ຂ່າວຕ່າງປະເທດລາຍງານວ່າ: ອົງການອະນາໄມໂລກ (WHO) ອະນຸມັດວັກຊິນພະຍາດໝາກສຸກລີງ (Mpox) ທີ່ຜະລິດໂດຍບໍລິສັດ KM Biologics ຂອງຍີ່ປຸ່ນ ສຳລັບໃຊ້ໃນກໍລະນີສຸກເສີນແລ້ວ ໃນວັນທີ 19 ພະຈິກ ຜ່ານມາ ຊຶ່ງຖືເປັນວັກຊິນ ທີ 2 ທີ່ໄດ້ຮັບການອະນຸມັດຈາກWHO.
ຂ່າວລະບຸວ່າ: ໃນເດືອນສິງຫາ ຜ່ານມາ ອົງການ WHO ໄດ້ປະກາດພະຍາດໝາກສຸກລີງ ເປັນກໍລະນີສຸກເສີນດ້ານສາທາລະນະສຸກລະດັບໂລກ ຄັ້ງທີ 2 ໃນຮອບ 2 ປີ ຫຼັງຈາກໄວຣັດສາຍພັນໃໝ່ທີ່ເອີ້ນວ່າ: CladeIbແຜ່ກະຈາຍຈາກ ສາທາລະນະລັດ ປະຊາທິປະໄຕ ກົງໂກ ໄປຍັງບັນດາປະເທດໃກ້ຄຽງ.
ໃນເດືອນກັນຍາຜ່ານມາ, ຫຼັງຈາກWHOຖືກຕຳນິວ່າການດຳເນີນການດ້ານວັກຊິນຊັກຊ້າເກີນໄປ, ຈຶ່ງໄດ້ອະນຸມັດວັກຊິນພະຍາດໝາກສຸກລີງຂອງ ບໍລິສັດ Bavarian Nordic ແລະ ເປີດເຜີຍວ່າ: ກຳລັງພິຈາລະນາວັກຊິນ LC16 ທີ່ຜະລິດໂດຍ ບໍລິສັດKM Biologics ຂອງຍີ່ປຸ່ນ ເພື່ອເປັນວັກຊິນທາງເລືອກດ້ວຍ.
WHO ເປີດເຜີຍວ່າ: ລັດຖະບານຍີ່ປຸ່ນຈະບໍລິຈາກວັກຊິນດັ່ງກ່າວ ຈຳນວນ 3.05 ລ້ານໂດສ ພ້ອມກັບເຂັມສັກຢາພິເສດໃຫ້ກັບປະເທດກົງໂກ, ໂດຍວັນຊິນນີ້ເຄີຍຖືກນຳໃຊ້ໃນປະເທດຍີ່ປຸ່ນມາແລ້ວໃນໄລຍະທີ່ມີການລະບາດຂອງພະຍາດໝາກສຸກລີງໃນອະດີດ ແລະ ໄດ້ຮັບການພິສູດແລ້ວວ່າມີຄວາມປອດໄພ ແລະ ມີປະສິດທິພາບ.
ບໍລິສັດ KM Biologics ຜະລິດວັກຊິນສຳລັບມະນຸດ ແລະ ສັດເປັນຫຼັກ, ໂດຍເປັນບໍລິສັດໃນກຸ່ມຂອງ Meiji Holdings ຊຶ່ງເປັນບໍລິສັດຜະລິດຂະໜົມຂອງຍີ່ປຸ່ນ.
ຈາກຂໍ້ມູນລ້າສຸດຂອງ WHO ພົບວ່າ: ມີຜູ້ຕິດເຊື້ອພະຍາດໝາກສຸກລີງທີ່ໄດ້ຮັບການຢືນຢັນ ຫຼື ຕ້ອງສົງໄສຕິດເຊື້ອຈຳນວນຫຼາຍກວ່າ 50,500 ຄົນ ຢູ່ອາຟຣິກກາໃນປີນີ້ ແລະ ມີຜູ້ເສຍຊີວິດແລ້ວຫຼາຍກວ່າ 1,100 ຄົນ.
