ທ່ານ ພົນໂທ ວົງຄໍາ ພົມມະກອນຮອງລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ໄດ້ຕ້ອນຮັບທ່ານ ພົນເອກ ຟານວັນ ຢາງລັດຖະມົນຕີກະຊວງປ້ອງກັນປະເທດ ສສ ຫວຽດນາມພ້ອມຄະນະ ໃນວັນທີ 19 ພະຈິກນີ້ ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ, ໃນໂອກາດທີ່ທ່ານເດີນທາງມາເຂົ້າຮ່ວມກອງປະຊຸມລັດຖະມົນຕີປ້ອງກັນປະເທດອາຊຽນຄັ້ງທີ18 ແລະ ອາຊຽນ-ບວກ ຄັ້ງທີ 11 ທີ່ຈັດຂຶ້ນຢູ່ນະຄອນຫຼວງວຽງຈັນໃນລະຫວ່າງ ວັນທີ 19-22 ພະຈິກນີ້.

ໂອກາດດັ່ງກ່າວ, ທ່ານ ພົນໂທ ວົງຄໍາ ພົມມະກອນໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ທ່ານ ພົນເອກ ຟານວັນ ຢາງ ພ້ອມດ້ວຍຄະນະທີ່ເດີນທາງເຂົ້າມາຮ່ວມກອງປະຊຸມ ທີ່ ສປປ ລາວ ຮັບກຽດເປັນເຈົ້າພາບຈັດຂຶ້ນ ຊຶ່ງເປັນການປະກອບສ່ວນສຳຄັນເຂົ້າໃນການເພີ່ມທະວີຮັດແໜ້ນສາຍພົວພັນຮ່ວມມື, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ເວົ້າລວມ, ເວົ້າສະເພາະ ການຮ່ວມມືລະຫວ່າງສອງກະຊວງປ້ອງກັນປະເທດລາວ-ຫວຽດນາມໃຫ້ແໜ້ນແຟ້ນ ແລະ ພົ້ນເດັ່ນຂຶ້ນໃນເວທີພາກພື້ນ ແລະ ສາກົນ.

ໃນວັນດຽວກັນ, ການນຳກະຊວງປ້ອງກັນປະເທດຍັງໄດ້ຕ້ອນຮັບບັນດາລັດຖະມົນຕີ ແລະ ຄະນະຜູ້ແທນກ່ຽວຂ້ອງຈາກປະເທດຕ່າງໆທີ່ເດີນທາງມາເຂົ້າຮ່ວມກອງປະຊຸມສຳຄັນດັ່ງກ່າວເຊັ່ນ: ຄະນະຜູ້ແທນປະເທດມາເລເຊຍ, ມຽນມາ, ຣາຊະອານາຈັກໄທ, ຟີລິບປິນ, ກຳປູເຈຍ, ກອງເລຂາອາຊຽນ, ບຣູໄນ, ອິນໂດເນເຊຍ, ສິງກະໂປ ແລະ ຄະນະຜູ້ແທນຈາກປະເທດນູແວນເຊລັງ.

(ຂ່າວ-ພາບ: ແສງຈັນ, ບຸນຕອມ)