ເມື່ອບໍ່ດົນມານີ້ ຢູ່ຫໍປະຊຸມໃຫ່ຍຂອງເມືອງໂພນໄຊ ແຂວງຫຼວງພະບາງ ໄດ້ຈັດກອງປະຊຸມຍູ້ການຈັດຕັ້ງປະຕິບັດມະຕິ 04/ກມສພ, ມະຕິ 19/ກມສພ ແລະ ມະຕິ 05/ລບ ຂຶ້ນຢ່າງເປັນທາງການໂດຍເປັນປະທານຂອງ ທ່ານ ຈິນດາວົງ ໂພສີຄໍາ ຫົວໜ້າພະແນກແຜນການ ແລະ ການລົງທືນແຂວງຄະນະສະເພາະກິດຂັ້ນແຂວງ, ທ່ານ ທອງຈັນ ລັດຕະນະປະດິດ ເຈົ້າເມືອງໆໂພນໄຊ, ມີທີມງານຂອງແຂວງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຮອງຫ້ອງການເຂົ້າຮ່ວມ.

ໃນກອງປະຊຸມ, ທ່ານ ແກ່ນຈັນ ພິລາວັນ ຮອງເຈົ້າເມືອງໆໂພນໄຊ ຄະນະສະເພາະກິດຂັ້ນເມືອງ ໄດ້ຂຶ້ນລາຍງານສະພາບໂດຍຫຍໍ້ຂອງວຽກງານສະເພາະກິດຂັ້ນເມືອງ. ປັດຈຸບັນ ທົ່ວເມືອງມີເນື້ອທີສວນຫຍ້າ 26,402 ເຮັກຕາ, ປະຊາຊົນໄດ້ປູກໝາກນໍ້າມັນຕົ້ນ 63 ເຮັກຕາ, ຢາງພາລາ 544 ເຮັກຕາ, ກາເຟ 34.96 ເຮັກຕາ ແລະ ພຶດຊະນິດອື່ນໆທີ່ເປັນສີນຄ້າປະຊາຊົນປູກຫຼາຍຂຶ້ນເຊັ່ນ: ຢ່າງພາລາ, ສາລີ ແລະ ມັນຕົ້ນ. ມີສັດປະເພດງົວ 45,141 ໂຕ, ຄວາຍ 5,044 ໂຕ, ໝູ 14,389 ໂຕ, ແບ້ 3,974 ໂຕ, ເພື່ອແກ້ໄຂຄວາມທຸກຍາກຢ່າງມີຈຸດສຸມ, ມີຄອບຄົວພົ້ນທຸກ 3,115 ຄອບຄົວ, ມີຄອບຄົວບັນລຸມາດຕະຖານພັດທະນາ 2,309 ຄອບຄົວ, ບ້ານທີບັນລຸມາດຖານພົ້ນຍາກທຸກ ແລະ ມາດຕະຖານພັດທະນາ 14 ບ້ານ ເຫັນໄດ້ວ່າເສດຖະກິດຂອງເມືອງມີການຂະຫຍາຍຕົວຢູ່ໃນລະດັບ 7%, ລາຍຮັບສະເລ່ຍໃສ່ຫົວຄົນໄດ້ 12,126,000 ກີບຕໍ່ຄົນຕໍ່ປີ. ໃນນັ້ນ ຄະນະຮັບຜິດຊອບສະເພາະກິດຂັ້ນແຂວງລົງຊຸກຍູ້ວຽກງານມະຕິ 04/ກມສພ, ມະຕິ 19/ກມສພ, ມະຕິ 05/ລບ ແລະ 2 ວາລະແຫ່ງຊາດ ວຽກງານຈຸດສຸມເຄັ່ງຮ້ອນຕາມແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 9 ຢູ່ພາຍໃນເມືອງກໍໄດ້ກໍານົດແຜນວຽກງານຂອງສະເພາະກິດຂັ້ນເມືອງ.

(ແຫຼ່ງຂ່າວ: ສີວອນ ນັກຂ່າວເມືອງໂພນໄຊ)