ຫ້ອງການສະຫະພັນແມ່ຍິງເມືອງວຽງພູຄາ ແຂວງຫຼວງນໍ້ທາ ໄດ້ຈັດພິທີລະນຶກວັນສາກົນຢຸດຕິໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ (ທີ 25 ພະຈິກ), ວັນສົນທິສັນຍາວ່າດ້ວຍສິດທິເດັກ (ທີ 20 ພະຈິກ) ຂຶ້ນໃນວັນທີ 22 ພະຈິກຜ່ານມາ ທີສະໂມສອນຂອງເມືອງ ໂດຍການເຂົ້າຮ່ວມຂອງທ່ານ ນາງ ຈັນຄໍາ ທອງມີໄຊ ຮອງເລຂາພັກເມືອງ ຮອງເຈົ້າເມືອງ, ມີພາກສ່ວນຕ່າງໆທີ່ກ່ຽວຂ້ອງພາຍໃນເມືອງ ເຂົ້າຮ່ວມ.

ໃນພິທີ ທ່ານ ນາງ ແສງທອງ ຊຽນປັນຍາ ກໍາມະການພັກເມືອງ ປະທານສະຫະພັນແມ່ຍິງເມືອງ ໄດ້ກ່າວເຖິງຄວາມໝາຍຄວາມສຳຄັນຂອງສອງວັນດັ່ງກ່າວ ໂດຍໄດ້ຍົກໃຫ້ເຫັນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນປັດຈຸບັນ ທີ່ກໍາລັງແຜ່ລາມຫຼາຍຮູບແບບໃນທົ່ວໂລກ ທີ່ໄດ້ສົ່ງຜົນກະທົບທາງລົບຕໍ່ການພັດທະນາເສດຖະກິດ-ສັງຄົມເວົ້າລວມ ເວົ້າສະເພາະ ແມ່ນກະທົບຕໍ່ຈິດໃຈ, ຮ່າງກາຍ ຕະຫຼອດເຖິງຊັບສິນຂອງແມ່ຍິງ ແລະ ເດັກນ້ອຍ ໂດຍສາເຫດຕົ້ນຕໍແມ່ນຍ້ອນຮີດຄອງປະເພນີທີ່ເກົ່າແກ່ຫຼ້າຫຼັງ, ການເຊື່ອຖືແບບງົມງາຍ, ຄວາມທຸກຍາກຂາດເຂີນ, ລະດັບການສຶກສາຕໍ່າ ແລະ ສິ່ງຫຍໍ້ທໍ້ອື່ນໆ ທີ່ມີຕໍ່ແມ່ຍິງໃນສັງຄົມ ຊຶ່ງປະກອບມີຫຼາຍຮູບແບບເຊັ່ນ: ການບັງຄັບການແຕ່ງງານແຕ່ອາຍຸຍັງນ້ອຍ, ການຄ້າມະນຸດ, ການບັງຄັບຮ່ວມເພດ ແລະ ການຂົ່ມຂື່ນທໍາຊໍາເລົາ ທີ່ສາມາດເກີດຂຶ້ນກັບແມ່ຍິງໃນທຸກເພດທຸກໄວ ບໍ່ວ່າຈະຢູໃນຄອບຄົວ, ຊຸມຊົນພາຍໃນຕົວເມືອງ ແລະ ຊົນນະບົດ ຊຶ່ງໄດ້ສ້າງຜົນກະທົບຕໍ່ແມ່ຍິງ ແລະ ເດັກນ້ອຍ ນັບແຕ່ມື້ເກີດຈົນເຖິງໄວແກ່ເຖົ້າຊະລາ. ດັ່ງນັ້ນ, ການຈັດພິທີຄັ້ງນີ້, ເພື່ອເປັນການປຸກລະດົມ, ປູກຈິດສໍານຶກ ໃຫ້ແກ່ພະນັກງານ-ລັດຖະກອນ, ນັກທຸລະກິດ, ພໍ່ແມາປະຊາຊົນ ໄດ້ຮັບຮູ້ ແລະ ເຂົ້າໃຈ ເຖິງບັນຫາການໃຊ້ຄວາມຮຸນແຮງຕໍ່ແມ່ຍິງ ທີ່ເປັນການລະເມີດສິດທິມະນຸດຂອງແມ່ຍິງ ແລະ ຮັບປະກັນໃຫ້ມີການປະຕິບັດສິດສະເໝີພາບລະຫວ່າງ ຍິງ-ຊາຍ ບໍ່ວ່າຈະເປັນ ທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ ກໍຄືຄອບຄົວ. ດັ່ງນັ້ນ, ທຸກຄົນໃນສັງຄົມຕ້ອງຕອບຕ້ານ ແລະ ສະກັດກັ້ນ ການໃຊ້ຄວາມຮຸນແຮງຕໍ່ແມ່ຍິງ, ພ້ອມັທງໃຫ້ການຊ່ວຍເຫຼືອແກ່ຜູ້ທີ່ຖືກເຄາະຮ້າຍຈາກການໃຊ້ຄວາມຮຸນແຮງ, ໃຫ້ຄຳປຶກສາ, ຊ່ວຍເຫຼືອທາງດ້ານກົດໝາຍ ແລະ ເພີ່ມທະວີໃນການໂຄສະນາເຜີຍແຜ່ ເຮັດໃຫ້ສັງຄົມມີຄວາມເຂົ້າໃຈ ຢ່າງເລິກຊຶ່ງ.

(ຂ່າວ ຄໍາປິງ)