ຂ່າວສານຊີອາໄອລາຍງານ ໃນວັນທີ 19 ພະຈິກ ຜ່ານມາວ່າ:ລັດຖະສະພາອິນໂດເນເຊຍໄດ້ຮັບຮອງຮ່າງກົດໝາຍສະບັບໜຶ່ງໂດຍກຳນົດໃຫ້ຈາກາຕາເປັນເຂດພິເສດຂອງປະເທດຕົນຢ່າງເປັນທາງການ ແລະ ຍົກເລີກຖານະທີ່ເປັນນະຄອນຫຼວງຂອງຈາກາຕາ. ແຕ່ຮ່າງກົດໝາຍສະບັບນີ້ຍັງຕ້ອງລໍຖ້າໃຫ້ປະທານາທິບໍດີອິນໂດເນເຊຍລົງນາມໃນລັດຖະດຳລັດກ່ອນຈຶ່ງຈະເກີດມີສັກສິດໄດ້.

ທ່ານຄາເດຍ ຮອງປະທານລັດຖະສະພາອິນໂດເນເຊຍໃຫ້ຮູ້ວ່າ: ພາຍຫຼັງຮ່າງກົດໝາຍດັ່ງກ່າວມີຜົນສັກສິດແລ້ວ, ຖານະຂອງຈາກາຕາຈະບໍ່ເປັນນະຄອນຫຼວງອີກຕໍ່ໄປ ແຕ່ຈະເປັນເຂດພິເສດແຫ່ງໜຶ່ງ, ຂະນະທີ່ນະຄອນຫຼວງໃໝ່ຂອງອິນໂດເນເຊຍຈະປ່ຽນເປັນນູຊານຕາຣາຢູ່ເກາະຄາລີມານຕັນຕາເວັນອອກ.

ປັດຈຸບັນ, ນະຄອນຫຼວງໃໝ່ກຳລັງຢູ່ໃນໄລຍະດຳເນີນການກໍ່ສ້າງ, ຕາມແຜນການແລ້ວ,ພະນັກງານ-ລັດຖະກອນຂອງລັດຖະບານອິນໂດເນເຊຍຈະຍົກຍ້າຍໄປປະຈຳການຢູ່ນະຄອນຫຼວງໃໝ່ເລີ່ມຕັ້ງແຕ່ຕົ້ນປີ2025ເປັນຕົ້ນໄປ.