ໄດ້ສຸມໃສ່ຈັດຕັ້ງປະຕິບັດຫຼັກສູດການຮຽນ-ການສອນ ລະບົບທິດສະດີການເມືອງລະບົບ 45 ວັນ, ລະບົບ 10 ວັນໃຫ້ເລຂາພັກບ້ານ ແລະ ຄະນະພັກບ້ານ, ລະບົບຂັ້ນຕົ້ນ ແລະ ລະບົບຂັ້ນກາງ, ມີທັງໝົດ 162 ຊຸດຮຽນ, ມີຜູ້ເຂົ້າຮຽນທັງໝົດ 8,381 ຄົນ ຍິງ 2,101 ຄົນ.

ວຽກງານຄົ້ນຄວ້າວິທະຍາສາດໄດ້ສໍາເລັດການແນະນໍາວິທີວິທະຍາໃນການຂຽນບົດວິທະຍາສາດ, ການຄົ້ນຄວ້າ ແລະ ຈັດກອງປະຊຸມ ສໍາມະນາວິທະຍາສາດ ຢູ່ 3 ພາກໃນທົ່ວປະເທດ ມີຫົວຂໍ້ລວມ ທັງໝົດຈໍານວນ 4 ຫົວຂໍ້ຄື: ສ້າງການຫັນປ່ຽນຢ່າງແຂງແຮງໃຫ້ແກ່ພະນັກງານໃນເງື່ອນໄຂເສດຖະກິດຕະຫຼາດ, ສ້າງຄວາມເຂັ້ມແຂງທາງດ້ານການເງິນ ຢູ່ປະເທດເຮົາ, ຄຸ້ມຄອງຊັບພະຍາກອນທຳມະຊາດຕາມທິດສີຂຽວ, ຍືນຍົງ ແລະ ສ້າງຖານລາຍຮັບດ້ວຍການຜະລິດກະສິກຳ. ຫົວຂໍ້ຍ່ອຍ ມີທັງໝົດຈໍານວນ 66 ຫົວຂໍ້ ແລະ ປ້ອງກັນໂຄງຮ່າງບົດວິທະຍາສາດ ຫົວຂໍ້: ສ້າງຄວາມເຂັ້ມແຂງທາງດ້ານການເງິນ ຢູ່ປະເທດເຮົາ (ມີ 6 ຫົວຂໍ້ຍ່ອຍ) ຊຶ່ງປະກອບມີ 6 ແຂວງເຂົ້າຮ່ວມຄື: ແຂວງສາລະວັນ (ເຈົ້າພາບ), ຄໍາມ່ວນ, ສະຫວັນນະເຂດ, ອັດຕະປື, ຈຳປາສັກ ແລະ ແຂວງເຊກອງ.

ໃນກອງປະຊຸມ, ບັນດາຜູ້ເຂົ້າຮ່ວມຈາກສະຖາບັນການເມືອງ ແລະ ການປົກຄອງແຂວງ, ແຫ່ງຊາດ, ນະຄອນຫຼວງ ແລະ ບັນດາແຂວງ ທົ່ວປະເທດ ໄດ້ພ້ອມກັນຄົ້ນຄ້ວາປະກອບຄຳຄິດຄຳເຫັນ ໃສ່ບົດສະຫຼູບ ແລະ ບັນດາຂໍ້ຫຍຸ້ງຍາກ ສິ່ງທ້າທາຍ ທີ່ແຕ່ລະແຂວງພົບບັນຫາໃນໄລຍະທີ່ຜ່ານມາ ເພື່ອພ້ອມກັນຊອກຫາທິດທາງເພື່ອແກ້ໄຂວຽກງານການຮຽນ, ການສອນຂອງສະຖາບັນ, ໂຮງຮຽນ ໃນທົ່ວປະເທດໃຫ້ໄດ້ຮັບການຈັດຕັ້ງປະຕິບັດ ຢ່າງມີປະສິດຕິພາບ ແລະ ປະສິດຜົນຫຼາຍຂຶ້ນກ່ວາເກົ່າ.

ໃນໂອກາດກ່າວປິດ ກອງປະຊຸມ ທ່ານ ພູວົງ ອຸ່ນຄຳແສນ ໄດ້ຮຽກຮ້ອງໃຫ້ຜູ້ເຂົ້າຮ່ວມ ເພີ່ມທະວີຄວາມເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານສະມາຊິກພັກ, ພະນັກງານ, ຄູ-ອາຈານ ຢ່າງເປັນປົກກະຕິ, ຖືເອົາການຄົ້ນຄວ້າເຊື່ອມຊຶມບັນດາມະຕິ, ຄໍາສັ່ງ, ຂໍ້ກຳນົດ, ກົດລະບຽບ ແລະ ກົດໝາຍຂອງລັດ ເພື່ອຮັບຮູ້ເຂົ້າໃຈໃຫ້ເລິກເຊິ່ງ, ເພີ່ມທະວີຄວາມຮັບຜິດຊອບໃນການນໍາພາ-ຊີ້ນໍາ ຂອງຄະນະພັກ, ຄະນະນໍາໂຮງຮຽນທຸກຂັ້ນ ຢ່າງໃກ້ຊິດຕິດແທດ ໃນການຈັດຕັ້ງຄຸ້ມຄອງ-ບໍລິຫານການຮຽນ-ການສອນ, ປະຕິບັດຕາມຫຼັກສູດຢ່າງເຄັ່ງຄັດ, ຖືກຕ້ອງຕາມລະບຽບຫຼັກການ, ມີການນໍາພາ-ຊີ້ນໍາຢ່າງເປັນລະບົບ, ສ້າງແຜນການເຄື່ອນໄຫວໃນແຕ່ລະໄລຍະ, ຕິດຕາມກວດກາ ແລະ ປັບປຸງແຜນການເຄື່ອນໄຫວແຕ່ລະໄລຍະໃຫ້ສອດຄ່ອງ-ທັນກັບສະພາບ, ຖືສໍາຄັນການຍົກລະດັບການນໍາພາ, ສ້າງການຫັນປ່ຽນໃໝ່ທາງດ້ານທິດສະດີ ແລະ ພຶດຕິ ກຳໃຫ້ທັນກັບໂລກ, ເອົາໃຈໃສ່ຍົກລະດັບຄະນະນໍາ ແລະ ຖັນແຖວຄູ-ອາຈານ ຂອງສະຖາບັນໃຫ້ສູງ ຂຶ້ນກວ່າເກົ່າ, ສ້າງຖັນແຖວຄູ-ອາຈານ ໃຫ້ມີລະດັບວິຊາການທີ່ສູງ ແລະ ຫຼາຍກວ່າເກົ່າ, ມີຄຸນວຸດທິເພີ່ມຂຶ້ນ ຕາມມາດຕະຖານຂອງລະບົບການສຶກສາ ໃຫ້ໄດ້ 3 ລັກສະນະ 5 ຫຼັກມູນການສຶກສາ, ຮັບປະກັນທາງດ້ານຄວາມຮູ້, ດ້ານທັກສະ, ດ້ານການນໍາໃຊ້, ດ້ານທັກສະທາງສັງຄົມ ແລະ ອື່ນໆ. ກອງປະຊຸມຄັ້ງນີ້, ຍັງໄດ້ມອບໃບຍ້ອງຍໍໃຫ້ກັບໂຮງຮຽນການເມືອງ-ການປົກຄອງ ທີ່ມີຜົນງານໃນການສອນດີ, ສອນເກັ່ງ ໃນໄລຍະທີ່ຜ່ານມາ ປະຈຳປີ 2024 ເຊິ່ງລວມມີ ປະເພດ 1 ມີ 4 ແຂວງ, ປະເພດ 2 ມີ 10 ແຂວງ ແລະ ປະເພດທີ່ 3 ມີ 3 ແຂວງ.

( ພາບ-ຂ່າວ: ແສງຄຳ ສາລີວັນ )