ຊຸດຝຶກອົບຮົມ ລະບົບຖານຂໍ້ມູນ ວຽກງານກໍ່ສ້າງຮາກຖານການເມືອງ ຕິດພັນກັບວຽກງານ ພັດທະນາຊົນນະບົດຮອບດ້ານ, ວຽກງານ 3 ສ້າງ ແລະ ວຽກງານຄວາມໝັ້ນຄົງ ໃຫ້ແກ່ 4 ແຂວງພາກ ເໜືອ ຄື: ແຂວງບໍ່ແກ້ວ, ຫຼວງນໍ້າທາ, ຜົ້ງສາລີ ແລະ ແຂວງອຸດົມໄຊ ໄດ້ຈັດຂຶ້ນໃນວັນທີ 20 ພະຈິກ 2024, ທີ່ຫ້ອງວ່າການແຂວງບໍ່ແກ້ວ ໂດຍການເປັນປະທານຂອງ ທ່ານ ເພັງສອນ ແກ້ວວິໄລ ຮອງເລຂາພັກແຂວງ ຜູ້ຊີ້ນຳຂົງເຂດພັກ-ພະນັກງານ, ທ່ານ ຄໍາແສງ ວິປ່າວ ຮອງຫົວໜ້າກົມທ້ອງຖິ່ນຮາກຖານ ຫ້ອງວ່າການສູນກາງພັກ ພ້ອມດ້ວຍທີມງານ, ນັກສໍາມະນາກອນ ມາຈາກ 4 ແຂວງ ແລະ ບັນດາເມືອງເຂົ້າຮ່ວມ.

ຝຶກອົບຮົມຄັ້ງນີ້, ສໍາມະນາກອນຈະໄດ້ຮຽນຮູ້ ແລະ ທົບທວນໂປຣແກຣມລະບົບຖານຂໍ້ມູນ 4 ກຸ່ມວຽກ ຂອງວຽກງານກໍ່ສ້າງຮາກຖານການເມືອງ 4 ແຂວງພາກເໜືອ; ຮັບຟັງການສະຫຼຸບລາຍງານຜົນຂອງການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງປະຈຳປີ 2024 ແລະ ທິດທາງແຜນການປີ 2025 ຂອງແຕ່ລະແຂວງ, ຕິດພັນກັບການຜັນຂະຫຍາຍຄໍາສັ່ງແນະນໍາເລກທີ 233/ຄລສພ ແລະ ບົດແນະນໍາ ເລກທີ 02/ຫສພ, ພ້ອມທັງປະກອບຄໍາເຫັນ ເພື່ອແລກປ່ຽນເຊິ່ງກັນ ແລະ ກັນ ກ່ຽວກັບລະບົບຖານຂໍ້ມູນໃຫ້ມັນຄົບຖ້ວນສົມບູນ ໂດຍອີງໃສ່ໝາກຜົນຂອງການພັດທະນາ ເປັນແຕ່ລະໄລຍະ ແລະ ຄວາມເປັນຈິງຂອງແຕ່ລະທ້ອງຖິ່ນຮາກຖານ ເພື່ອປັບປຸງໃຫ້ສອດຄ່ອງກັບທ້ອງຖິ່ນ. ເພື່ອສະໜອງຂໍ້ມູນມາກະກຽມເນື້ອໃນໃຫ້ແກ່ກອງປະຊຸມສະຫຼຸບວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດຮອບດ້ານ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ທົ່ວປະເທດ ປະຈໍາປີ 2024 ແລະ ທິດທາງແຜນການປີ 2025 ໃນຕົ້ນເດືອນ ມັງກອນ 2025 ນີ້.

(ຂ່າວ: ຄໍາເພັງ ສີສະຫວ່າງ)